Aluki 7 - ZE'ELEGO PAALEGA

Yezu tibɛ pɛntiira yameŋa

¹ Yezu n tɔgɛ yele ana woo nɛreba la tuban ba'ahɛ la, a kiŋɛ la Kapɛnum.

² Bilam ti pɛntiira en biheri pɛntiireba kɔbega tara a da'aberɛ en tari tuulum bo' en ti de bɛ̃'ɛra yɛ'a kum.

³ En ta wum Yezu yele la, a tum la Yuuduma kiinduma basɛba a zi'an ti ba ta belum en ti a wa'am na tibɛ a da'aberɛ la.

⁴ Ban wa'am na paaɛ Yezu zi'an la, ba belum en la ninmu'urɛ yeti, “Nɛra la nari mɛ ti fum tum yele dina bo' en.

⁵ Se'ere en sɔi la, a nɔŋɛ tu tiŋa wa mɛ, eŋa n mɛ zamehegɔ yire bo' tu.”

⁶ Ti Yezu dɔla ba yɛ'a buraa la yire, gee ban ta pɔra buraa la yire la, ti pɛntiira en biheri pɛntiireba kɔbega wa tum a zɔduma ti ba tu'uhɛ Yezu sore zuo na yele en yeti, “Daana, da dagum daam fum mɛŋa yɛ'a mam yire na, gee mam ka nari fum wa'am n yire na.

⁷ Bala zuo ti mam ka ti'ihɛ ti n wa'am fum nɛŋan na n mɛŋa. Fum yeen tum fum yelehum la ma'a bahɛ na, gee mam dabeherɛ wa wan iŋɛ sum.

⁸ Se'ere en sɔi la, mam me dela se'em ti ba bo' mam kpe'eŋo, ti n sɔna pɛntiireba bihera. N han yele ba ayima yeti, ‘Kiŋɛ,’ a ye' mɛ. N han yele ayima me yeti, ‘Wa'ana,’ a ye' me na. N han yele n da'aberɛ yeti, ‘Iŋɛ ŋwana,’ da'aberɛ la iti mɛ.”

⁹ Yezu n wum ŋwana la, la iŋɛ en la pakerɛ la buraa la, ti a ŋmɛregɛ tɔ nɛrekuuŋɔ la n dole en la yeti, “N yeti ya me wa, ti Izirale puan me, mam ka nyɛ sakerɛ kãtɛ dina taaba.”

¹⁰ Kpɛ'ɛma wa n tum burase'ehi na la en lebe ta paara yire la, ba nyɛ ti da'aberɛ la de a mɛŋa.

Yezu vo'e pokuurɛ bia Nain tiŋa

¹¹ Ŋwana n tole la, ti Yezu ta kiŋɛ tiŋa n yi'iri Nain, ti a zahereba la, la nɛrekuuŋɔ zo'e zo'e doohe en.

¹² Bihɛ, en ta pɔra tiŋa la nayaŋa la, ti buraa n ki, ti ba ziira yɛhera. Buraa wa dela ka ma bia za'a za'a n bala, ti pɔka wa me dɛna pokuurɛ. Ti nɛreba kekeko yehe tiŋa la puan lagum bɔna la pɔka wa.

¹³ Daana la n nyɛ en la, a zɔ la a nimbu'ɔ, gee yele en yeti, “Da kɛla.”

¹⁴ Gee tole nɛŋa na, paaɛ kalum suŋɔ la, ti bayaahi la teke ze'ele. Ti Yezu yeti, “Budibe paalega wa, N yeti fum ti fum ihege.”

¹⁵ Ti budibela wa n ki la, ihege zi'ire, pɔhɛ tɔgera, ti Yezu dikɛ en bo' a ma la.

¹⁶ Ti dabeem kɛ̃ nɛra woo, ti ba dikɛ pɛka bo' Yinɛ yeti, “Yinɛ nɔtɔgeha kãtɛ n boi la tɔ.” Gee le yeti, “Yinɛ n kaaɛ a nɛreba wa bihɛ!”

