Aluki 13 - ZE'ELEGO PAALEGA

Tee ya bii ya bahɛ yoo

¹ Sankana wa puan la, ti nɛreba basɛba boi nɛrekuuŋɔ la puan yele Yezu, Palete en tabelɛ kɔrum Galiliihi, ka'ahɛ ba ziim lagum la ba kaabegɔ la se'em.

² Ti Yezu soke ba yeti, “Ya ti'ihɛ ti Galiliihi sina wa en yuum namehɛ ŋwana wa la dela be'em duma gana Galiliihi la za'a yoi?

³ Aayi, n yeti ya mɛ wa, ti han dagena ya tee mɛ, ya me wan bahɛ yoo wuu lan yuum iŋɛ ba se'em la.

⁴ Bii nɛreba pia la banii la ti Silom dewoko la yuum lu di' ba ku la, ba yuum ba' galum mɛ gana nɛresɛba woo n yuum boi Yerusalɛm sankaŋa la yoi?

⁵ Aayi, mam yeti ya mɛ wa, ti han dagena ya tee mɛ, ya me wan bahɛ yoo wuu lan yuum iŋɛ ba se'em la.”

Kinkandaa makerɛ

⁶ Ti Yezu bo' ba makerɛ dina yeti, “Buraa n sɛ kinkaŋa a va'am puan. Nyaa ta wa'am na ɛɛra kinkama ka zuo, gee a ka nyɛ.

⁷ Bala ti a yele va'am bihera la yeti, ‘Bihɛ, yuuma atã n ŋwana ti n kina kinkaŋa wa tiŋa na ɛɛra kinkama wa'am na paaɛ zina, gee ka malum nyɛta sɛla. Ŋmaaɛ ka bahɛ. Ŋwani ti ka wan zɛ'a Sagena n samanɛ?’

⁸ Ti a lerege yeti, ‘Naa n daana, bahɛ ka yuunɛ ma'a pa'ahɛ. N wan tu' boko kaaɛ ka, bo' ka bugelego,

⁹ ti ka han wam yuunɛ se'ere en kini na la, la ani suŋa, gee ka han ka wam, fum ta'am ŋmaaɛ ka bahɛ.’ ”

Yezu tibɛ pɔka en de kɔɔreŋɔ

¹⁰ Yezu ta pa'ala mɛ zamehegɔ yire deyima puan Vo'ohego dabeherɛ.

¹¹ Ti pɔka en bala wa'am na, ti kulekpa'bɛ'a kaarum ka, yuuma pia la anii. Pɔka wa kɔ'ɔm nyure mɛ uma, kan ta'am tiɛ ze'ele dɔ'ɔ.

¹² Yezu n nyɛ pɔka wa la, a yi' ka mɛ tole nɛŋa na, yele ka yeti, “Pɔka wa, fum nyɛ faarɛ fum bã'a wa puan.”

¹³ En dikɛ a nu'o pagelɛ pɔka wa zuo la, bilam bilam ti pɔka wa tiɛ ze'ele dɔ'ɔ, pɔhɛ pɛgera Yinɛ.

¹⁴ Gee zamehegɔ yire nɛŋadaana la, suure nyiie mɛ la Yezu, la eŋa n tibɛ pɔka la vo'ohego daarɛ la, nyaa nyɔna yɛta nɛrekuuŋɔ la yeti, “Dabeha ayoobe en de tuuma dabeha, wa'am ya dabeha aŋa puan na to'e tibegɔ, gee dagi vo'ohego dabeherɛ la puan.”

¹⁵ Ti Daana la lebehe ba yeti, “Birekɔgenduma wa, Ya woo ka lorene ya lɔlehi bii bohi baha vo'ohego dabeherɛ la, ni tari ba ta nyuuhe?

¹⁶ Ti Pɔka wa en de Aberaham yaaŋa ti Sagena bobe ka tara tara yuuma pia la anii wa la, ka nari ti ka nyɛ ka fai, vo'ohego dabeherɛ puan?”

¹⁷ Yezu en yele ŋwana la, vi en kɛ̃ sɛba woo en ka sakɛ bo' en la. Ti nɛrekuuŋɔ la za'a nyɛɛna, la nyalema sɛ'a ti Yezu tuna la.

Gungumbeeliho makerɛ

¹⁸ Ti Yezu nyaa yeti, “Yinɛ sɔ'ɔlum wa ani wuu bem? N wan dikɛ bɔ makɛ mɛ la bem?

¹⁹ Bo ani mɛ wuu gungumbeeliho ti nɛra tari ta burɛ a va'am bila puan, ti biiliho la yehe lebege tia, ti niihe wa'am na tɛ' ba tugerɔ tia la yila zuo.”

Dabelɛ makerɛ

²⁰ Ti Yezu le yele pa'ahɛ yeti, “N wan dikɛ Yinɛ sɔ'ɔlum wa makɛ mɛ la bem?

²¹ Bu ani mɛ wuu pɔka n dikɛ dabelɛ gɛregɛ zom kunkura atã ŋmɛ ti zom la ta ihege se'em na la.”

Zanɔrɛ mika

²² Ti Yezu dɔla tinkãra, la timbibehi kayima kayima kaara, pa'ala bala yɛ'a Yerusalɛm.

²³ Ti nɛra ayima ta soke en yeti, “Daana, nɛreba fii wa n wan ta nyɛ faarɛ wa?” Ti Yezu lerege ba yeti,

²⁴ “Pɛregɛ ya la ya doohe zanɔrɛ mika la puan kɛ̃. Se'ere en sɔi la, n yele ya ti, nɛreba zo'e zo'e wan zigera ti ba kɛ̃, gee ba kan nyaŋɛ.

²⁵ Yidaana han diŋɛ ihege yu' kuleŋa la, ti fum zɛ'a yiŋa ha ŋmɛ'ɛra gee yi'ira yeti, N daana, yu'ɛ bo' tu, a wan lebehe ya yeti, ‘Mam ka mi' yamam n ze'ele zi'an na.’

²⁶ Ya wan lebehe yele en yeti, tumam la fum en lagum dita gee nyuura, ti fum ni bɔna tu sadɔtɔ zuo pa'ala la.

²⁷ Gee a wan lebehe ya yeti, ‘Mam ka mi' yamam en ze'ele zi'an na, fɔregɛ ya n zi'an, be'em duma wa!’

²⁸ Bilam ti ya wan ta kaaha, gee ɔbera nyɛna, ya han ta nyɛ ti Aberaham, Aziki la Yakɔbe la Yinɛ nɔtɔgeheba la za'a ti ba boi Yinɛ sɔ'ɔlum la puan, gee ti ba lobe yamam mɛhi la bahɛ yiŋa ha.

²⁹ Nɛreba wan ta ze'ele dapɔya, ti sɛba ze'ele zanɔya, ti sɛba ze'ele zuɔ ti sɛba ze'ele gɔbega bɔba na Yinɛ sɔ'ɔlum la puan dita.

³⁰ Yelemɛŋerɛ, sɛba yee la pooren, gee wan ta tole nɛŋa, ti sɛba me tole nɛŋa, gee wan ta yee pooren.”

Yezu kaahɛ bahɛ Yerusalɛm zuo

³¹ Gogo kaareŋa kaŋa mɛa puan, ti Farasiiduma basɛba wa'am na yele Yezu yeti, “Bahɛ ka'lam, gee Faro eere fum mɛ ti a ku.”

³² Ti Yezu yele ba yeti, “Kiŋɛ ya ta yele piihɔ wa bo' mam yeti, ‘A Kɛleha, mam sa'ahɛ la kulekpa'bɛ'ɛhi, gee tibera bã'ahi zina la beere, dabeha atã daarɛ ti n wan ba'ahɛ n tuuma.

³³ Gee zina, beere, la daarɛ, n wan kiŋɛ. Se'ere en sɔi la, la kan ta'am iŋɛ ti ba ku nɔtɔgeha yiŋa, ti a ka bɔna Yerusalɛm puan.’

³⁴ Yerusalɛm, Yerusalɛm, tinsɛka en kuuri ka nɔtɔgeheba, gee lɔbera Yinɛ en tum sɛba na la la kuga. Saŋa woo mam zigeri mɛ ti n kã'ahɛ hɔ bɔbeyinɛ wuu nua en kã'ahɛ ka kɔma iŋɛ ka kelumpagehi puan se'em la, gee fum ka iŋɛ fum puti'irɛ bala.

³⁵ Bihɛ, Fum yire la nyaa boi la fum nu'uhen. N yeti fum mɛ wa, ti fum kan le malum nyɛ mam, gura sansɛka ti fum wan ta tiɛ mam yele yeti, ‘Sum bɔna la se'em en wa'am Daana la yu'urɛ puan na la.’ ”