Aluki 14 - ZE'ELEGO PAALEGA

Yezu tibɛ buraa iŋa n pɔgelum

¹ Zi'an kayima ti Yezu ta yɛ'a, Farasiiduma nɛŋa daana ayima yire ti a ta di, vo'ohego dabeherɛ. Ti ba kɔ'ɔm pigera en nima nima.

² Bala ma'a la ti buraa iŋa za'a n pɔgelum en ze' Yezu nɛŋan.

³ Ti Yezu ta soke yetɔge tɔgereba la la Farasiiduma la yeti, “La de sore ti fum tibɛ nɛreba vo'ohego dabeherɛ puan bii la dagi?”

⁴ Ti ba sina. Bala ti Yezu yi' buraa la na, tibɛ ka gee bahɛ ti ka kiŋɛ.

⁵ Ti a nyaa yele ba yeti, “Ya se'em han tara bombila bii lɔlega ti ka lu bulega puan, ya kan yaaɛ ka kalam bulega la puan vo'ohego dabeherɛ la puan?”

⁶ Ti ba ka ta'am wan lerege yele ana wa.

Sigehe mɛŋa, la itesuŋɔ

⁷ Yezu en nyɛ ti saama la woo demehe nɛŋa duma kugehi la se'em la, ti a makɛ makerɛ dina wa bo' ba yeti,

⁸ “Nɛra han yi' fum a pɔgedire de'eŋo puan ti fum kiŋɛ, da paaɛ zi'ire nɛŋa duma kugehi la zuo, daanse'ere nɛrezure boi ha gana fum ti ba yi' en.

⁹ Se'em daana en yi' yamam bayi' la ta'am ta wa'am me na yele fum yeti, ihege ka'lam gee dikɛ bahɛ ti ena tee zi'ire bini. Bala ma'a la, fum nyaa ihegere mɛ la fagehum, ta zi'ita zi'an en boi tiŋa.

¹⁰ Gee ba han ni yi' ya zi'an ti fum ta paaɛ bini, kiŋɛ ta zi'ire kuge se'ehi en yeen zɛ'a bini la, ti se'em en yi' fum la han wa'am na, a wan yele fum yeti, n zɔ wa, ihege zom saazuo kugehi wa puan. Bala ti fum wan tara zuo sɛba woo en zi' la fum bimbine la zuo la.

¹¹ Se'ere en sɔi la, sɛba woo en zɛkeri ba mɛhi, ba wan sige ba tiŋa, ti sɛba woo en sigehe ba mɛhi tiŋa, ba wan zɛkɛ ba.”

¹² Gee nyaa yele se'em en yi' en la me yeti, “Fum han yi'ira nɛreba ti ba wa'am fum yire na di wuntɛɛŋa, bii zaanuurɛ, da ni yi' fum zɔduma bii fum suurɔ bii fum nɛreba, bii kpɛ'ɛnduma sɛba en kɛ̃'ɛ̃ri lɛm fum ma'a, ti ba me wan ta yi' fum me lerege zuo, la ba lebehe yɔ hɔ

¹³ Gee fum han yi'ira nɛreba ti ba wa'am na di la hɔ, yi' naheduma, kɔɔrenɔ, wɔbehi la fɔɔhi la na.

¹⁴ Ŋwana ti fum wan nyɛ sum, se'ere en sɔi la, bamam kan ta'am lebehe yɔ hɔ. Fum wan ta to'e fum yɔɔrɛ la tuntɔɔduma vo'ore la.”

De'eŋo kãtɛ makerɛ

¹⁵ Saama la ayima n lagum bɔna dia la puan la n wum ŋwana la, ti a yele Yezu yeti, “Sum wan bɔna la sɛba n wan ta bɔna Yinɛ sɔ'ɔlum la puan dita la!”

¹⁶ Ti Yezu yele en yeti, “Nɛra ayima en daa iŋɛ de'eŋo kãtɛ nyaa yi' nɛreba zo'e zo'e.

¹⁷ Ti dia la saŋa ta paaɛ ti a tum a da'aba ti a kiŋɛ ta yele sɛba woo ti a yi' la yeti, ‘Wa'ana gee sɛla woo maahum ba'ahɛ.’