¹⁷ Ti Yezu yeledina wa to'e Yuda, la tinse'ehi woo n lɛm la puan za'a.

Yɔn tum a nɛreba na

¹⁸ Ti Yɔn zahereba tari yele ana za'a ta yele Yɔn. Ti Yɔn yi' a zahereba bayi' na,

¹⁹ tum ba Daana zi'an, ti ba ta soke en yeti, “Fum n de se'em n wan wa'am na la bii, tu gura ayima ha?”

²⁰ Buraahi la n wa'am na paaɛ Yezu zi'an la, ba yele en yeti, “Yɔn ko'sɔɔra la n tum tɔ fum zi'an na, ti tu wa'am na soke fum yeti, ‘Fum de se'em n wan wa'am na la bii, tu gura ayima me ha?’ ”

²¹ Bala ma'a la ti Yezu nan kɔ'ɔm tibɛ la nɛreba kekeko bã'ahi, too, sa'ahɛ kulekpa'bɛ'ɛhi, gee pigehɛ fɔɔhi kekeko nini.

²² Bala ti a yele buraahi wa yeti, “Ta yele ya Yɔn, yan nyɛ sɛla, la yan wum sɛla. Fɔɔhi nini pigehɛ mɛ, ti kɔɔrenɔ ihege kina, ti kunkɔma insageŋɔ bahɛ, ti wahi wuna, ti kum vo'e, ti tarenduma wum faarɛ yelehum la.

²³ Sum boi mɛ la se'em daana n ka piti luta mam zuo.”

²⁴ Yɔn bitunehi la n tole la, ti Yezu pɔhɛ tɔgera Yɔn yele bɔ'ɔra nɛrekuuŋɔ la yeti, “Beni ti ya daa ni yehe kiŋɛ muɔ la puan ti ya ta bihɛ? Muɔ ti sabeeo tara vɛgelena?

²⁵ Beni ti ya daa ni yehe kiŋɛ ti ya ta bihɛ? Nɛra n bagɛ banaahi? Bihɛ ya, sɛba n bagerɛ banaahi gee bɔna na'am puan kɛ̃'ɛ̃ri la na'am yiya puan.

²⁶ Beni ti ya nyaa daa ni yehe kɛ̃ muɔ la puan ha ti ya bihɛ? Nɔtɔgeha? Ɛ̃ɛ, N yi yele ya yeti, a dela se'em n gani nɔtɔgeha.

²⁷ Eŋa n bala ti ba gulehɛ a yele yeti, ‘Bihɛ, n tuni la n bituneŋa, ti ka diŋɛ fum nɛŋa na la, se'em n wan wa'am na maahum fum sore biŋe fum la.’

²⁸ N yeti ya me wa, ti pɔka en dɔgɛ saaleba woo puan, nɛra ka boi gana Yɔn, gee la bala za'a, se'em n de bia Yinɛ sɔ'ɔlum la puan la, gani en mɛ.”

²⁹ (Ti sɛba woo n wum yelehum wa la, ta ta' la sɛba n to'ohe kuba la, baŋɛ Yinɛ buurɔ la mɛ, beni zuo, bamam n daa sakɛ to'e Yɔn ko'om sua la.

³⁰ Gee Farasiiduma la, la yetɔge tɔgereba n ka sakɛ ti Yɔn sɔ ba ko'om la, zagehɛ la Yinɛ n tari se'ere bɔ'ɔra ba la.)

³¹ “Beni ti mam wan ta'am dikɛ zina beere nɛreba wa makɛ? Ba ŋwani mɛ la beni?

³² Ba ani me wuu kɔma n zi' da'a puan gee yi'ira taaba yeti, ‘Tumam peebe la yia bahɛ hɔ, gee fum ka wa' Tumam fabele mɛ, gee ti fum ka kele.’

³³ Se'ere n sɔi la, Yɔn ko'sɔɔra la wa'am me na, Ka dita dia, ka nyuura, daam ti ya yeti, ‘A tari la kulekpa'bɛ'a.’

