Aluki 5 - ZE'ELEGO PAALEGA

Yezu yi' a yia zahereba

¹ Saŋa kayima ti Yezu zɛ'a lɛm Genesarete ateko la ti nɛrekuuŋɔ mike za'ara en na ti ba wum Yinɛ yelehum la,

² ti Yezu nyɛ ti uurenɔ tuyi' boi mɔgerɛ la ko'om la nɔgbene. Bala ma'a ti zim nyɔgereba la bahɛ uurenɔ la mɛ, gee pɛɛra ba yugehi.

³ Ti Yezu zom uureŋɔ la kuyima n de Simɔn dinɛ, gee nyaa yele Simɔn yeti, za'ɛ uureŋɔ wa ti ku kiŋɛ nɛŋa fii ha. Ti a nyaa zi'a uureŋɔ la zuo gee pa'ala nɛrekuuŋɔ la.

⁴ En tɔgɛ ba'ahɛ la, a yele Simɔn yeti, “Za'ɛ fum uureŋɔ la bahɛ ko'kɔ'ɔlum la ha, lobe fum yuka la bilam, gee fum wan nyɔgɛ zim.”

⁵ Ti Simɔn yele en yeti, “Naa, tumam zaam tum la bala yu'uŋɔ na, gee ka nyɔkɛ la biileŋa me, gee fum han yele bala, n wan lobe yuka la.”

⁶ Ban iŋɛ bala la, ba nyɔgɛ la zim zo'e zo'e, ti ba yuka la pɔhɛ aaheŋɔ.

⁷ Ti ba nyaa yi' ba taaba n me boi ba uureŋɔ puan ti ba wa'am na suŋɛ ba, ti ba wa'am na pirɛ uurenɔ tuyi' la za'a, ti uurenɔ la pɔhɛ muhera.

⁸ Gee Simɔn Pita n nyɛ ŋwana la, a lu la Yezu nama tiŋa yɛta ti, “Kiŋɛ gee bahɛ mam n Daana, mam dela be'em Daana.”

⁹ Se'ere en sɔi la, Pita la sɛba woo n boi la en la, la iŋɛ ba la pakerɛ paaɛ paaɛ la zim la n ba' zo'e se'em ti ba nyɔgɛ la.

¹⁰ Bala mɛa ti la iŋɛ Yemesi la Yɔn n de Zebedii dayɔɔhi, gee dɛna taaba la Simɔn la. Ti Yezu yele Simɔn yeti, “Da zɔta dabeem, yehe nananawa yɛ'a ha, fum yeti fum tara la nɛreba kina na bɔ'ɔra mam.”

¹¹ Ban tari ba uurenɔ la dooe doone na la, ba bahɛ sɛlawoo mɛ, gee dɔla Yezu.

Yezu tibɛ insageŋɔ daana

¹² Saŋa kayima, ti Yezu bɔna tiŋa kayima puan, ti insageŋɔ kɔ'ɔm to'e buraa kayima iŋa za'a. En nyɛ Yezu la, a suure la tiŋa paaɛ paaɛ, gee belum Yezu yeti, “Daana, fum han bɔta, fum tibɛ mam.”

¹³ Ti Yezu tiɛ a nu'o kalum en gee yeti, “Mam boti. Nyɛ fum tibegɔ.” Bilam bilam ti insageŋɔ la bahɛ en.

¹⁴ Ti Yezu bo' en nuurɛ ti a da yele nɛra nɛra se'ere. “Kiŋɛ, la fum dikɛ fum mɛŋa ta pa'alɛ malema daana la, gee bo' tibegɔ bo'olum la wuu Moose n bo' ya nuurɛ se'em la, ti la dɛna aze' nyɛ daana bo' ba.”

¹⁵ Gee saŋa kana wa la ti Yezu yele pun malum yiregɛ mɛ zi'an woo gana dinɛ n tabelɛ yiregɛ se'em. Nɛreba kekeko ni lagehɛ mɛ ti ba kelehe en, gee nyɛ ba bã'ahi tibega.

¹⁶ Gee a ni yehe mɛ, kiŋɛ zi'an ti nɛra ka bɔna bini a ma'a ta pu'uhɛ.

Yezu tibɛ kɔɔreŋɔ

¹⁷ Daarɛ deyima ti Yezu pa'ala, ti Farasiiduma, la sɛba n pa'alɛ Moose ze'elego la zi'a bilam bɔba (Ba ze'ele la timbibehi n boi Galilii la Yuda la Yerusalɛm puan na), ti Daana la paŋa bɔna la en, ti a tibera.

