Amarkɩ 11 - ZE'ELEGO PAALEGA

Yezu nyaŋerɛ Yerusalɛm kɛ̃'a

¹ Ban ta pɔra Yerusalɛm, nan bɔna Bɛtefege la Bɛtani tihi, lɛm la Olive zoore la, ti a tum a zahereba bayi',

² yele ba yeti, “Kiŋɛ ya timbila wa en boi ya nɛŋan ha wa puan, ya han ta kɔ'ɔm kɛ̃'ɛ̃ra timpaberɛ la puan, ya wan nyɛ ti bumbila lu' zɛ'a, ti nɛra ka tabelɛ ban ka, lorege ya ka na bo' mam.

³ Nɛra han soke ya yeti, ‘Ŋwani ti ya ita bala?’ Yeen yele en yeti, ‘Daana la n boti ka, gee ba wan tari ka lebe kalam na!’ ”

⁴ Ti ba kiŋɛ ta nyɛ ti bumbila ti ka lu' zɛ'a zanɔren samanɛ zuo. Ba n boi bini lɔregera buŋa wa la,

⁵ ti sɛba n ze' gee nyɛ la basɛba soke ba yeti, “Beni ti ya ita bala, ya loregere la buŋa la?”

⁶ Ti Yezu zahereba la yele nɛreba la Yezu n yele ba se'em la, ti nɛreba la bo' sore ti ba tari buŋa la kiŋɛ.

⁷ Ba tari buŋa la wa'am na bo' Yezu, gee digehɛ ba futo pagelɛ buŋa la zuo, ti Yezu zom yagelɛ ka zuo.

⁸ Ti Nɛreba zo'e zo'e tara ba futo yarena sore la zuo, ti sɛba me aahum tiihi vɔtɔ seto woo ti ba nyɛ me tari (na yarena timpaberɛ) ti Yezu nɛ tɔla.

⁹ Ti sɛba n boi nɛŋa, la sɛba n boi pooren la woo vɔɔla yeti, “Hozaana! Sum bɔna la fum se'em n dikɛ Daana wa yu'urɛ wa'am na!

¹⁰ Sum bɔna la tu sɔyaaba Deviti sɔ'ɔlum la n wa'am na la! Hozaana dɛna saa zuin zuin ha dinɛ!”

¹¹ Ti Yezu paaɛ Yerusalɛm timpaberɛ, kiŋɛ ta kɛ̃' pu'uhegɔ yire la puan, bihɛ sɛla woo kaaɛ. Bala ma'a ti yinɛ pun lu mɛ. Ti a yehe la a zahereba pia la bayi', kiŋɛ Bɛtani Tiŋa.

Yezu pɔ bahɛ kinkaŋa zuo

¹² Yiimbeere, ban ze'ele Bɛtani timpaberɛ lebe na la, ti kom tara Yezu.

¹³ Ti a bihɛ nyɛ ti kinkaŋa ze' zaaɛ zaarɛ ha la vuurɔ vipi, ti a yɛ'ɛha ka timpaberɛ ti a bihɛ a wan nyɛ sɛla ka zuo. Gee n paaɛ la, a ka nyɛ sɛla ka zuo han dagena vɔtɔ ma'a, se'ere en sɔi la, la dagi mu'uro waŋa saŋa.

¹⁴ Ti a yele kinkaŋa la yeti, “Nɛra kan malum di mu'uro fum zuo yɛ'ɛha.” Ti a zahereba la wum n yele se'em la.

Yezu la leebeduma

¹⁵ Ti ba wa'am na paaɛ Yerusalɛm, kɛ̃' pu'uhegɔ yire la puan. Ti Yezu pɔhɛ sa'aha sɛba n koohe la sɛba n da'ari lɔgerɔ pu'uhegɔ yire la puan la, a tulege Ligetɛɛhereba teebula kpabɛ gee lobe sɛba n zi' kɔɔha dayɛma la kugehi bahɛ.

