Aluki 22 - ZE'ELEGO PAALEGA

Ba ku nuurɛ ti ba ku Yezu

¹ Boroboro zaŋa de'eŋo la ti ba yi'ira azɔɛtole la ta pɔra mɛ,

² ti malema kiinduma la, la gɔnmi'ineba la nyaa ɛɛra sose'ere ti ba wan doohe ku Yezu, se'ere en sɔi la, dabeem en daa tari ba la nɛreba la.

³ Ti Sagena la kɛ̃ Yudasi ti ba yi'ira Isikariyɔte, dɛna Yezu zahereba pia la bayi' la ayima la.

⁴ Ti a welege kiŋɛ ta naaɛ la malema kiinduma la, la pu'uhegɔ yire kpɛ'ɛnduma sɛba en biheri pɛntiireba la, nyaa yele ba eŋa en wan koohe Yezu bo' ba se'em.

⁵ Ti ba puurɛ pee gaŋɛ, ti ba ku nuurɛ ti ba bo' en ligeri,

⁶ ti a me sakɛ, gee nyaa ɛɛra sore ti a koohe Yezu bo' ba, sansɛka ti nɛrekuuŋɔ kan ta bɔna la Yezu.

Azɔɛtole de'eŋo la maaheŋɔ

⁷ Boroboro zaŋa de'eŋo la ti ba ni kaabɛ azɔɛtole pebila la saŋa la en bala paaɛ.

⁸ Bala ti Yezu tum Pita la Yɔn, yele ba yeti, “Kiŋɛ ya ta maahum azɔɛtole dia bo' tu, ti tu wa'am na di.”

⁹ Ti ba soke en yeti, “Bɛha ti fum bɔta ti tu ta maahum azɔɛtole dia la ti tu di?”

¹⁰ Ti Yezu yele ba yeti, “Kelehe ya,” ya han ta kɛ̃ tiŋa la puan, ya wan tu'uhɛ buraa ti ka zi ko'om la yoore. Doohe ya ka, ta kɛ̃ yire se'ere puan ti a wan kɛ̃ la,

¹¹ la ya yele yire la daana yeti, ‘Pa'ala la yeti, “Saama bɔ'ɔ la bɛɛ ti n zi'ire di azɔɛtole dia wa la n zahereba wa?” ’

¹² Yidaana la wan pa'alɛ ya bɔ'yaleŋa ti ba pun maahum kɔ. Maahum ya azɔɛtole dia la bilam bo' tu.”

¹³ Bala ti a zahereba la kiŋɛ, sirum ta nyɛ sɛla woo wuu Yezu en yele ba se'em la, nyaa maahum azɔɛtole dia la bilam.

Daana zaanuurɛ tuulum dia la

¹⁴ Saŋa la en ta paaɛ la, ti Yezu zi'ire a zi'irego zi'an dia la zi'an, ti a tuntuneba la zi'a la en dɛla taaba.

¹⁵ Ti a yele ba yeti, “Mam ba' boti ni ti n di azɔɛtole wa mɛ la ya gee nyaa kɛ̃ n namehegɔ wa puan,

¹⁶ gee n yeti ya mɛ wa, ti n kan di, gura ti dia la vuurɛ en de se'ere la tum tole Yinɛ sɔ'ɔlum la puan.”

¹⁷ Gee nyaa dikɛ wula la daam, bo' Yinɛ fara ba'ahɛ, gee yele ba yeti, “To'e ya nyu gee bo' taaba.

¹⁸ Mam yeti ya mɛ wa ti, ze'ele sankana yɛ'a, mam kan nyu tiihi wala daam wa, gura ti Yinɛ sɔ'ɔlum la wa'am na.”

¹⁹ Gee dikɛ boroboro, en bo' fara ba'ahɛ la, a fike boroboro la mɛ bo' ba gee yeti, “Mam iŋa en ŋwana dikera bɔ'ɔra ya wa. Iti ya ŋwana tɛra n yele.”

²⁰ A iŋɛ daam la wula la me la bala mɛa ban di ba'ahɛ la, a yeti, “Wula wa en ka'ari bɔ'ɔra ya wa dela mam nɔpu'ulepaalɛ ti n pu'ula la ya, la n ziim.

²¹ Gee bihɛ ya, se'em en koohe mam la en bala zi'a la mam wa, ti a nu'o bɔna laa wa puan wa.

²² La dela sira ti Asaala Dayua la wan kiŋɛ wuu lan gã'arɛ se'em na la, gee yele boi se'em en wan koohe en la zuo.”

²³ Ti a zahereba la pɔhɛ sɔkera taaba, ba se'em n wan sakɛ tum tuun-dina wa.

Se'em en wan gana za'a nɔkpe'ene

²⁴ Ti nɔkpe'ene lu Yezu zahereba la tiŋasuka, ba se'em n gani za'a zuo.

²⁵ Ti a yele ba yeti, “Tiŋa wa zuo na'duma dikɛ ba mɛhi di' la ba nɛreba, ti sɛba en boi kpe'eŋo puan me dikɛ ba mɛhi di' nɛresɛba en boi ba nu'uhen la.

²⁶ Gee la kan ana bala bo' yamam. La tugum dɛna se'em la dela la, se'em en gani za'a ya puan la, tugum dɛna bia ya za'a puan. Ti se'em en de nɛŋadaana ya puan, tugum lebege ana wuu se'em en tɔti la.

²⁷ Ti'ihɛ ya de bihɛ, ani n gani za'a? Se'em en zi' dɛla la bii se'em en zi' tɔta la? Dagi se'em en zi' dɛla la? Gee mam boi la ya mɛ wuu se'em en ze' tɔta la.

²⁸ “Yamam en de sɛba en ze' la mam kankaŋi n mageha wa woo puan.

²⁹ Bala ti mam dikɛ sɔ'ɔlum bo' ya, wuu Sɔ la n dikɛ sɔ'ɔlum la iŋɛ mam nu'uhen se'em la,

³⁰ ti ya ta ta'am di gee nyu la mam n dia zi'an n sɔ'ɔlum la puan, gee zi'a na'am kugehi zuo bihera Izirale buuri pia la bayi' la.

Pita ki'ihegɔ

³¹ “Ti Yezu yeti, Simɔn, Simɔn, kɛleha suŋa, Sagena la to'e la yɔ'ɔ ti a yeele ya za'a wuu ki uto la bahɛ.

³² Gee mam pu'uhɛ bo' fum mɛ ti fum sakerɛ da koŋe. Gee fum, fum han ta ŋmɛregɛ lebe na, kpemehe fum suurɔ wa.”

³³ Ti Pita yele Yezu yeti, “N Daana, mam maahum ya ti mam la fum lagum kɛ̃ paka deen, la han pun dɛna la kum me, n ki la hɔ.”

³⁴ Ti Yezu yeti, “N yeti fum Pita, ti nɔdɔɔ kan kaahɛ zina, han dagena fum ta ki'ihɛ butã ti fum ka mi' mam.”

Ligeri daŋa, sore kinɛ tapɔɔ la su'a

³⁵ Ti Yezu yele ba yeti, “Mam daa tum ya ti ya yehe gee ka tara ligeri dãhi, la sore kinɛ tapɔtɔ,bii tagera la, ya daa koŋe la sɛla?” Ti ba yeti, “Aayi, sɛla sɛla.”

³⁶ Ti a yele ba yeti, “Gee nananawa, se'em en tari ligeri daŋa a dikɛ, fum se'em me en tari sore kinɛ tapɔɔ fum dikɛ, ti se'em me n ka tari su'a, a koohe a fuo da' sua.

³⁷ N yeti ya mɛ wa, ti gulehɛ kuna dela ku wa'am sira na mam puan. La gulehɛ yeti, ‘Ba kãalɛ en pa'ahɛ la nageyigehi puan.’ La sirum dela sira ti ban gulehɛ mam yele se'em la sirum wa'am na tum.”

³⁸ Ti a zahereba la yele en yeti, “Daana, bihɛ, sɔ'ɔhi siyi en ŋwana.” Ti a yele ba yeti, “La seke ya.”

Yezu pu'uhi Olive Zoore zuo

³⁹ Ti Yezu yehe na yɛ'a Olive Zoore zuo wuu en ni pun ita se'em la, ti a zahereba la doohe en.

⁴⁰ Yezu en ta paaɛ en ye zi'an la, a yele ba yeti, “Pu'uhi ya mɛ ti makerɛ be'o saŋa la da nyaŋɛ ya.”

⁴¹ Ti Yezu vurege wuu nu'o kugelobete lua zi'an, gee bahɛ ba, nyaa kpa' duma, pu'uhɛ yeti,

⁴² “N Sɔ, fum han bɔta, da bahɛ ti n nyu namehegɔ wanɛ dina wa puan. Gee dagi mam suboolum, gee fum suboolum en de se'ere la tum.” [

⁴³ Ti Suŋera ze'ele saazuo, wa'am na zi'an na kpemehe en.

⁴⁴ Ti a ze'ele a susageŋɔ la puan pu'uhɛ tuulɛ tuulɛ, ti a iŋa muregere ana wuu ziim la tɔgeha tiŋa. Diimen diimen gulehegɔ tuseto ka tari ka'lam]

⁴⁵ En ihege a pu'uhegɔ la puan la, a lebe la a zahereba la zi'an na, paaɛ na nyɛ ba ti ba gã' giha mɛ, susageŋɔ zo'e zo'e la zuo.

⁴⁶ Ti a yele ba yeti, “Ŋwani ti ya giha? Ihege ya la ya pu'uhɛ ti pã'ahebe'o saŋa la da nyaŋɛ ya.”

Yezu Ŋma'a, la a nyɔkerɛ

⁴⁷ En boi bini tɔgera la, ti nɛrekuuŋɔ en bala bibigera na, ti se'em ti ba yi'ira Yudasi, dɛna Yezu zahereba pia la bayi' la puan ayima la, en boi ba nɛŋa. Ti a paara Yezu zi'an na ti a mɔgɛ en;

⁴⁸ ti Yezu yele en yeti, “Yudasi, fum yeti fum koohe Asaala Dayua wa me la mɔka wa yoi?”

⁴⁹ Sɛba en boi la en en nyɛ nɛreba la en kini na la, ba soke yeti, “Daana, ti kɛ̃' ba la sɔ'ɔhi?”

⁵⁰ Ti Yezu zahereba la ayima fooe a su'a kɛ̃' malema nɛŋadaana ayima da'aberɛ tuberɛ fike bahɛ.

⁵¹ Ti Yezu yele en yeti, “Da le pa'ahɛ dɛ.” Gee kalum tuberɛ la, ti de lebe iŋɛ sum.

⁵² Ti Yezu nyaa yele malema kiinduma la, la pu'uhegɔ yire pɛntiireba kpɛ'ɛnduma, la yizuto kima la en wa'am na ti ba nyɔkɛ en la yeti, “Yamam yehe mɛ na la sɔ'ɔhi la dɔya wuu mam dela nageyiga?

⁵³ Mam ni bɔna la ya daare woo pu'uhegɔ yire la puan, gee ya ka nyɔkɛ mam. Gee ya saŋa en ŋwana, lika puan paŋa saŋa en ŋwana.”

Pita Ki'ihɛ Yezu

⁵⁴ Ti ba nyaa nyɔkɛ Yezu, tari en kiŋɛ, tari en na kɛ̃ malema nɛŋadaana la yire. Ti Pita bɔna pooren ha dɔla na.

⁵⁵ Ti ba ta tuurɛ bugum zinzaka la tiŋasuka ɔɔha, ti Pita me wa'am na zi'ire la ba.

⁵⁶ Ti pugela en de da'aberɛ nyɛ Pita bugum la zi'an, bihɛ en gee yeti, “Buraa kana wa ni dɔla la Yezu.”

⁵⁷ Ti Pita ki'ihɛ yeti, “Pɔka wa, mam ka mi' en.”

⁵⁸ Ti la iŋɛ fii wa, ti nɛra ayima me bihɛ en gee yeti, “Fum dela ba ayima.” Ti Pita yeti, “Buraa wa, mam ka pa'ahɛ ba puan.”

⁵⁹ Ti la le iŋɛ wuu gogo kaareŋa, ti nɛra ayima me kelum yeti, aayi, “Yelemɛŋerɛ, Buraa kana wa me ni bɔna mɛ la Yezu, se'ere en sɔi la a dela Galiliiŋa.”

⁶⁰ Ti Pita yeti, “Buraa wa, mam ka mi' fum yeti sɛla wa.” Sankaŋa puan la, Pita en nan boi bini tɔgera la, ti Nɔdɔɔ kaahɛ.

⁶¹ Ti Daana la ŋmɛregɛ bihɛ Pita. Ti Pita tiɛ Daana la yelehum la, en daa yele en yeti, “Gee ti nɔdɔɔ ta kaaha zina, ti fum ki'ihɛ butã ti fum ka mi' mam.”

⁶² Ti Pita yehe yiŋa ta kele ninmu'urɛ.

Ba keheri gee ŋmɛ'ɛra Yezu

⁶³ Ti buraahi se'ehi en gurɛ Yezu la pɔhɛ kɛhera en gee ŋmɛ'ɛra en,

⁶⁴ dikɛ sɛla lu' a nɛŋa gee sɔkera en yeti, “Bukɛ ani n ŋmɛ' fum wa.”

⁶⁵ Gee kɔ'ɔm tuura en tuunyooro yima yima.

Yezu paaɛ kiinduma nɛŋan

⁶⁶ Ti beere ta yilegɛ, ti yizuto kima, la malema kiinduma la, la gɔnmi'ineba la lagehɛ taaba, ti ba nyaa tari Yezu wa'am ba kiinduma tugum zi'an la na.

⁶⁷ Ti ba yele en yeti, “Fum han dɛna Kiresta la, yele tu.” Ti a yele ba yeti, “Mam han pun yele ya, ya kan pun nam,

⁶⁸ n me han soke ya sokere, ya me pun kan lebehe.

⁶⁹ Gee yehe nananawa, Asaala dayua la wan zi'ire la Yinɛ Paŋa zuɔ nu'o.”

⁷⁰ Ti ba za'a soke yeti, “Fum nyɛ dela Yinɛ dayua?” Ti a yele ba yeti “Ya yele la bala wa.”

⁷¹ Ti ba yele taaba yeti, “Beni aze'nyɛ le yɛ'ɛha ti tu le ɛɛra ti tu nyɛ? Tu wum de la tu mɛhi a mɛŋa nuuren!”