Amarkɩ 10 - ZE'ELEGO PAALEGA

Pɔgelebehego

¹ Yezu bahɛ bilam mɛ, gee kiŋɛ Yudiya sɔ'ɔlum puan ta tole tinse'ehi n boi Yɔɔdan yakenɛ ha la. Ti nɛrekuuŋɔ lagehɛ kaaɛ en. Ti a pa'ala wuu en ni pun ita se'em la.

² Ti Farasiiduma basɛba wa'am a zi'an na ti ba makɛ en bihɛ, nyaa soke en yeti, “La de sore ti buraa bahɛ a pɔga?”

³ Ti a lerege ba yeti, Moose nɔze'elego la puan yeti bu?

⁴ Ti ba yeti, “Moose nɔze'elego la puan bo' sore ti buraa gulehɛ pɔgelebehego gɔŋɔ bo' pɔka la gee nyaa ta'am lebehe ka.”

⁵ Ti Yezu lebehe yele ba yeti, “Ya sukãberɛ la zuo ti a gulehɛ nɔze'elego kuna wa bo' ya.

⁶ Gee pi'ileŋo puan na la, Yinɛ naam ba la buraa la pɔka.

⁷ ‘Dina wa zuo, buraa wan bahɛ ka sɔ la ka ma, gee dikɛ ka mɛŋa naaɛ la ka pɔga,

⁸ ti ba bayi' la lebege inganɛ deyima. Ba ka le dɛna nɛreba bayi' gee ba nyaa dela inganɛ deyima.

⁹ Bala zuo la, sɛla ti Yinɛ dikɛ lagum taaba, se'em de yelege.”

¹⁰ Ti ba ta bɔna yire, ti a zahereba la le soke en yele wa.

¹¹ A yele ba yeti, “Se'em woo lebehe a pɔga gee tee di kayima tum la kabohi baha pɔgesɛka ti a bahɛ yia la zuo.

¹² Pɔka me han bahɛ ka asira gee tee ele buraa kayima, pɔka la me tum la kabohi.”

Yezu purɛ sum bahɛ kɔmbibehi zuo

¹³ Ti nɛreba tara ba kɔmbibehi kina Yezu zi'an na, ti a dikɛ a nu'o pagelɛ ba zuo, ti a zahereba la tahera ba la ninmu'urɛ.

¹⁴ Gee Yezu en nyɛ ŋwana la, a suure n nyiie, ti a yele ba yeti, “Bahɛ ya ti kɔmbibehi wa wa'am n zi'an na. Da gu'uri ya ba. Se'ere en sɔi la,Yinɛ sɔ'ɔlum la dela nɛreba n ani wuu kɔmbibehi wa dinɛ.

¹⁵ N yeti ya la yelemɛŋerɛ ti fum se'em ka to'e Yinɛ sɔ'ɔlum la wuu bia la, kan malum kɛ̃' bini.”

¹⁶ Gee nyaa kɔkɛ kɔma la, gee dikɛ a nu'uhi pagelɛ ba zuto kaaɛ, Purɛ sum bahɛ ba zuto.

Buntata

¹⁷ Yezu bahɛ bilam mɛ, gee bɔna sore zuo yɛ'ɛha, ti buraa zɔ paaɛ en, kpa duma a nɛŋan, soke en yeti, “Pa'alesunkɔ, beni en de n iŋɛ la n ta'am nyɛ vom kamba'ahɛ wa?”

¹⁸ Ti Yezu yele en yeti, “Ŋwani ti fum yi'ira mam nɛresunkɔ? Nɛra ka boi dɛna sunkɔ han dagena Yinɛ ma'a.

¹⁹ Fum mi' nɔze'elego la, ‘Da ku nɛra, da tum kabohi, da zu, da dɛna pumparema aze'nyɛdaana, da fã nɛra sɛla, na'aha fum sɔ la fum ma.’ ”

²⁰ Ti buraa la yele en yeti, “Pa'ala, mam pun dɔla yele ana za'a mɛ ninmu'urɛ n biilemen na.

