Amarkɩ 13 - ZE'ELEGO PAALEGA

Pu'uhegɔ la yire lua

¹ Yezu en ze'ele pu'uhegɔ yire la puan kɔ'ɔm yehe na la, ti a zahereba la ayima soke en yeti, “Pa'ala, bihɛ kugekãra sɛ'a ti ba dikɛ mɛ dekãtɛ seko taaba wa!”

² Ti Yezu soke ba yeti, “Ya nyɛ dikãra wa? Kugere la deyina me ka yee paga de tadaana zuo, ba za'a wan ta lu.”

³ Yezu en ta zi'a Olive Zoore zuo tɔ pu'uhegɔ yire la, ti Pita, Yemesi, Yɔn, la Anduru ta soke en ba ma'a.

⁴ “Yele tu, ŋwani ma'a ti ŋwana wan ta iŋɛ, daalehum boni en wan pa'alɛ ti saŋa la paaɛ ya.”

⁵ Ti Yezu pɔhɛ yɛta ba yeti, “Bihɛ ya mɛhi suŋa ti se'em da pa'ahɛ ya.

⁶ Nɛreba zo'e zo'e wan ta wa'am na dikɛ mam yu'urɛ tɔgera yɛta ti, ‘Mam en de Kiresta la!’ Ba wan pa'ahɛ nɛreba zo'e zo'e ti ba bɔregɛ.

⁷ Ya han ta wuna zaba yɛla la zaba yelebibehi, da bahɛ ya ti ya paleŋa ɛgera, gee yele ana wan ba'ahum wa'am na gee dagi ba'ahegɔ saŋa la en bala.

⁸ Se'ere en sɔi la, timpaberɛ kayima nɛreba wan ihege tɛ' pɛɛma la timpaberɛ kayima nɛreba, ti Na'duma zabera la taaba, tinmiiŋo wan sige tihi zo'e zo'e zuo, ti kom pɛɛlega sige, gee ŋwana wa woo nan dela too la saŋa dɔgum pɔhega en nan bala.

Yezu pun tɔgɛ a namehegɔ yele

⁹ “Gee han dɛna yamam mɛhi, mini ya suŋa suŋa gee ba wan ta nyɔgɛ ya kiŋɛ yele gakereba la zi'an, ba wan ŋmɛ' ya zamehegɔ yiya la puan, ya wan ta ze'ele tihi na'kãreba la na'duma nɛŋan mam zuo, ti la dɛna sɛla en iŋɛ gã'a.

¹⁰ Gee faarɛ yelehum wa wan diŋɛ nɛŋa muulɛ paaɛ tihi woo.

¹¹ Ba han ta nyɔgɛ ya kiŋɛ yele gakereba zi'an da fabele ya, ya wan ta tɔgɛ se'em. Gee yeen yele ya se'ere woo n wa'am ya nuuren na sankaŋa puan la, se'ere en sɔi la, la dagi yamam n tɔgeri, gee la dela Fa'a Sia la.

¹² Suuɔ wan ta koohe suuɔ tihɛ ti ba ku en, ti sɔ me koohe bia tihɛ, kɔma wan zabɛ la ba dɔgereba ta bahɛ ti ba ku ba.

¹³ Nɛra woo wan ta yaaɛ ya yan dole mam la zuo. Gee fum se'em n ŋmibe ta paaɛ ba'ahegɔ, wan nyɛ faarɛ.

Sageŋɔ lɔkɔ

¹⁴ “Ya han ta nyɛ ti ba dikɛ galeŋɔ lɔkɔ la en tari sageŋɔ paaɛ la, ze'ele ze'sɛka ti ku ka suna ti ku zɛ'a la, (se'em woo n kãalɛ yele dina wa la bɔkɛ dɛ), bala ma'a la, sɛba woo en boi Yudiya zɔ zom zɔya la zuto.

¹⁵ Se'em woo en yage gɔhegɔ da sige kɛ̃' bɔ'en ti a dikɛ sɛla.

¹⁶ Se'em en boi va'am me da lebe kule yire ti a dikɛ fuo.

