Aluki 10 - ZE'ELEGO PAALEGA

Zahereba pihiyopɔi la tuunɛ

¹ Yele ana en tole la, tu ti Daana la looe a zahereba basɛba pihiyopɔi, tum ba bayi' bayi', ti ba diŋɛ a nɛŋa, ta kɛ̃ tihi se'ehi woo puan ti eŋa mɛŋa maahum ti a doohe si puan la.

² A yele ba yeti, Hmm! “Dia buŋa la zo'e mɛ, gee ti tuntuneba la pɔ'ɛ. Bala, suhɛ ya Daana la en sɔi va'am la, ti a tum tuntuneba a dia buŋa la puan na.

³ Kini ya. Bihɛ ya, ya ani mɛ wuu pebibehi la, ti n tuna ya sahi puan la.

⁴ Da tari ya ligeri tapɔtɔ, bii sore kinɛ tapɔtɔ, bii tagera. Da teke ya sore zuo pu'uhɛ nɛra ya kinɛ wa puan.

⁵ Yire se'ere woo ti ya yeti ya kɛ̃ de puan, yia ni yele ya yeti, “Suma'ahum bɔna yire wa puan.”

⁶ Ti suma'ahum daana han bɔna bini, ya suma'ahum la, wan sige a daana, gee se'em han ka bɔna bini dɛna suma'ahum daana, ya suma'ahum wan lebe ya zi'an na.

⁷ Yee ya yire dinɛ puan la ya dita gee nyuura sɛla woo ti ba bo' ya, se'ere en sɔi la, tuntuna dela ba yɔ en. Da lomehe ya yiya kaara.

⁸ Sansɛka woo ti ya kɛ̃ tinsɛka woo puan ti ka nɛreba to'e ya, diti ya sɛla woo ti ba bɔ'ɔra ya.

⁹ Tiberi ya bã'duma sɛba woo en boi tiŋa la puan, gee yɛta ba yeti, ‘Yinɛ sɔ'ɔlum la paaɛ ya na.’

¹⁰ Gee sansɛka woo ti ya kɛ̃ tinsɛka puan ti ka nɛreba ka to'e ya, yehe ya ta ze'ele ka sɔya zuto la ya yeti,

¹¹ ‘Ya tiŋa wa puuhego en puke tu nama la n bala ti tu kpa'aha baha wa, ti la dɛna yele gã'a gura ya. Gee la bala za'a, mini ya suŋa ti Yinɛ sɔ'ɔlum la lɛm ya mɛ na.’

¹² N yeti ya mɛ wa, ti dabeherɛ la daarɛ, la wan ana ma'ma' bo' Sodom nyana tihi sina taaba.

Yele boi tinse'ehi n ka sakɛ teere wa zuo

¹³ “Yele boi yamam Korazinduma wa zuo. Yele boi yamam Bɛtesaadaduma wa zuo. Se'ere en sɔi la, mam paŋa n tum daalehum sebo ya puan wa han tum ni la Taai la Sidɔn tihi, ŋwana ma'a ba pun tee ni la wunse'eren ha, yɛ susageŋɔ futo, gã'a tiŋa bilena.

¹⁴ Gakerɛ daarɛ la, la wan ana ma'ma' bo' Taai la Sidɔn tihi nyana yamam.

¹⁵ Yamam Kapɛnum tihi wa me, ya ti'ihɛ ti ba wan zɛkɛ yamam wan yagelɛ la saazuo bii? Aayi, ba wan sigehe ya tiŋa ki'intiŋa.

¹⁶ “Se'em woo en kelehe ya, kelehe la mam. Se'em woo me en zagehɛ ya, zagehɛ la mam. Ti se'em woo me en zagehɛ mam, zagehɛ la se'em en tum mam na la.”

Zahereba Pihiyopɔi la lebena

¹⁷ Ti Yezu zahereba pihiyopɔi la lebena la nyɛɛma, yɛta yeti, “Daana, fum yu'urɛ la zuo, kulekpa'bɛ'ɛhi nam tumam mɛ!”

¹⁸ Ti a yele ba yeti, “Mam nyɛ Sagena la en ze'ele saazuo ha luta na wuu bugum pãrehi la.

¹⁹ Bihɛ ya, n bo' ya paŋa ti ya niira bunsɛlenduma, nahi, la Sagena la pahi za'a zuto, ti sɛla sɛla kan iŋɛ ya.

²⁰ Gee la bala za'a da nyɛɛni ya la kulekpa'bɛ'ɛhi la n nam ya la, gee tugum tari ya pupeelum ti ya yu'ura gulehɛ gã'a saazuo ha.”

Yezu Nyɛɛma

²¹ Sankaŋa mɛa puan, ti Yezu nyɛɛna Fa'a Sia la puan yeti, “N pu'uhɛ ya n Sɔ, saazuo la tiŋa Daana, la fum en sugɛ yele ana wa yɛm la mi'ilum duma, gee tugum lilege a bo' kɔmbilɛɛhi wa. La dela sira n Sɔ, fum zu'uhegɔ la fum sumboolum n de se'em n bala.

²² Mam Sɔ dikɛ sɛla woo iŋɛ la mam nu'uhen. Se'em ka mi' Dayua la en de se'em han dagena Sɔ la ma'a, bii se'em mina Sɔ la en de se'em, han dagena Dayua la ma'a, la sