Aluki 8 - ZE'ELEGO PAALEGA

Pɔgehi sise'ehi n dole Yezu

¹ Dina wa n tole ba'ahɛ la, ti Yezu dɔla tinkãra, la timbibehi puan muula gee tɔgera faarɛ yelehum la, n de Yinɛ sɔ'ɔlum yelehum la. Ti a zahereba pia la bayi' la bɔna la en,

² la pɔgehi sise'ehi ti Yezu tibɛ si kulekpa'bɛ'ɛhi, la bã'ahi la. Mɛɛri, ti ba yi'ira Mɛɛri Magedalin, se'em ti Yezu sa'ɛ kulekpa'bɛ'ɛhi siyopɔi a puan la,

³ Yowana, se'em sira en de Hɛrɔd tuntuna ti a yu'urɛ yi'ira Kuza la, la Suzaana, la pɔgehi sise'ehi kekeko n lagum tara ba lɔgerɔ suŋera Yezu la a zahereba la.

Kaara makerɛ

⁴ Nɛrekuuŋɔ n ta lagehɛ Yezu zi'an na la, ti nɛreba ze'ele tihi tihi wa'am a zi'an na la, ti a makɛ makerɛ bo' ba yeti,

⁵ “Kaara en yehe ti a ta burɛ a bumbuura. En buti la, ti bumbuura la i se'ehi zɔgɛ sore zuo, ti nɛreba niira ba zuo, ti niihe n ɛgeri wa'am na di ba.

⁶ Ti i se'ehi me lu taŋa zi'an, ti ban zo'ore na la, ba ki mɛ se'ere en sɔi la mu'uhegɔ ka boi tiŋa la zuo.

⁷ Ti i se'ehi me lu gu'uhi zi'an, ti gu'uhi la zo'e la ba na, kpãrɛ ba.

⁸ Ti i se'ehi me lu pu'uhegɔ zi'an, zo'e na, wam zuto kɔbehi.” Yezu n yeti ŋwana la, a yi' mɛ yeti, “Fum se'em n tari tuba n wan bahɛ ti a kɛleha.”

Makerɛ la vuurɛ

⁹ Ti Yezu zahereba la soke en makerɛ wa vuurɛ n de se'em.

¹⁰ Ti a yele ba yeti, “Han dɛna yamam, ba bo' yamam la bɔkerɛ ti ya mina Yinɛ sɔ'ɔlum la sugelum yɛla, gee basɛba, n tɔgeri la mageha bɔ'ɔra ba, ti ba ‘Bihera gee kan malum nyɛ, ba kɛleha gee kan malum bɔkɛ.’

Kaara la makerɛ la vuurɛ

¹¹ Makerɛ la vuurɛ n ŋwana. Bumbuura la dela Yinɛ yelehum la.

¹² Se'ehi n lu sore zuo la dela nɛre sɛba n wum yelehum la, gee ti Sagena la wa'am na dikɛ yelehum la ba suya la puan kiŋɛ, ti ba da ta'am nam yelehum la la ba nyɛ faarɛ.

¹³ Bumbuura se'ehi n lu taŋa zi'an la dela, nɛre sɛba n ni wum yelehum la, to'e bu la nyɛɛma. Gee ba ka ba' nyɛga, ba nam yelehum la la saŋa fii wa, gee makerɛ saŋa, ba ni lu mɛ.

¹⁴ Han dɛna sɛba en lu gu'uhi zi'an la, bamam dela, sɛba en wum yelehum la, gee ban kini la, tiŋa wa zuo vom yɛla, la tarega, la nyɛlum, n ni kpãrɛ ba, ti ba wala la ka bi'ira.

¹⁵ Gee han dɛna sɛba n lu pu'uhegɔ zi'an la, bamam dela, sɛba n ni wum yelehum la, gurɛ bu kankaŋi la yelemɛŋerɛ, la susunɛ, tara sugeri la ŋmibega ta wam wala.

Butolila

¹⁶ “Nɛra ka boi laŋɛ butolela dikɛ pi'ɔ vuge ka, bii dikɛ ka sugɛ gɔregɔ leŋen, gee ka sugele la ka sugelego zi'an, niira bɔ'ɔra se'em woo n kɛ̃'ɛ̃ri na.

¹⁷ Se'ere n sɔi la, sɛla ka boi pi' kan ta pilege, bii sɛla bɔna sugɛ ti nɛreba kan ta baŋɛ, bii kan ta niiɛ peelumen na.

¹⁸ Bala la, bihɛ fum mɛŋa suŋa la fum kelehe yɛla se'em. Se'ere n sɔi la, sɛba n pun tara zo'e la, bamam ti ba wan bo' pa'ahɛ, ti sɛba n pun ka tara la, sɛla ti ba ti'ihɛ ba tari la, ba wan to'e la ba zi'an.”