¹⁷ Yele boi pɔgepuuheduma la pɔgese'ehi en tari bilɛɛhɛ ti si mɔgera dabeha ana puan!

¹⁸ Pu'uhi ya mɛ ti yele dina da wa'am ɔɔrɔ saŋa na.

¹⁹ Se'ere en sɔi la, dabeha aŋa ta yeti ka dɛna la kumpiinɔ seto n ka tabelɛ bɔna Yinɛ n pi'ilum timpaberɛ wa maalegɔ na la, gee me pun kan le malum bɔna.

²⁰ Daana la han ka ŋmaaɛ ni dabeha aŋa girega, nɛrebeeleho ka boi n wan vo'e. Gee nɛresunduma la zuo, sɛba ti a mɛŋa looe la zuo, ti a ŋmaaɛ dabeha aŋa girega.

²¹ Sankana wa puan, nɛra han yele fum yeti bihɛ Kiresta boi ke bii a boi ke ha, da sakɛ ya.

²² Se'ere en sɔi la, Kiresta pumpã'aheduma la nɔtɔgehe pumparenduma wan ta wa'am na tuna pa'ahegɔ kirehi ti ba bahɛ ti nɛreba bɔregɛ. La han wan ta'am ni iŋɛ ni, ba wan pã'ahɛ ni sɛba ti Yinɛ pun looe la.

²³ Gee bihɛ ya ya mɛhi suŋa gee mam pun yele ya sɛla woo ti didaarɛ nan ka paaɛ.

Asaala Dayua lɛbega na

²⁴ “Gee dabeha aŋa puan, namehegɔ saŋa la han ta tole, wuntɛɛŋa wa wan lebege lika ti ŋmarega kan niiɛ

²⁵ ti ŋmarebibehi wan ze'ele saazuo luta na, ti pahi se'ehi en boi zuo ha wan gbirege.

²⁶ Bala ma'a la, nɛreba nyaa wan nyɛ ti Asaala Dayua la boi la sagbama puan kina na la paŋa en ka tari makerɛ la suŋa.

²⁷ A nyaa wan tum a suŋereba ti ba doohe timpaberɛ wa zuo luga anaahi la za'a lagehɛ nɛresɛba woo ti a lugehe ba la, ze'ele timpaberɛ wa tɛka beene ta paaɛ zuo ha.

Kinkaŋa yɛm zamehegɔ

²⁸ “Bala, zamehi ya yɛm kinkaŋa puan. Kinkaŋa han ta tara yilipaala, pɔhɛ puhera vɔpaala, ya mi' ti siiɔ pɔri.

²⁹ Bala me, ti ya han ta nyɛta ti yele ana iti, ya mina ti n pɔri na, n kɔ'ɔm bɔna la ya kuleŋa nuuren.

³⁰ N yeti ya la yelemɛŋerɛ wa, sankana nɛreba wa kan ki ba'ahɛ gee ti yele ana wa'am na tole.

³¹ Saazuo la timpaberɛ wan tole gee mam yelehum wa la bu fii me kan malum tole.

Se'em ka mi' dabeherɛ la bii saŋa la

³² “Gee han dɛna dabeherɛ la bii saŋa la, nɛra nɛra ka mi'. Suŋereba n pun bɔna saazuo ha ka mi' bii Dayua la, gee Sɔ la ma'a n mi'.

³³ Mini ya, gee maahum ya, se'ere en sɔi la, ya ka mi' saŋa la n ye' se'em ma'a na.

³⁴ La yeti la ta ana mɛ wuu nɛra n ye' sore gee dikɛ a yire gu'ule a yamehi, bo' nɛra woo la a tuunɛ a tuunɛ gee yele zanɔgura ti a biha yire la suŋa suŋa.

³⁵ Dinɛ zuo la, da gihere ya, se'ere en sɔi la, ya ka mi' sansɛka ti yire daana la wan wa'am na, zaanuurɛ, yu'uŋɔ, nɔdɔɔ kaahega bii bulika,

³⁶ han dagena bala, ya wan ta giha ti a wa'am na di'e ya.

³⁷ Mam yeti ya se'ere wa bala mɛa ti n yɛta bɔ'ɔra nɛra woo, Biheri ya.”