¹⁶ Gee gu' ti se'em da zɛ' lɔkɔ doohe pu'uhegɔ yire la puan tole.

¹⁷ Ti a nyaa pa'ala nɛreba la yɛta yeti, “La ka gulehɛ biŋe yeti, ‘Mam yire wa wan dinɛ la pu'uhegɔ yire bo' tihi woo’? Gee ti yamam dikɛ dɛ lebege fãareba zi'an.”

¹⁸ Gee Malema kiinduma la gɔnmi'ineba la n wum ŋwana la, ba mu'ɛ la nini ɛɛra ban wan iŋɛ se'em ku en, gee ti dabeem me tara ba. Se'ere en sɔi la, la iŋɛ nɛreba la za'a la pakerɛ paaɛ paaɛ la a pa'alegɔ la.

¹⁹ Ti yinɛ ma'ɛ, ti Yezu la a zahereba la bahɛ timpaberɛ la puan.

Yɛm sebo n boi kinkaŋa la kum puan

²⁰ Bulika ti ba yɛ'ɛha tɔla la, ba nyɛ ti kinkaŋa la ko'ɛ mɛ ta paaɛ ka nyɛga.

²¹ Ti Pita tiɛ nyaa yele Yezu yeti, “Pa'ala, bihɛ! Kinkaŋa la ti fum pɔ bahɛ ka zuo la ki mɛ.”

²² Yezu lerege ba yeti, “Tari ya sakerɛ la Yinɛ.

²³ N yeti ya la yelemɛŋerɛ, ya han yele zoore wa yeti, ihege ka'lam, ta lu ateko wa puan, gee ka bu'ura ya suya puan, gee nam ti fum yele se'ere la wan tum, la sirum wan wa'am na tum.

²⁴ Bala, n yeti ya mɛ ti sɛla woo ti ya suhɛ pu'uhegɔ puan, nam ya ti ya to'e ya, ti wan dɛna ya dinɛ.

²⁵ “Fum han ni yeti fum pu'uhɛ gee tara la se'ere la se'em di sugeri bo' en. Bala ti fum Sɔ la en boi saazuo la me wan di fum sugeri bo' fum me tuure.” [

²⁶ Ya han ka di sugeri bo' ya taaba, ya Sɔ la me kan di sugeri bo' ya.]

Ba sokere Yezu kpe'eŋo yele

²⁷ Ti Yezu la a zahereba la le wa'am Yerusalɛm na. Ti Yezu n ye' kɛ̃'ɛ̃ra pu'uhegɔ yire puan la, ti Malema kiinduma la gɔnmi'ineba la, la pu'uhegɔ yire kiinduma wa'am Yezu zi'an na,

²⁸ yele en yeti, “Beni kpe'eŋo ti fum tara tuna kirehi sina wa za'a? Ani n bo' fum sore ti fum tuna yele ana wa?”

²⁹ Yezu yele ba yeti, “N wan soke ya sokere deyima ti ya me lerege mam, ti mam me yele ya kpe'eŋo seko ti n tara tuna yele ana wa.

³⁰ Yɔn ko'om sua la ze'ele la saazuo na bii asaala puti'irɛ? Yele ya mam na.”

³¹ Ti ba nan lebe ta ŋmɛ'ɛra nɔkpɛ'ɛma la taaba yeti, “Tu han yeti, ‘la ze'ele la saazuo na, a wan yele tu yeti ŋwani ti tu ka sakɛ bo' Yɔn?’

³² Gee tu me kan ta'am yeti, ‘Bu dela asaala puti'irɛ.” Dabeem n tari ba la nɛrekuuŋɔ la se'ere en sɔi la, nɛrekuuŋɔ la woo sakɛ ti Yɔn dela Yinɛ nɔtɔgeha yelemɛŋerɛ.

³³ Bala ti ba lerege Yezu yeti, “Tu ka mi'.” Ti Yezu yele ba yeti, “Mam me kan yele ya kpe'eŋo seko ti mam tara tuna kirehi wa.”