Aluki 18 - ZE'ELEGO PAALEGA

Pokuurɛ la Gakera

¹ Ti Yezu makɛ makerɛ bo' ba, ti ba pu'uha, saŋa woo gee ti ba giila da kɔ'ɔha.

² A yeti, “Tiŋa kayima puan ti gakera ayima bɔna bini, ka zɔta Yinɛ, bii a dikɛ nɛra yi' sɛla.

³ Tinkaŋa mɛa puan, pokuurɛ me en boi bini, kina gakera wa zi'an daare woo yɛta en yeti, ‘Gakɛ n yele wa bo' mam buurɔ, mam la se'em en tɔgeri wa tiŋasuka.’

⁴ Ti gakera wa zagehɛ ti la yuue fiiwa. Gee pooren ti a ti'ihɛ bo' a mɛŋa yeti, ‘La mam pun ka zɔta Yinɛ, benti n dikɛ nɛra yi' sɛla,

⁵ gee pokuurɛ wa en kini daana mam se'em wa la, n wan tɔgɛ bo' en buurɔ, ti a da kina daana mam bala saŋawoo.’ ”

⁶ Ti Daana la nyaa yeti, “Wum ya ŋmɛlema gakera wa en yele se'em.

⁷ Gee Yinɛ en tugum kan bo' sɛba ti a mɛŋa looe la en kaahi bɔ'ɔra en bulika la yu'uŋɔ la? A wan yuue mɛ gee suŋɛ ba yoi?

⁸ N yele ya ti, Yinɛ kan gu'um, a wan kabelɛ bo' ba buurɔ. Gee la bala za'a, Asaala Dayua wa han ta wa'am na, a wan nyɛ sakerɛ duma tiŋa wa zuo?”

Farasii la kuba tɔ'ɔha

⁹ Ti Yezu le makɛ makerɛ dina wa bo' sɛba en nam ba mɛhi ti bamam dela tuuntɔɔ duma, gee zɛɛna basɛba la.

¹⁰ “Nɛreba bayi' en kɛ̃ pu'uhegɔ yire ti ba pu'uhɛ, ba ayima dela Farasii ti ayima dɛna kuba tɔ'ɔha.

¹¹ Ti Farasii la dooe zɛ'a, gee pu'uha yeti, ‘Yinɛ, mam bo' fum fara, la mam en ka ani wuu nɛreba basɛba, fãareba, nɛreŋmɛlema, bii sɛba en tuni kabohi, pun ta paaɛ kuba tɔ'ɔha wa.

¹² Gee mam luti la nuurɛ sugum nuuren buyi' dabeha ayopɔi woo puan, mam yɔɔri n pia pia bo'olum mɛ n sɛla woo puan.’

¹³ Gee kubetɔ'ɔha la ze' zaaɛ mɛ, pun kan gorege bihɛ saazuo, gee sura lɔbera a zuo gee yɛta yeti, ‘Yinɛ, zɔ mam be'em daana wa nimbu'ɔ!’

¹⁴ N yele ya yeti, burakana en wan kule yire la buurɔ gee dagi yia daana la. Se'ere en sɔi la, sɛba woo en zɛkeri ba mɛhi, ba wan sigehe ba tiŋa. Gee sɛba woo en sigehe ba mɛhi, ba wan zɛkɛ ba.”

Yezu purɛ sum bahɛ kɔma zuo

¹⁵ Ti nɛreba tara ba kɔma, ta ta' la kɔmbilɛɛhi kina Yezu zi'an na, ti a han wan dikɛ a nu'o pagelɛ ba zuto. Yezu zahereba la en nyɛ ŋwana la, ba yele nɛreba la mɛ la ninmu'urɛ.

¹⁶ Gee Yezu yi' ba mɛ wa'am a nɛŋan na yele ba yeti, “Bahɛ ya ti ba tari kɔmbibehi wa wa'am n zi'an na, da gu'uri ya ba, se'ere en sɔi la, sɛba en ani wuu kɔma wa, ti Yinɛ sɔ'ɔlum la dɛna ba dinɛ.

¹⁷ Yelemɛŋerɛ ti n yɛta ya wa, ti se'em woo en ka to'e Yinɛ sɔ'ɔlum wa wuu bia, kan malum kɛ̃ bu puan.”

Na' Buntata

¹⁸ Nɛŋa daana ayima en wa soke Yezu yeti, “Pa'ala sunkɔ, Beni en de n iŋɛ la n to'e vom kamba'ahɛ wa?”

¹⁹ Ti Yezu yele en yeti, “Ŋwani ti fum yi' mam ti sunkɔ? Nɛra ka boi dɛna sunkɔ, han dagena Yinɛ ma'a.