¹⁸ Gee ti nɛreba la za'a pɔhɛ suhera sore. Yia daana la yeti, ‘Mam nan kɔ'ɔm da' la samanɛ, ti la dɛna n kiŋɛ de puan zina wa. Bala n beleni fum mɛ ti n kan ta'am wa'am na.’

¹⁹ Ti a yima me yeti, ‘Mam nan kɔ'ɔm da' la n nii kɔɔri i kɔɔhum bunuu, bɔta ti n dikɛ i kɔ bihɛ zina, bala n beleni fum mɛ, ti n kan ta'am wa'am na.’

²⁰ Ti ayima me yeti, ‘Mam nan kɔ'ɔm di la pɔgesaaŋa bala zuo n kan ta'am wa'am na.’

²¹ Ŋwana ti da'aberɛ wa lebe ta yele a kpɛ'ɛma wa sɛla en iŋɛ. Ti kpɛ'ɛma wa suure nyiie, ti a yele a da'aberɛ wa yeti, ‘Yehe kiŋɛ sadɔkãra la sadɔbibehi woo zuto, la fum yi' naheduma, kɔɔrenɔ, fɔɔhi la wɔbehi woo ti ba la fum tari ba ka'lam na.’

²² Ti Da'aberɛ wa ta lebena yele ka daana wa yeti, ‘Fum yeti n iŋɛ se'em la tum ya, gee fole kelum bɔna.’

²³ Ti kpɛ'ɛma wa le yele da'aberɛ wa yeti, ‘Le yehe sadɔkãra la, la sadɔbibehi la zuto, la fum darɛ nɛreba wa'am na pirɛ n yire wa.

²⁴ N yeti fum mɛ wa, ti sɛba woo ti mam yi' ba yia la, ba se'em nuurɛ kan vɛkɛ mam dia wa la fii me.’ ”

Yezu poore dɔlega sanɛ

²⁵ Nɛrekuuŋɔ n kini la Yezu, ti a ta ŋmɛregɛ yele ba yeti,

²⁶ “Se'em woo en wa'am mam zi'an na gee ka yaaɛ a sɔ la ma, a pɔga la a kɔma, a kiinduma la a tapa, Ɛ̃ɛ, pun ta ta' la a mɛŋa vom, kan ta'am dɛna mam zahera.

²⁷ Se'em woo n ka zi a pumpuuredɔɔ dɔla mam, kan ta'am dɛna mam zahera.

²⁸ Ya ani en wan yeti ya mɛ dewoko, ka zi'ire yia bihɛ sanɛ se'ere n boi bini la a baŋɛ nyaa a tari zo'e wan mɛ deo la ba'ahɛ yoi?

²⁹ Han dagena bala, a han iibɛ biŋe gee ka ba'ahɛ, se'em woo en nyɛ ɛberɛ la wan ɛregera en

³⁰ yeti, de bɛɛ, ‘Nɛra wa daa pɔhɛ la mɛa, gee ka nyaŋɛ ba'ahɛ.’

³¹ Bii beni naba n wan yɛ'a ti a ta tɛ' pɛɛma la naba kayima, kan zi'ire yia ti'ihɛ bihɛ nyaa a pɛntiireba tuha pia la wan ta'am nyaŋɛ naba kayima la n tari pɛntiireba tuha pihiyi' la?

³² A han bihɛ ti a kan nyaŋɛ, bala ma'a ti naba kana la nan zaaɛ ha la, a wan tum a kima, ti ba tu'uhɛ ba lu en ti suma'ahum wa'am na.

³³ Bala zuo, ya se'em kan ta'am dɛna mam zahera han dagena ya zagehɛ la sɛla woo.

Yaarum yɛla

³⁴ “Yaarum ani suŋa mɛ, gee yaarum han bɔregɛ bu za'ahum bahɛ, bu za'ahum la wan le iŋɛ la ŋwani lebe bu puan na?

³⁵ Bo ka tari tuunɛ bo' samanɛ, bii tampugerɛ. Ba ni kɔ'ɔm lobe yaarum bumɔ bahɛ mɛ. Bahɛ ti se'em n tari tuba ti a wuna, kɛleha!”