Aluki 17 - ZE'ELEGO PAALEGA

Yezu tɔgum busebo

¹ Ti a yele a zahereba la yeti, “Yelesɛ'a n piti nɛra lubera wan ba'ahum bɔna mɛ, gee yele boi fum se'em zi'an ti yele ana wa ze'ele na la!

² La wan ana suŋa bo' fum daana ti ba dikɛ nɛɛrɛ kugere lu' yule fum yugela, za'ɛ fum bahɛ ateko puan ti fum muhi, nyana fum bahɛ ti kɔmbibehi wa ayima pirɛ lu.

³ Tara ya mɛhi suŋa. Fum suuɔ han tuue, tahɛ ya en a tuure la puan, ti a han tee, ya di sugeri bo' en.

⁴ Nɛre-ina mɛa han pun tuue sugum nuuren buyopɔi daanyinɛ, gee lebe sugum nuuren buyopɔi na yele fum yeti, ‘Mam tuue ya, la dela fum di sugeri bo' en.”

⁵ Ti Yezu tuntuneba yele en yeti, “Pa'ahɛ tu sakerɛ!”

⁶ Ti Daana la lerege ba yeti, “Ya han tara sakerɛ ti de pun pɔ'ɛ wuu nanginɛ biileho la, fum wan ta'am yele sinsabega tia yeti, ‘Vuuɛ fum mɛŋa ta sɛ fum mɛŋa ateko wa puan ha,’ ti tia la sirum nam hɔ.

⁷ “Ani ya puan, en wan yele ya da'aberɛ en nan kɔ'ɔm ze'ele ya nii kua puan na, bii a biheri ni la piihi sɛkan ha gee nan kɔ'ɔm kɛ̃ na, ti fum sakɛ yele en yeti, kɔ'ɔm wa'am na zi'ire la mam ti tu di?

⁸ Fum tugum kan yele en yeti, ‘Maahum n yu'uŋɔ dia na, yɛ fum duka lɔgerɔ, la fum maahum n yu'uŋɔ dia na ze'ele mam ti n di gee nyu ba'ahɛ, ti fum me nyaa wa'am na di gee nyu?’

⁹ Fum ni pu'uhɛ fum da'aba mɛ la fum bo' en nuurɛ ti a tum sɛla la?

¹⁰ La dela bala bo' yamam me, ya han tum sɛla ti ba bo' ya nuurɛ ti ya tum la ba'ahɛ, ni yele ya yeti, ‘Tumam yeen dɛna la da'aba yooro, tum lan de tu tum se'em la ba'ahɛ.”

Yezu tibɛ kunkɔma pia

¹¹ En ye' Yerusalɛm la, a dole la tihi se'ehi en boi Samariya la Galilii tihi tiŋasuka la tɔla.

¹² A ta kɛ̃'ɛra la tiŋa kayima puan, ti kunkɔma pia tu'uhɛ en. Bɔna kinkɛleŋa ha,

¹³ gee yi' bahɛ na la kɔkɛ'ɛŋa yeti, “Yezu, Daana, zɔ tu nimbu'ɔ.”

¹⁴ Yezu en nyɛ ba la, a yele ba yeti, “Kiŋɛ ya ta dikɛ ya mɛhi pa'alɛ malema daana la.” Ti ban ye' la, ti ba kunkom la bahɛ.

¹⁵ Ba puan ayima en ta nyɛ ti a nyɛ tibegɔ la, a ŋmɛregɛ mɛ lɛbera na, pɛgera Yinɛ la kɔkɛ'ɛŋa.

¹⁶ Wa'am na paaɛ lu tiŋa Yezu nɛŋan, bo' en fara. A me dela Samariya buuri.

¹⁷ Ŋwana ti Yezu soke yeti, “Ya dagi ni la pia en nyɛ ya tibegɔ? Gee bana bawai' la bɛɛ?

¹⁸ Bama la ayima me ka lebe na ti a dikɛ pɛka bo' Yinɛ, han dagena fum saana wa ma'a?”