²¹ Ti Yezu bihɛ en, ti a suure kɛ̃' en, ti a yele en yeti, la gee la yele deyina ma'a ti fum iŋɛ, kiŋɛ ta koohe sɛlawoo ti fum tara la, gee dikɛ ligeri la bo' naheduma, gee fum wan nyɛ lɔgerɔ saazuo ha. Fum han iŋɛ bala, fum nyaa wa'am na dɔla mam.”

²² Buraa wa n wum ŋwana la, la kɔ'ɔhɛ la a giila paaɛ paaɛ, ti a kiŋɛ la susageŋɔ paaɛ paaɛ, se'ere en sɔi la, a lɔgerɔ la ba' zo'e mɛ.

²³ Ti Yezu bihɛ nɛrekuuŋɔ la kaaɛ gee yele a zahereba la yeti, “Bihɛ la kpe'em se'em ti buntateba ta kɛ̃' Yinɛ sɔ'ɔlum la puan!”

²⁴ Ti a zahereba la ya' nuurɛ la yetɔgebuna wa. Gee Yezu le yele ba yeti, “N kɔma, la kpe'em mɛ ti nɛra nyaŋɛ kɛ̃' Yinɛ sɔ'ɔlum la puan!

²⁵ La de naana bo' yugenɛ ti a doohe fupiho yoko puan tole, gana buntata ta'am kɛ̃' Yinɛ sɔ'ɔlum la puan.”

²⁶ Ti la ba' iŋɛ a zahereba la pakerɛ, ti ba sɔkera taaba yeti, ani yi wan nyɛ faarɛ?

²⁷ Ti Yezu bihɛ ba kaaɛ gee yeti, “Asaala zi'an ti la kpe'em gee dagi Yinɛ zi'an. Yinɛ zi'an sɛla ka boi kpe'em.”

²⁸ Ti Pita pɔhɛ yɛta en yeti, “Bihɛ, tumam bahɛ tu sɛla woo mɛ gee wa'am na dɔla fum.”

²⁹ Yezu yele ba yeti, “N yeti ya la yelemɛŋerɛ wa, nɛra ka boi bahɛ a yire, a suurɔ, a ma, a sɔ, bii a kɔma bii a timpaberɛ mam zuo la faarɛ yelehum wa zuo,

³⁰ gee kan nyɛ ba kɔbehi kɔbehi timpaberɛ wa zuo. A daana wan malum nyɛ yiya, suurɔ, maduma, kɔma, la vatɔ gee me nyɛ namehegɔ pa'ahɛ, gee ti ba'ahegɔ saŋa han ta paaɛ, a daana wan nyɛ vom kamba'ahɛ.

³¹ Gee ya mina suŋa ti a tole nɛŋa duma wan ta yee pooren ti a yee pooren ta tee tole nɛŋa.”

Yezu tɔgɛ a kum la a vo'ore pa'ahɛ butã

³² Ba boi la sore zuo yɛ'ɛha zɔna Yerusalɛm, ti a zahereba la ta bihɛ ti Yezu boi la ba nɛŋa ha, ti la iŋɛ ba pakerɛ, ti dabeem kɛ̃' sɛba me en dole ba la. Ti a tari a zahereba pia la bayi' la lebe kinkɛleŋa pɔhɛ yɛta ba le yɛ'ɛha sɛla en wan iŋɛ en.

³³ A yele ba yeti, “Biheri ya, tu ye' zɔna la Yerusalɛm wa, ba wan ta nyɔkɛ Asaala Dayua wa bo' malema nɛŋa duma, la gɔnmi'ineba la, ti ba gakɛ en ti a dela a ki. Gee nyaa dikɛ en bo' sɛba en dagi Yuuduma.

³⁴ Ti ba ɛregɛ en gee tubehɛ nɔtuurum ma' en, gee ŋmɛ' en, gee ku en. Gee dabeha atã daarɛ, a wan vo'e a kum la puan.”

Yemesi la Yɔn suhega

³⁵ Yemesi la Yɔn en de Zebedii dayɔɔhi la tole la nɛŋa na ze'ele Yezu nɛŋan yele en yeti, “Pa'ala, tu boti fum iŋɛ la sɛla woo ti tu wan yele fum wa bo' tu.”

