Aluki 4 - ZE'ELEGO PAALEGA

Yezu Makerɛ

¹ Ti Yezu pirɛ la Fa'a Sia la, ze'ele Yɔɔdan lebe na, ti Sia la tari en kɛ̃ kpaahenɛ puan ha,

² ti a ta bɔna bini dabeha pihinaahi, ti Sagena la makɛ en bihɛ. Dabeha pihinaahi wa puan a ka di sɛla, ti dabeha la en ta ba'ahɛ la, ti kom tara en.

³ Ti Sagena la yele en yeti, “Fum han sirum dɛna la Yinɛ bia, bo' nuurɛ, ti kuga wa lebege boroboro.”

⁴ Ti Yezu lerege en yeti, “La gulehɛ yeti, ‘Nɛra ka vɔi mɛ la dia ma'a.’ ”

⁵ Ti Sagena la tari en zom zi'an, ta ze'ele bilam pa'alɛ en sɔ'ɔlum la woo en boi timpaberɛ wa zuo la za'a bilam bilam.

⁶ Ti Sagena la yele en yeti, “Fum ti en wan dikɛ bana woo, la ba pahi la suŋa la za'a bo'. Se'ere en sɔi la, ba dikɛ ba bo' la mam, ti mam me dikera bɔ'ɔra se'em ti n bɔta.

⁷ Fum han wan na'ahɛ mam, ba za'a dela fum dinɛ.”

⁸ Ti Yezu lerege en yeti, “La gulehɛ yeti, ‘Na'aha Daana la en de fum Yinɛ la, gee tuna bɔ'ɔra eŋa ma'a.’ ”

⁹ Ti Sagena la tari Yezu kiŋɛ Yerusalɛm, tari en ta zom pu'uhegɔ yire la zuin zuin ha, yele en yeti, “Fum han sirum dɛna la Yinɛ bia, ze'ele ka'lam lobe fum mɛŋa bahɛ tiŋa ha,

¹⁰ se'ere en sɔi la, la gulehɛ yeti, ‘Yinɛ wan bo' a suŋereba nuurɛ, fum zuo, ti ba te'ele fum,’

¹¹ ti ‘Ba wan te'ele fum la ba nu'uhi, ti fum na'arɛ kan ŋmɛ kugere.’ ”

¹² Ti Yezu lerege en yeti, “La tɔgɛ biŋe yeti, ‘Da makɛ Daana la en de fum Yinɛ la bihɛ.’ ”

¹³ Sagena la n ba'ahɛ mageha la woo la, a bahɛ en mɛ, gee gura sansɛka ti a wan le nyɛ fole.

Yezu pɔhɛ tuuma Galilii

¹⁴ Ti Yezu pirɛ la Fa'a Sia paŋa, lebe Galilii, ti a yele to'e tinse'ehi en kaaɛ la za'a.

¹⁵ Ti Yezu pɔhɛ pa'alegɔ ba zamehegɔ yiya la puan, ti nɛra woo pɛgera en.

Ba zagehɛ Yezu Nazareti

¹⁶ Yezu en lebe Nazareti, zi'an ti a zo'e na la, ta kiŋɛ zamehegɔ yire la puan vo'ohego daarɛ, wuu en ni pun ita se'em la. Nyaa ihege ze'ele ti a kãalɛ,

¹⁷ ti ba yehe Azaaya gɔŋɔ bo' en. Ti a yirege gɔŋɔ la nyɛ ze'sɛka n gulehɛ yeti,

¹⁸ “Daana Sia la en boi la mam, Se'ere en sɔi la, a sɔ mam mɛ ti n tari faarɛ yelehum wa na bo' naheduma. A tum mam na ti n wa'am na muulɛ fai yɛla bo' sɛba en boi bobere puan, gee bihɛ ti fɔɔhi nini pigehɛ gee bahɛ ti sɛba n boi mugehego puan kiŋɛ fai.

¹⁹ Ti n muulɛ Daana la nimbɔ'zɔrɛ yuunɛ la.”

²⁰ Gee nyaa kilum gɔŋɔ la, dikɛ bo' bituneŋa la, gee lebe zi'ire. Ti nɛra woo n boi zamehegɔ yire la puan la nini kɔ'ɔm kpa' bihera en ziki.

²¹ Ti a pɔhɛ yele ba yeti, “Zina, gɔŋɔ wa zɛ'kana wa'am yelemɛŋerɛ na ya tuban.”

²² Ti nɛra woo pɛgera en, gee ti la iŋɛ ba pakerɛ la zu'uhegɔ yele sɛ'a n ze'eti a nuuren na la. Ti ba yɛta yeti, “Dagi Yosefe dayua la n bala?”

²³ Ti Yezu yele ba yeti, “Mam ka bu'uri, ti ya wan dikɛ yetɔgum biŋere se'ere n yeti, ‘Tibera, tibɛ fum mɛŋa yia’ la, yele mam. Ya me wan yele mam yeti, ‘Tum ka'lam me, fum mɛŋa tiŋa wa puan, daalehum ti tu wum ti fum tum si Kapɛnum la.’ ”

²⁴ Ti Yezu yele ba yeti, “Yelemɛŋerɛ ti n yɛta wa, ti nɔtɔgeha ka boi' ti a mɛŋa tiŋa nɛreba to'e en.