²⁰ Fum mi' nɔze'elego la, Fum da tum kabohi, Fum da ku nɛra, Fum da zu, Fum da dɛna aze' nyɛ pumparema, Na'aha fum sɔ la fum ma.”

²¹ Ti buraa wa lebehe yeti, “Mam dole yele ana za'a mɛ n bumbile paalemen na.”

²² Yezu en wum ŋwana la, a yele en yeti, “Yele deyima n kelum pɔ'ɛ hɔ. Koohe fum tari sɛla woo la, la fum dikɛ ligeri la tɔrɛ naheduma, ti fum tarega la nyaa bɔna saazuo, gee ti fum wa'am na dɔla mam.”

²³ Gee buraa wa en wum ŋwana la, a suure sagum mɛ, se'ere en sɔi la, a ba' pãrɛ mɛ.

²⁴ Ŋwana ti Yezu bihɛ en zii gee yeti, “La kpe'em mɛ bo' sɛba en de buntateba ti ba kɛ̃ Yinɛ sɔ'ɔlum la puan.

²⁵ Yelemɛŋerɛ, la de naana bo' yugenɛ ti de doohe fupiho yoko puan tole, gana se'em en tari kɛ̃ Yinɛ sɔ'ɔlum la puan.”

²⁶ Ti sɛba en kelehe en la yɛta yeti, “Ti ani en nyaa wan nyɛ faarɛ?”

²⁷ Ti Yezu lebehe ba yeti, “Sɛla en kpe'em bo' saaleba, ka kpe'em bo' Yinɛ.”

²⁸ Ŋwana ti Pita nyaa yeti, “Bihɛ, tumam bahɛ tu yiya mɛ gee dɔla fum wa.”

²⁹ Ti Yezu yele ba yeti, “N yeti ya la yelemɛŋerɛ wa, se'em ka boi bahɛ a yire, a pɔga, bii a suurɔ bii a dɔgereba, bii a kɔma Yinɛ sɔ'ɔlum wa zuo,

³⁰ gee kan malum nyɛ gaŋɛ bala saŋa kana vom wa puan, la buuri sansɛka en kini na la vom kamba'ahɛ la en kini na la puan.”

Yezu le tɔgɛ a kum, la a vo'ore pa'ahɛ butã

³¹ Ti Yezu tari a zahereba pia la bayi' la lebe kinkɛleŋa ba ma'a, ta yele ba yeti, “Bihɛ ya, tu ye' zɔna la Yerusalɛm wa, zi'an ti sɛla woo ti nɔtɔgeheba la gulehɛ doohe mam Asaala Dayua wa puan la wan tum.

³² Ba wan nyɔkɛ en bo' sɛba en dagi Yuuduma, ti ba ɛregɛ en, wan iŋɛ en sɛla en ka ani suŋa tu en, gee tubehɛ nɔtuurum ma' en.

³³ Ba han ta ŋmɛ' en ba'ahɛ, ba wan ku' en, gee dabeha atã daarɛ, a wan ihege.”

³⁴ Gee Yezu zahereba la pun ka bɔkɛ sɛla sɛla yetɔgebuna wa puan. Yelemɛŋerɛ, en yele ba sɛla la sugɛ mɛ bo' ba, ti ba ka gurɛ sɛla ti a yele la.

Yezu tibɛ fua

³⁵ Yezu en ta pɔra Yeriko la, ti fua en zi' sore nuuren suha.

³⁶ Fua wa en wum ti nɛrekuuŋɔ la kini tɔla la, ti a soke ba sɛla en iti.

³⁷ Ti ba yele en yeti, “Yezu en de Nazareti buraa la en ye' tɔla.”

³⁸ Ti fua wa kaahɛ supi yeti, “Yezu, Deviti Dayua wa, zɔ n nimbu'ɔ!”

³⁹ Ti sɛba en boi nɛŋa la tahɛ en ninmu'urɛ yeti, ana bããlam. Gee fua wa tugum malum voole gaŋɛ la bala yeti, “Deviti Dayua wa, zɔ n nimbu'ɔ!”

⁴⁰ Ti Yezu teke ze'ele su'u gee bo' nuurɛ ti ba tari buraa la wa'am na a zi'an na, ti ba tari buraa la wa'am na nɛŋan na. Ti buraa la en ta pɔra na la, ti Yezu soke en yeti,

⁴¹ “Beni ti fum bɔta ti n iŋɛ bo' fum?” Ti fua wa yeti, “N Daana, bahɛ ti n le nyɛta.”

⁴² Ti Yezu yele en yeti, “Nyɛta, fum sakerɛ en faaɛ hɔ.”

⁴³ Bilam bilam ti buraa la le nyɛta, nyaa dɔla Yezu poore pɛgera Yinɛ, ti nɛreba la za'a n nyɛ ŋwana wa la, me pɛgɛ Yinɛ.