Aluki 24 - ZE'ELEGO PAALEGA

Yezu vo'ore

¹ Gee dabeha ayopɔi pɔhega daarɛ, bulika yu'uŋɔ yu'uŋɔ, ti pɔgehi wa ihege kiŋɛ yɔɔ la zi'an, tara ba nyuuŋo suŋɔ kaam la ti ba maalɛ la.

² Ba paaɛ nyɛ ti yɔkugere la bilege mɛ gã'a kinkɛleŋa ha.

³ Gee ban kɛ̃ la, ba ka nyɛ Daana Yezu iŋa la.

⁴ Ti ba yari zɛ'a yɛli la yele dina wa, ba yeti ba bihɛ ti buraahi siyi en bala zɛ'a ba zi'an, ti si futo nyagera.

⁵ Ti dabeem kɛ̃ pɔgehi la ti si suure si zuto tiŋa, gee buraahi wa yele ba yeti, “Ŋwani ti ya ɛɛra vɔpa ki'induma puan?.

⁶ A ka boi ka'lam a ihege mɛ.Tɛri ya en daa yele ya se'em en daa nan boi Galilii la,

⁷ ti ba wan dikɛ Asaala Dayua la iŋɛ be'emduma nu'uhen, ti ba ku en, gee dabeha atã daarɛ, a wan vo'e.”

⁸ Ti ba nyaa tiɛ Yezu tɔgebuna wa,

⁹ ti ban ze'ele yɔɔ la puan lebe na la, ba yele a zahereba pia la ayima la mɛ la bana la za'a sɛla woo en iŋɛ.

¹⁰ La dela Mɛɛri Magedalin, Yowana, Mɛɛri en de Yemesi ma la, la pɔgese'ehi woo en doohe ba na la en yele Yezu tuntuneba wa.

¹¹ Gee yeledina wa ani mɛ wuu solene la bo' tuntuneba la, ti ba ka sakɛ bo' ba.

¹² Gee Pita ihege mɛ guu zua yɛ'a yɔɔ la puan, ta paaɛ teke veehe bihɛ ku puan ha, nyɛ ti tanpeelesunɛ la gã' de ma'a, ti a lebe kula, ti la iŋɛ en pakerɛ la sɛla en iŋɛ la.

Emayose sore zuo

¹³ Daan dinɛ daarɛ mɛa, ti Yezu zahereba bayi' yɛ'a timbila ti ba yi'ira Emayose, en de wuu miila ayopɔi fum ze'ele Yerusalɛm yɛ'a bini.

¹⁴ Ti ba kina gee suhera la taaba yele se'ere en iŋɛ la.

¹⁵ Ban tɔgera gee sɔheri la, ti Yezu en bala wa'am na paaɛ ba, naaɛ la ba kina,

¹⁶ gee la pi' la ba nini ti ba da baŋɛ en.

¹⁷ Ti Yezu tɔgɛ bo' ba yeti, Yamam kini gee suhera la beni la taaba wa? Ti ba ze'ele bããlam la nimbu'ɔ.

¹⁸ Ti ba ayima yu'urɛ en yi'iri Kelopase la lebehe en yeti, “Fum ma'a en de saana Yerusalɛm wa ka mina yelesɛ'a en iŋɛ ka'lam dabeha ana wa puan?”

¹⁹ Ti a soke ba yeti, “Beni yɛla?” Ti ba lerege en yeti, “Yezu en yehe Nazareti na la, dɛna nɔtɔgeha, pirɛ la paŋa, la yelehum la Yinɛ la nɛreba woo nɛŋan la,

²⁰ ti malema kiinduma, la yizuto kiinduma nyɔkɛ en tihɛ ti ba gakɛ en ti la dela a ki, ti ba kpa' en la.

²¹ Gee tumam me daa biheri la eŋa ti eŋa en de se'em en wan yɔ to'e Izirale bahɛ. Yele ana woo pooren, zina dela dabeha atã, ti yele ana wa iŋɛ.

²² Sɛla en le pa'ahɛ dela, pɔgehi sise'ehi en pa'ahɛ tumam puan en maam tumam nɔya. Si kiŋɛ ni la yɔɔ la puan zina bulika ma'aherɛ ma'aherɛ,

²³ ka nyɛ a iŋa la, gee lebe na yele tumam ti bamam nyɛ la suŋereba, ti ba yele bamam yeti, a vo'e mɛ.

²⁴ Ti tu puan basɛba kiŋɛ yɔɔ la puan lebe na yele tu yeti la kɔ'ɔm dɛna la pɔgehi la en yele se'em la, gee bamam ka nyɛ en.”

²⁵ Ti a yele ba yeti, “Ya gerege mɛ, ti ya bɔkerɛ me tɔna ti ya nam sɛla woo ti nɔtɔgeheba la muulɛ ti la wan iŋɛ la.

²⁶ La dagi la de sore ti Kiresta la namehɛ yele ana woo puan gee nyaa kɛ̃ a suŋa la puan?”

²⁷ Gee nyaa pɔhɛ Moose, doohe nɔtɔgeheba la woo puan pa'alɛ ba eŋa yele en de se'em bɔna gulehegɔ la puan.

²⁸ Ban wa'am na pɔra timbila la puan ti ba yɛ'a la, ti a kina tɔla ba nɛŋa wuu a ye' tɔla mɛ la.

²⁹ Ti ba belum en ninmu'urɛ yeti, “Yee la tu ka'lam, gee la ye' la zaanuurɛ n bala, ti yinɛ me yɛ'a lua.” Bala ti a yee bilam la ba.

³⁰ En ta zi'a la ba ti ba di la, ti a dikɛ boroboro purɛ sum bahɛ de zuo, gee fike dikɛ bo' ba.

³¹ Bilam ti ba nini pikɛ, ti ba nyaa baŋɛ en, ti a me mɛlum ba nɛŋan.

³² Ti ba yɛta taaba yeti, “Bihɛ, tu paleŋa ka ɛgeri ni mɛ, en tɔgeri ni la tɔ sore la zuo la, se'em ma'a ti a lakeri ni gɔŋɔ la yelehum la pa'ali ni tu la?”

³³ Gogo kaareŋa kaŋa mɛa puan ti ba ihege lebe Yerusalɛm, ta paaɛ nyɛ zahereba pia la ayima la, ti ba lagehɛ taaba.

³⁴ Ba tɔgeri me yeti, “Daana la sirum vo'e mɛ, a niiɛ a mɛŋa bo' Simɔn mɛ.”

³⁵ Ti ba nyaa yele ba sɛla en iŋɛ sore la zuo la, la en niiɛ a mɛŋa bo' bamam se'em boroboro figehego saŋa la.

Yezu niiɛ a mɛŋa pa'alɛ a zahereba

³⁶ Ban boi bini tɔgera ŋwana la, ti Yezu en bala zɛ'a la ba, gee yele ba yeti, “Suma'ahum bɔna la ya.”

³⁷ Ti ba gɛ̃rɛ zɛ'a, ti dabeem sãɛ ba, ti ba ti'iha ti ba nyɛti la kukɔ.

³⁸ Ti a yele ba yeti, “Ŋwani ti dabeem sãɛ ya bala, ŋwani ti bumbu'um bɔna ya suya puan bala?

³⁹ Bihɛ ya n nu'uhi la n nama, la ya baŋɛ ti la dela mam en bala. Kalum ya mam bihɛ, se'ere en sɔi la, kukɔ ka tari inganɛ la kɔba wuu yan nyɛ mam ti en tari se'em wa.”

⁴⁰ En yele ŋwana ba'ahɛ la, a pa'alɛ ba la a nu'uhi la a nama la.

⁴¹ La ba nyaa pun nyɛɛna la, ba kelum ka sakera, gee me bɔ'ɔra. Ti a yele ba yeti, “Ya tari sɛla ka'lam ti n di?”

⁴² Ti ba bo' en ziho fiiwa ti ba sɛ',

⁴³ ti a to'e bu, ze'ele ba nɛŋan obe.

⁴⁴ Ti a yele ba yeti, Mam yelehum n ŋwana ti n daa tɔgɛ bo' ya, mam daa nan boi la ya la, yeti, “Sɛla woo ti ba gulehɛ doohe mam yu'urɛ puan, Moose nɔze'elego la, la nɔtɔgeheba la, la yuuma puan la za'a dela la wa'am na tum.”

⁴⁵ Ti a nyaa yu'ɛ ba puti'irɛ ti ba bɔkɛ gɔnɔ la yɛla.

⁴⁶ Ti a le yele ba yeti, “La pun gulehɛ mɛ ti, Kiresta la wan namehɛ gee vo'e a kum la puan dabeha atã,

⁴⁷ ti a yu'urɛ puan ti ba wan muula teere en bo'ori , la be'em sugeri dia, pɔhera Yerusalɛm, la tihi za'a puan.

⁴⁸ Yamam en de aze'nyɛduma yele ana wa woo puan.

⁴⁹ Nyaa bihɛ ya, n yeti n tum la mam Sɔ la n biŋe nuurɛ ti a iŋɛ se'em la. Bala, boni ya tinkana wa puan gura ti ba ta pirɛ ya la saazuo paŋa.”

Yezu zom saazuo

⁵⁰ Ti Yezu nyaa tari ba yehe ti ba kiŋɛ zaaɛ ta paaɛ Bɛtani tiŋa, ti a zɛkɛ a nu'uhi saazuo, purɛ sum bahɛ ba zuo.

⁵¹ En boi bini puta sum baha ba zuo la, ba nyɛ ti a zɛkera la saazuo, nyaa zɔna zuin ha ta kɛ̃ ha.

⁵² Ti ba na'ahɛ en, gee tulege lebe Yerusalɛm na la nyɛɛmkãtɛ.

⁵³ Ti ba naaɛ taaba bɔna pu'uhegɔ yire la puan pɛgera Yinɛ saŋa woo.