²⁵ De yelemɛŋerɛ la dela, pokɔpa kekeko yuum boi Izirale tiŋa puan mɛ Elia saŋa la, ti saazuo yuum yu', yuuma atã la ŋmarehi siyoobe la. Ti kompɛɛlega yuum to'e tiŋa la za'a la.

²⁶ Gee Yinɛ yuum ka bahɛ ti Elia kiŋɛ ba se'em zi'an, han dagena pokuurɛ se'ere n boi Zarefati tiŋa n boi Sidɔn tiŋa la.

²⁷ Insageŋɔ duma me yuum zo'e mɛ Izirale tiŋa wa puan nɔtɔgeha Elisa saŋa la, gee ba ayima me yuum ka nyɛ tibegɔ han dagena Siriya tiŋa buraa Neeman ma'a.”

²⁸ Ban wum ŋwana la, ba woo n boi zamehegɔ yire la puan la suya nyiie mɛ.

²⁹ Ti ba vaaɛ ihege sa'ɛ en, tari en yehe tiŋa la yiŋa ha, tari en ta paaɛ zoore la ti ba tiŋa mɛ yaga de zuo la zuleŋa ha, ti ba za'ɛ en bahɛ tiŋa ha.

³⁰ Gee a lilum la ba puan yehe kiŋɛ.

Buraa en tari sɛfi'iha

³¹ Ti Yezu sige Kapɛnum n boi Galilii sɔ'ɔlum puan la, ta pa'ala nɛreba vo'ohego daarɛ la.

³² Ti la iŋɛ nɛreba la pakerɛ, la a pa'alegɔ la, se'ere en sɔi la, a pa'ali mɛ ti paŋa bɔna bini.

³³ Zamehegɔ yire la puan, buraa n tari sɛfi'iha boi bini, kaahɛ tagi tagi bahɛ na yeti,

³⁴ “Bahɛ tu bããlam, beni tu fum tara la tɔ, Nazareti buraa Yezu wa? Fum wa'am na ti fum sagum tu mɛ? Mam mi' fum n de se'em, fum dela Yinɛ Fa'a nɛra.”

³⁵ Ti Yezu tahɛ en yeti, “Go'e suram gee yehe a puan na.” Ti sɛfi'iha la fɔbɛ buraa wa tiŋa nɛreba la nɛŋan, gee nyaa yehe na, gee ka pɔgelum buraa la.

³⁶ Ti la iŋɛ nɛra woo pakerɛ, ti ba yɛta taaba yeti, “Beni yele ŋwana? Kpe'eŋo la paŋa ti a tara tahɛ sɛfi'iha ti si yɛha!”

³⁷ Ti ba pɔhɛ tɔgera a yele tiŋa la zi'an woo puan.

Simɔn dɛɛmpɔka tibegɔ

³⁸ Yezu n bahɛ zamehegɔ yire la, a kɛ̃ la Simɔn yire. Bala ma'a ti Simɔn dɛɛmpɔka n boi yire la puan ti ka iŋa tulegɛ, ti ba tɔgɛ ka yele bo' Yezu.

³⁹ Ti Yezu paaɛ ze'ele ka zuin, tahɛ intulegerɛ la, ti bã'a la bahɛ pɔka la. Ti ka ihege bilam bilam bo' ba ko'om.

⁴⁰ Zaanuurɛ n ta ma'ara la, ti sɛba woo n tari ba nɛreba ti ba bɛ̃'ɛra bã'ahi yima yima la, tari ba kina la Yezu zi'an na, ti a tara a nu'uhi pagela ba ayima ayima zuo, tibera ba.

⁴¹ Ti kulekpa'bɛ'ɛhi me zɛ'ɛta ba zo'e zo'e puan yɛhera na gee tahera yeti, “Fum n de Yinɛ Dayua la.” Gee ti a ni tahɛ ba, ka bahera ti ba tɔgera, se'ere n sɔi la kulekpa'bɛ'ɛhi la mi' ti Yezu n de Kiresta la.

Yezu tɔgɛ zamehegɔ yiya puan

⁴² Ti beere ta yilegɛ, ti a bahɛ bilam gee kiŋɛ zi'an ti nɛreba ka bɔna bini. Ti nɛrekuuŋɔ ɛɛra en, ban paaɛ en la, ba boti ba gu' en mɛ ti a da bahɛ ba.

⁴³ Gee Yezu yele ba yeti, “La dela n muulɛ faarɛ yelehum la n de Yinɛ sɔ'ɔlum yɛla la bo' tihi sise'ehi me. Se'ere n sɔi la ba tum mam la bala zuo na.”

⁴⁴ Bala ti a dɔla muula yelehum la Yudiya zamehegɔ yiya la puan.