Amarkɩ 1 - ZE'ELEGO PAALEGA

Yɔn ko'sɔɔra la muulegɔ

¹ Yezu Kiresta en de Yinɛ dayua la Faarɛ yelehum la pɔhega.

² La pɔhɛ mɛ wuu nɔtɔgeha Azaaya en gulehɛ se'em yeti: “Bihɛ, n tuni la bituneŋa ti a diŋɛ fum nɛŋa, se'em en wan maalɛ fum sore la.

³ A wan dɛna la kua sɛka en wan bɔna kpaahenɛ boi ha kaaha baheri na yeti, ‘Maalɛ ya Daana la sore la, bahɛ ya ti a sadɔtɔ la woo tiɛ.”

⁴ Yɔn ko'sɔɔra la wa niiɛ a mɛŋa la kpaahenɛ puan ha, muula suteere la yelebe'ero sugeri dia ko'om sua.

⁵ Ti nɛreba kekeko ze'ele Yudiya kinkɛlehi, la Yerusalɛm timpaberɛ, kina a zi'an, nyaa puta ba be'em gee ti a bɔ'ɔra ba ko'om sua Yɔɔdan kulaa la puan.

⁶ Yɔn yɛ la yugenɛ kɔberɔ fuo, dikɛ sɛganɛ lu' a sia, ti a dia dɛna sunwa'ara la seero.

⁷ A muulɛ yeti, “Se'em n kpe'em gana mam boi mam pooren kina na. Mam pɔ'ɛ gaŋɛ n zãla a tagera.

⁸ Mam sɔɔri ya mɛ la ko'om wa, gee eŋa wan ta sɔɔra ya mɛ la Fa'a Sia la.”

Yezu ko'om sua

⁹ Dabeha aŋa puan, ti Yezu yehe Nazareti n boi Galilii puan wa'am na ti Yɔn sɔ en Yɔɔdan kulaa puan.

¹⁰ En ze'ele ko'om la puan kɔ'ɔm dɔɔra na la, a nyɛ ti saazuo n yo'e, ti Sia la ana wuu dayene, sigera a zuo na.

¹¹ Ti kua ze'ele saazuo tɔgɛ bahɛ na yeti, “Fum en de mam Dayua, se'em ti n nɔŋɛ, ti n nini tigɛ la en.”

Sagena la makɛ Yezu bihɛ

¹² Ti bilam bilam ti Fa'a Sia la tari Yezu la paŋa kɛ̃' kpaahenɛ puan.

¹³ A boi kpaahenɛ la puan dabeha pinaahi, ti Sagena la makɛ en bihɛ. Ti a bɔna la muuen duhi, ti Yinɛ suŋereba gura en.

Yezu pɔhɛ a tuuma Galilii

¹⁴ Ban nyɔkɛ Yɔn pagɛ la, Yezu wa'am la Galilii na muula Yinɛ Faarɛ yelehum la

¹⁵ yeti, “Saŋa la paaɛ ya, Yinɛ sɔ'ɔlum la ka zaaɛ. Tee ya la ya sakɛ bo' Faarɛ yelehum la.”

Yezu yi' a yia zahereba

¹⁶ Yezu n dole Galilii Mɔgerɛ kaara la, a nyɛ la Simɔn la a suuɔ Anduru ti ba lɔbera yugehi mɔgerɛ la puan, se'ere en sɔi la ba dela zim nyɔgereba.

¹⁷ Ti Yezu yele ba yeti, dole ya mam ti n iŋɛ ya ti ya tara nɛreba kina na bɔ'ɔra mam.

¹⁸ Bilam bilam ti ba bahɛ ba yugehi la gee doohe a poore.

¹⁹ En kiŋɛ a nɛŋa fii la, a nyɛ ti Zebedii dayua Yemesi la a suuɔ Yɔn me boi ba uureŋɔ puan maala ba yugehi.

²⁰ Bilam bilam ti a yi' ba ti ba bahɛ ba sɔ Zebedii uureŋɔ la puan, la a tuntuneba la gee doohe en.

Buraa n tari Kulekpa'bɛ'a

²¹ Ba kiŋɛ la Kapɛnum, ti vo'ohego daarɛ paaɛ, ti a kiŋɛ ta kɛ̃' zamehegɔ yire puan ta pɔhɛ pa'alɛ.

²² Ti iŋɛ nɛreba la pakerɛ la a pa'alegɔ se'ere en sɔi la, a pa'alɛ ba mɛ wuu nɛra en tari kpe'eŋo la, gee dagi gɔnmi'ineba n pa'alɛ se'em la!