Yezu yelemɛŋerɛ buuri

¹⁹ Ti Yezu ma la a yibehi wa'am a zi'an na, gee nɛrekuuŋɔ la zuo, fole ka boi ti ba wan paaɛ en.

²⁰ Ti ba ta yele en yeti, “Fum ma la fum yibehi ze' yiŋa ha bɔta ti ba nyɛ hɔ.”

²¹ Gee Yezu yele ba yeti, “Mam ma, la mam yibehi dela sɛba n wum Yinɛ yelehum wa gee tara bu tuna.”

Yezu ma'ɛ kusebego

²² Daarɛ deyima ti Yezu zom uureŋɔ la a zahereba la, ti a yele ba yeti, “Bahɛ ya ti tu yakɛ ko'om wa ke ha bɔba ha.” Ti ba pɔhɛ yɛ'a,

²³ ti ban mɔni uureŋɔ la yɛ'a la, ti Yezu giha. Ti kusebego kiŋɔ lu ko'om la zuo, gbiregera, ti ko'om pita uureŋɔ la, ti ba bɔna nyɔ̃pɔ̃hega puan.

²⁴ Ti a zahereba la paaɛ a zi'an, niiɛ en gee kaaha yeti, “Daana, Daana, tu yeti tu ki mɛ.” Ti Yezu ihege ze'ele tahɛ kusebego la, la ko'mi'ihi la n gbiregeri la, ti ba za'a go'e suram ti sɛla woo ma'ɛ lɔge lɔge.

²⁵ Ti Yezu soke ba yeti, “Ya sakerɛ bɛɛ?” Ti dabeem tara ba, gee ti la me iŋɛ ba pakerɛ, ti ba yɛta taaba yeti, “Ani nyaa de en wa, ti kusebego, la ko'om nana en?”

Yezu sa'ahɛ kulekpa'bɛ'ɛhi Gerasene

²⁶ Ti ba wa'am na paaɛ Gerasene n boi Galilii nɛŋan ha.

²⁷ Yezu n ze'ele uureŋɔ la zuo kɔ'ɔm sige na ti a na'arɛ kɔ'ɔm tagelɛ tiŋa la, ti buraa n boi tiŋa la puan ti kulekpa'bɛ'ɛhi dɔla en, tu'uhɛ en. Buraa wa bahɛ futo yɛa ti la yuue mɛ, gee me ka kɛ̃'ɛ̃ra yire puan, gee a boi la yɔɔrɔ zuto ha.

²⁸ En nyɛ Yezu la, a lu mɛ a nɛŋan, gee kaahɛ la kɔkɛ'ɛŋa yeti, “Fum tari la bem la mam Yezu? Gaŋɛ Za'a Yinɛ Dayua wa? N beleni fum mɛ, da mugehe mam.”

²⁹ Se'ere en sɔi la, Yezu pun tahɛ kulekpa'bɛ'a la mɛ yeti, a tole yehe buraa la puan. (Saŋa zo'e zo'e ti kulekpa'bɛ'a wa ni zom buraa wa, ti nɛreba ni gurɛ ka, ba' ka nu'uhi la nama la bãhi, gee ka wan kɔ' ba za'a bahɛ, gee ti kulekpa'bɛ'a wa tari en ta bahɛ muuen ha.)

³⁰ Ti Yezu nyaa soke en yeti, “Fum yu'urɛ?” Ti a yeti, “Tu zo'e mɛ.” Se'ere en sɔi la kulekpa'bɛ'ɛhi la zo'e mɛ dɔla buraa wa.

³¹ Ti ba belum Yezu ti a da sa'ɛ ba bahɛ lika boko la puan.

³² Bala ma'a ti zoore la tilen ha, kurikuri zo'e zo'e n ze' bini ɔbera. Ti kulekpa'bɛ'ɛhi la belum Yezu ti a bo' ba sore ti ba kɛ̃ kurikuri la puan. Ti Yezu bo' ba sore.

³³ Ti kulekpa'bɛ'ɛhi la yehe buraa la puan na, ta kɛ̃ kurikuri la, ti bamam me zɔ zulege ha, ta lu ko'om la puan, yee ko'om la puan.

³⁴ Sɛba n guri kurikuri la n nyɛ ŋwana la, ba zɔ mɛ kiŋɛ tinkãra la timbibehi puan ta yele sɛla n iŋɛ la.

³⁵ Ti nɛreba yehe na ti ba bihɛ sɛla n iŋɛ la. Ban wa'am na paaɛ Yezu la, ba nyɛ ti buraa la ti kulekpa'bɛ'ɛhi la yehe ka zi'an la, zi' la Yezu nɛŋan, yɛ futo, dɛna a mɛŋa. Ti dabeem ke ba paaɛ paaɛ.

³⁶ Ti sɛba n boni gee nyɛ la nyaa yɛta bana la lan iŋɛ se'em ti buraa la ti kulekpa'bɛ'ɛhi dɔla ka la nyɛ ka tibegɔ.