¹⁸ Sankaŋa mɛa puan ti buraahi sise'ehi ziira kɔɔreŋɔ suŋɔ puan kina na. Ba zigɛ mɛ ti ba tari ni en paaɛ Yezu nɛŋan biŋe,

¹⁹ gee ban ka nyɛ fole wan tari en paaɛ Yezu nɛŋan nɛrekuuŋɔ la zuo la, ba zom la deo la zuin ha, ta ahegɛ fole bini, dikɛ en doohe bilam a suŋɔ la puan, wa'am na ze'ele nɛreba la tiŋasuka, Yezu nɛŋan.

²⁰ Yezu n nyɛ ba sakerɛ la, a yele kɔɔreŋɔ la yeti, “Asaala wa, ba bahɛ fum be'em la bo' fum.”

²¹ Ti gɔnmineba la, la Farasiiduma la pɔhɛ sɔkera yeti, “Ani n de ena tɔgera tuura bala? Ani n wan ta'am bahɛ nɛra be'em han dagena Yinɛ ma'a?”

²² Yezu n baŋɛ ban sokere se'ere ba suya puan la, ti a yele ba yeti, “Ŋwani ti ya sɔkera sokere dina taaba ya suya puan?

²³ De deni n de naana ti n yele, ‘N bahɛ fum be'em bahɛ la bii, ihege la fum kina’?

²⁴ Gee ŋwana n wan bahɛ ti ya baŋɛ ti, mam Asaala Dayua la tari paŋa tiŋa wa zuo, ti n bahɛ nɛra be'em bo' en.” Gee nyaa yele kɔɔreŋɔ la yeti, Mam yeti fum mɛ “Ihege, dikɛ fum suŋɔ kula.”

²⁵ Bilam bilam ti kɔɔreŋɔ wa ihege ze'ele ku nama zuo ba nɛŋan, vaaɛ a suŋɔ la ti a ni gã'a ku zuo la, kula gee pɛgera Yinɛ.

²⁶ Ti la pakɛ nɛra woo paaɛ paaɛ, ti ba pɛgera Yinɛ, gee ti dabeem kɛ̃ ba, ti ba yɛta yeti, “Tu nyɛ yɛla en boi a tɔka zina.”

Yezu yi' Levi

²⁷ Ŋwana pooren, ti a yehe ta nyɛ ti Kuba tɔ'ɔha ti a yu'urɛ yi'iri Levi, zi'a kuba to'ohego zi'an. Ti a yele en yeti, “Dɔla mam.”

²⁸ Ti a ihege, bahɛ sɛla woo gee dɔla en.

²⁹ Ti Levi wa ta maahum de'eŋo kãtɛ yi' Yezu, ti kuba tɔ'ɔha duma zo'e zo'e, la nɛreba basɛba, wa'am na lagum zi'a dɛla taaba la ba, dia zi'an la.

³⁰ Ti Farasiiduma, la gɔnmi'ineba la nyɔna bɔ'ɔra Yezu zahereba la yeti, “Ŋwani ti yamam dita gee nyuura la kubetɔ'ɔhereba, la be'em duma wa?”

³¹ Ti Yezu lerege ba yeti, “Sɛba n ka bɛ̃'ɛri, ka eere tiba, gee sɛba n bɛ̃'ɛri.

³² Mam ka wa'am na ti n yi' la tuntɔɔduma, gee be'em duma ti ba tee.”

Nɔlurɛ sokere

³³ Ti ba nyaa yele Yezu yeti, “Yɔn zahereba, la Farasiiduma zahereba la luti ba nuurɛ tabela mɛ, gee pu'uha, gee fum dɔleba wa kɔ'ɔm dita mɛ gee nyuura.”

³⁴ Ti Yezu yele ba yeti, “Fum kan ta'am iŋɛ ti pɔgedire saama lu' nuurɛ gee ti pɔgedita la nan bɔna la ba. Fum wan nyaŋɛ?

³⁵ Dabeha kini na, ti ba wan dikɛ pɔgedita la kiŋɛ gee bahɛ ba, bilam ti ba nyaa wa luta nɔya dabeha aŋa puan.”

³⁶ Ti Yezu tɔgɛ makerɛ bo' ba yeti, “Nɛra ka anhegere fupaalega tanɛ pɛ'ɛra ligera fukɛka yoko. A han iŋɛ bala, tanpaalɛ la wan ahegɛ gee bahɛ fukɛka la. Le yɛ'ɛha, tanɛ paalɛ la pun kan naaɛ la fukɛka la.

³⁷ Nɛra me ka boi dikeri daam n kele, su'ura laŋa kɛka puan. A han iŋɛ bala, daam la n kele la wan tahɛ laŋa la, gee ka'ɛ, ti laŋa la me sagum.

³⁸ Gee daam n nan kele, dela bu su' daam laŋa paalega puan.

³⁹ Nɛra me ka boi nyu zaam daam n kele ba'ahɛ, gee le bɔta zina daam n ka kele. A wan yeti, ‘Zaam daam la ani suŋa.’ ”