³⁴ Ti mam Asaala Dayua wa wa'am na, dita gee nyuura, ti ya yeti, ‘Bihɛ, a dela diiha la dabugera. Nyɔgera zɔtɔ la sɛba n to'ohe kuba, la be'em duma!’

³⁵ Gee la kan dɛna bala. Yɛm kɔma vom n wan bo' en buurɔ.”

Yezu di sugeri bo' be'em pɔka

³⁶ Farasii ayima n yi' Yezu ti a wa'am na yire na di la en. Ti Yezu kiŋɛ Farasii la yire, ti ba zi'ire dɛla taaba dia saŋa la.

³⁷ Ti pɔka n boi tiŋa la puan dɛna be'em daana, baŋɛ ti Yezu boi Farasii la yire ti a di, me tari a kaam n tari nyuuŋo suŋɔ la lila ti ba dikɛ kuga suma maalɛ mɛ'ɛ na.

³⁸ Paaɛ na zɛ'a a pooren kɛla, ti a nintam zɔgera a nama zuo, ma'alɛ a nama, ti a dɔbelɛ tiŋa dikɛ a zuo zonto duuhe a nama la, gee mɔgera a nama, gee tara kaam la sɔ̃ɔra Yezu nama la.

³⁹ Farasii sɛka n yi' Yezu wa'am a yire na la n nyɛ ŋwana la, a yele a mɛŋa yeti, “Buraa wa han deni nɔtɔgeha, a wan baŋɛ ni pɔka wa n de se'em, la en de pɔgesɛka taaba kalena en wa. A wan baŋɛ ni ti ka dela be'em daana.”

⁴⁰ Ti Yezu tɔgɛ bahɛ na yeti, “Simɔn, mam tari la se'ere ti n yele fum.” Ti Simɔn lerege yeti, “Pa'ala, yele mam na.”

⁴¹ “Lige pɛmeha ayima ti nɛreba bayi' tara a sanɛ. Ayima peŋe la dinaari kɔbehi pihinuu, ti ayima me peŋe dinaari pihinuu.

⁴² Ti ba za'a n ta koŋe ba yɔ la, ti lige pɛmeha la bahɛ bo' ba zaŋa. Ba ini n wan nɔŋɛ lige pɛmeha wa gaŋɛ za'a?”

⁴³ Ti Simɔn lerege yeti, “Mam ti'ihɛ ti se'em sanɛ n ba' zo'e gaŋɛ la.” Ti Yezu yele en yeti, “Fum kɔ'ɔm lerege la ma'a.”

⁴⁴ Gee nyaa ŋmɛregɛ tɔ pɔka la, gee yele Simɔn yeti, “Fum nyɛ pɔka wa? Mam kɛ̃ fum yire wa na la, fum ka bo' mam ko'om ti n pee n nama, eŋa n pee mam nama wa la a nintam, duuhe la a zonto.

⁴⁵ Fum ka mɔgɛ mam gee mam kɛ̃ na daarɛ, ka go'e mam nama mɔka.

⁴⁶ Fum ka so' mam zuo la kaam, gee kaŋa n so' mam nama la tuulum kaam.

⁴⁷ Bala zuo, n yele fum ti, pɔka wa be'em la n zo'e se'em la, n bahɛ bo' n, bala zuo ti ka pa'ala nɔŋerɛ kãtɛ la wa. Gee fum se'em be'em n ka zo'e ti ba bahɛ bo' fum, fum daana nɔŋerɛ ani la fii wa.”

⁴⁸ Gee nyaa yele pɔka la yeti, “ Fum be'em la bahɛ bo' fum.”

⁴⁹ Ti sɛba n lagum zi'a dɛla taaba dia saŋa la la pɔhɛ nyɔna ba suya puan yeti, “Ani n de ena pun baha nɛra be'em bahɛ?”

⁵⁰ Ti Yezu yele pɔka la yeti, “Kina, fum sakerɛ n faaɛ fum bahɛ, kina la suma'ahum.”