³⁷ Ti nɛre sɛba woo n kaaɛ Gerasene la, n lagehɛ na la, ba za'a yele Yezu yeti, a bahɛ ba tiŋa la. Se'ere en sɔi la, dabeem kãtɛ n kɛ̃ ba. Bala ti Yezu lebe zom uureŋɔ lebe.

³⁸ Ti buraa sɛka ti kulekpa'bɛ'ɛhi la yehe ka puan la, belum Yezu ti, a bahɛ ti a doohe en, gee Yezu bahɛ en ti a kiŋɛ, gee yele en yeti,

³⁹ “Lebe kule fum yire, la fum ta yele Yinɛ n tum tuunkãtɛ se'ere bo' fum.” Ti buraa wa kiŋɛ, ta muulɛ kaaɛ tiŋa la za'a, Yezu n tum tuunkãtɛ se'ere taaba bo' en la.

Yezu vo'e pugela, gee tibɛ Pɔka

⁴⁰ Yezu n lebe ta paaɛ la, ti nɛrekuuŋɔ tu'uhɛ en na, se'ere n sɔi la, ba pun guri ni en mɛ.

⁴¹ Bilam bilam ti buraa yu'urɛ n yi'iri Yaruse, dɛna nɛŋadaana zamehegɔ yire puan n bala paaɛ na. Lu Yezu nama tiŋa, gee belum en ti a wa'am a yire na,

⁴² se'ere n sɔi la, a tari la poyua kayima ma'a n de woo yuumpia la ayi', n kɔ'ɔm yɛ'a kum. Yezu n ye' la, ti nɛrekuuŋɔ la mikera za'ara en na.

⁴³ Bala ma'a la ti pɔka n bɔna bini ti ka ziim kɔ'ɔm ka'aha yuuma pia la ayi'. Ti ka dikɛ ka lɔgerɔ za'a doohe tibeduma, gee ba se'em ka nyaŋɛ tibɛ en.

⁴⁴ Ti pɔka wa firegɛ na paaɛ Yezu pooren, kalum Yezu fuo la tiŋa, ti bilam bilam ti ka ziim la ŋmaaɛ.

⁴⁵ Ti Yezu soke yeti, “Ani n kalum mam wa?” Ti nɛra woo n ta yeti ba ka mi' la, ti Pita yeti, “Daana, nɛrekuuŋɔ wa n mikere fum wa, pun za'ara luta la fum zuo na.”

⁴⁶ Gee Yezu yeti, “Aayi, nɛra n kalum mam. Mam baŋɛ ti paŋa n ze'ele n puan yehe.”

⁴⁷ Pɔka wa en ta bihɛ ti a kan ta'am sugɛ la, ti a yehe na, gee gbi'ira, lu tiŋa Yezu nɛŋan, gee muulɛ nɛrekuuŋɔ la za'a nɛŋan, se'ere zuo ti eŋa kalum en, la eŋa n nyɛ a tibegɔ bilam bilam se'em.

⁴⁸ Ti Yezu yele en yeti, “N poyua, fum sakerɛ en bahɛ ti fum nyɛ fum tibegɔ wa. Kina la suma'ahum.”

⁴⁹ Yezu n boi bini tɔgera la, ti nɛra ayima n bala ze'ele Kpɛ'ɛma la yire paara na, ti a yele kpɛ'ɛma la yeti, “Fum poyua la pun bahɛ tu mɛ, da dagum daam pa'ala la le yɛ'ɛha.”

⁵⁰ Yezu n wum ŋwana la, a yele kpɛ'ɛma la yeti, “Da zɔ dabeem. Yeen sakɛ, gee fum poyua la wan vo'e.”

⁵¹ Yezu n wa'am na paaɛ yire la puan la, a ka bahɛ ti se'em doohe en kɛ̃ yire la puan, han dagena Pita, Yɔn, Yemesi, la bia la sɔ la ka ma ma'a.

⁵² Ti nɛra woo kɛla gee fabela bɔ'ɔra bia la. Gee Yezu yele ba yeti, “Da kele ya gee bia la ka ki, ka gihere mɛ.”

⁵³ Ti nɛreba la la'ara en, se'ere n sɔi la, bamam mi' ti bia la ki mɛ.

⁵⁴ Gee Yezu paaɛ mɛ gi' bia la nu'o, gee yi' en yeti, “Bia wa, ihege.”

⁵⁵ Ti bia la sia lebe kɛ̃ ka puan, ti ka vaaɛ ihege buyina. Ti Yezu yele ba ti ba bo' bia la sɛla ti ka di.

⁵⁶ Ti la iŋɛ bia la dɔgereba la pakerɛ paaɛ paaɛ, gee ti Yezu yele ba yeti ba da yele nɛra nɛra sɛla n iŋɛ la.