²³ Bala ma'a la ti zamehegɔ yire la puan, buraa en boi bini tara Kulekpa'bɛ'a,

²⁴ kaahɛ bahena yeti, “Fum tari la bem la tu, Yezu en yehe Nazareti na wa? Fum wa'am na ti fum sagum tu mɛ? Mam mi' fum n de se'em mɛ. Fum dela Fa'a Daana, ze'ele Yinɛ zi'an na.”

²⁵ Ti Yezu tahɛ en yeti, ŋmɛkɛ fum nuurɛ la, gee tole yehe!

²⁶ Ti Kulekpa'bɛ'a la bahɛ en ti a lu lige, gee kaahɛ la kɔkɛ'ɛŋa, gee nyaa yehe a puan na.

²⁷ Ti la iŋɛ ba za'a pakerɛ ti ba sɔkera taaba yeti, “Beni n ŋwana? Pa'alesaaŋa la kpe'eŋo! A bo' Kulekpa'bɛ'ɛhi la mɛ a nuurɛ, ti ba nam en.”

²⁸ Ti Yezu yu'urɛ to'e tinse'ehi en kaaɛ Galilii la za'a.

Yezu tibɛ Pita dɛɛma la nɛreba basɛba

²⁹ Yezu la a zahereba wa n kɔ'ɔm ze'ele zamehegɔ yire la yehe na la, ba kiŋɛ ta kɛ̃' la Simɔn la Anduru duma yire. Yezu, la Yemesi, la Yɔn.

³⁰ Sankana wa puan ti Simɔn dɛɛm pɔka ga' la bɔ'en la ɔɔrɔ, ti ba waaɛ Yezu kalam.

³¹ Ti Yezu wa'am na gurɛ pɔka la nu'o dooe ka zi'ire, bilam bilam ti ɔɔrɔ la bahɛ pɔka la, ti ka kiŋɛ ta tari ko'om wa'am na bo' ba.

³² Zaanuurɛ dinɛ mɛa, yintule n ta ana viie la, ti nɛreba tari bã'duma woo, la sɛba n tari Kulekpa'bɛ'ɛhi la wa'am Yezu zi'an na.

³³ Ti timpaberɛ la nɛreba za'a lagehɛ na zi'an yire la nayaŋa nuuren.

³⁴ Ti Yezu tibɛ nɛreba zo'e zo'e, sɛba n bɛ̃'ɛri bã'ahi yima yima, gee sa'ahɛ Kulekpa'bɛ'ɛhi zo'e zo'e nɛreba puan bahɛ. Gee ka bo' kulekpa'bɛ'ɛhi la sore ti si tɔgera, se'ere en sɔi la, si mi' en.

³⁵ Bulika, se'em ma'a ti la nam ana biin la, ti Yezu ihege yehe kiŋɛ kɛ̃' muuen ha ta pu'uhɛ.

³⁶ Ti Simɔn la a taaba la me mu'ɛ nini ɛɛra en.

³⁷ Ban nyɛ en la, ba yele en yeti bihɛ, Nɛra woo eere fum mɛ.

³⁸ Ti Yezu lerege ba yeti, bahɛ ya ti tu kiŋɛ ya tihi n boi ti kɔrɔmkɔrɔm wa ti n ta muulɛ yelehum la bilam me. Se'ere zuo ti mam yehe na en bala.

³⁹ Ti a doohe Galilii la za'a muula yelehum la ba zamehegɔ yiya la puan, gee sa'ahɛ Kulekpa'bɛ'ɛhi nɛreba puan.

Yezu tibɛ kunkone

⁴⁰ Ti kunkone wa'am a zi'an na, kpa' duma gee bɛlena en yeti, “Fum han bɔta, fum tibɛ mam.”

⁴¹ Ti la ve'e Yezu paaɛ paaɛ ti a tiɛ a nu'o kalum en, gee yele en yeti, “Mam boti, to'e fum tibegɔ.”

⁴² Bilam bilam ti a kunkom la bahɛ en ti a iŋa saalum.

⁴³ Ti Yezu kagɛ en gee bahɛ ti a kiŋɛ,

⁴⁴ Yezu yele en yeti, “Bihɛ suŋa, da yele nɛra nɛra. Gee tari fum mɛŋa ta pa'alɛ Malema daana la, gee bo' ban'an bahega bo'olum sebo ti Moose bo' nuurɛ ti ya bɔ'ɔra la, ti la dɛna yelese'ere n iŋɛ gã'a bo' ba.”

⁴⁵ Gee buraa wa yehe mɛ kɔ'ɔm muula fai zi'an woo ti la bahɛ ti Yezu ka le ta'na ɛɛra timpaberɛ puan yoo yoo, gee kiŋɛ ta kɛ̃'ɛ̃ra timpaberɛ la kinkɛlehi ti nɛreba la ze'ele zi'ihi yima yima kina a ze'a na.