³⁶ Ti a yele ba yeti, “Yamam boti n iŋɛ la bem bo' ya?”

³⁷ Ti ba lerege en yeti, “Tumam boti la fum han ta zi'a fum suŋa na'am gɔŋɔ la zuo, fum bahɛ ti tumam ayima ta zi'a fum zuɔ, ti ayima me zi'a fum gɔbega.”

³⁸ Ti Yezu lerege ba yeti, “Ya ka mi' sɛla ti ya sɔkera wa vuurɛ. Yamam wan ta'am nyu namehegɔ wanɛ se'ere puan ti mam yeti n nyu wa? Bii ya ta'am sɔ namehegɔ malema sua sɛka ti mam yeti n sɔ wa.”

³⁹ Ti ba lerege en yeti “Tu wan ta'am sɔ, ti Yezu yele ba yeti, ya sirum wan ta'am nyu namehegɔ wanɛ se'ere ti mam yeti n nyu wa, gee me wan sirum ta'am sɔ namehegɔ malema sua sɛka ti mam yeti n sɔ wa la,

⁴⁰ gee ya zi'ire mam zuɔ bii mam gɔbega nu'o bɔba, dagi mam n wan bo' ya sore, zɛ'sina dela ban maahum se biŋe sɛba la dinɛ.”

⁴¹ Yezu zahereba pia la n wum ŋwana la, ti ba suya pɔhɛ nyiira la Yemesi la Yɔn.

⁴² Bala ti Yezu yi' ba, yele ba yeti, “Ya mi' ti sɛba en dagi Yuuduma la puan, ba na'duma ni kɔ'ɔm dikɛ la ba mɛhi ɔ̃belɛ ba, ti sɛba me en de ba nɛrekãreba me tari ba vɛgena.

⁴³ Gee la ka ani bala yamam puan. Gee se'em woo n boti a dɛna ya nɛrekãtɛ, a daana lebege ya za'a yameŋa,

⁴⁴ ya puan se'em me han bɔta ti a dɛna ya nɛŋa daana, a daana lebege ya za'a da'aberɛ.

⁴⁵ Gee Asaala Dayua ka wa'am na ti ba tuna bɔ'ɔra en mɛ, gee a tugum tuna bɔ'ɔra nɛreba, pun ta dikɛ a vom kaabɛ faaɛ nɛreba zo'e zo'e bahɛ.”

Batimiyɔsi nini pikɛ ya

⁴⁶ Ba wa'am la Yeriko na. Ti Yezu la a zahereba, la nɛrekuuŋɔ la en ta bahera Yeriko la, ti Timiyɔsi dayua Batimiyɔsi en de fua suhera la en zi' sore la nuuren.

⁴⁷ En wum ti Yezu en yehe Nazareti na n ye' tɔla la, ti a pɔhɛ nyabera yeti, “Yezu, Deviti Dayua wa, zɔ n nimbu'ɔ!”

⁴⁸ Ti nɛreba zo'e zo'e tahɛ en la ninmu'urɛ yeti, go'e fum voole la. Ti a tugum voole gaŋɛ bala yeti, “Deviti Dayua wa, zɔ n nimbu'ɔ!”

⁴⁹ Ti Yezu teke su'u gee yeti, “Yi' ya en bo' mam na.” Ti ba yi' fua la yele yeti, bahɛ ti fum puurɛ pee, “Ihege, a yi'iri fum mɛ.”

⁵⁰ Bala ti a lobe fuwoko la ti a yɛ la bahɛ, gee vaaɛ ihege kiŋɛ paaɛ Yezu.

⁵¹ Ti Yezu soke en yeti, “Fum boti n iŋɛ la beni bo' fum?” Ti fua wa yele en yeti, “N pa'ala, bahɛ ti n nini wa pikɛ.”

⁵² Ti Yezu yele en yeti, “Kina, fum sakerɛ wa n tibɛ hɔ.” Bilam bilam ti buraa wa nini la pikɛ ti a nyaa dɔla Yezu sore la zuo.