¹⁹ Ti Yezu nyaa yele en yeti, “Ihege kina, fum sakerɛ en bahɛ ti fum dɛna fum mɛŋa.”

Yinɛ sɔ'ɔlum la kini na

²⁰ Ti Farasiiduma la le soke Yezu, Yinɛ sɔ'ɔlum la en ye' se'em ma'a na. Ti a lerege ba yeti, “Yinɛ sɔ'ɔlum la ka tari naanɛ yɛ'a na ti fum wan nyɛ,

²¹ bii se'em yele fum yeti, ‘Bihɛ, bumɔ en ŋwana’ bii ‘Bumɔ en ŋwana ke ha.’ Lan de se'em la dela, Yinɛ sɔ'ɔlum la pun diŋɛ bɔna mɛ la ya.”

²² Gee nyaa yɛta a zahereba la yeti, “Dabeha kini na, ti ya wan boti ni ti ya nyɛ ni mam Asaala Dayua dabeha wa deyina ma'a, gee ya kan nyɛ.

²³ Ba wan ta yɛta ya yeti, ‘Bihɛ ya, en ŋwana ke ha!’ Bii ‘Bihɛ ya, en ŋwana ke ha!’ Gee da kiŋɛ ya. Da doohe ya yele ana pooren.

²⁴ Wuu saa en ni nyakɛ saazuo sagbanɛ zuo, ze'ele bɔberɛ deyima ta paaɛ bɔberɛ deyima se'em la, bala mɛa ti a saala dayua wa lɛbega na wan ta ana a dabeha la puan.

²⁵ Gee yia, la dela a ŋmibe namehɛ kãtɛ puan, ti zina beere nɛreba wa zagehɛ en.

²⁶ Wuu lan daa ani se'em Nowa saŋa la, bala mɛa ti lan wan ta ana Asaala Dayua dabeha la puan.

²⁷ Nɛreba yuum diti mɛ gee nyuura, gee dita pɔgeba gee ɛleha ba kɔma, ta paaɛ daan se'ere daarɛ ti Nowa kɛ̃ daka la puan la, ti ko'om la uue na di ba za'a.

²⁸ La ta yeti la ana mɛ wuu Lɔti dabeha la puan la. Nɛreba la yuum diti mɛ gee nyuura, da'ara, gee kɔɔha, buta gee mɛta,

²⁹ gee daan se'ere daarɛ ti Lɔti yehe Sodom la, ti Saazuo ni bugum, la tahi bugum bahɛ na sagum ba za'a.

³⁰ La ta yeti la ana la bala Asaala Dayua la niirɛ daarɛ la.

³¹ De daarɛ, fum se'em en boi gɔhegɔ, gee ti fum lɔgerɔ bɔna deen, da le sige deen ti fum dikɛ. Bala mɛa ti se'em en boi va'amen, da lebe yire na.

³² Tɛri ya Lɔti pɔga la.

³³ Se'em en ti'ihɛ ti a wan ta'am gu' a vom, wan bɔregɛ bu bahɛ, gee se'em en wan bɔregɛ a vom bahɛ wan tara vom.

³⁴ N yeti ya mɛ wa, ti de daarɛ, nɛreba bayi' wan ta lagum gã'a suŋɔ kuyina zuo, ti ba dikɛ ayima gee bahɛ ayima.

³⁵ Pɔgehi siyi wan ta bɔna nɛɛren nɛɛna, ti ba dikɛ ayima gee bahɛ ayima.” [

³⁶ Buraahi siyi wan ta bɔna va'amen kɔɔra, ti ba dikɛ ayima, gee bahɛ ayima. Diimen diimen gulehegɔ tuseto ka tari ka'lam]

³⁷ Ŋwana ti a zahereba la soke en yeti, “Daana, bɛha ti la wan iŋɛ?” Ti a yele ba yeti, sɛla en ki zi'an la, ziiro tiiheni la bilam.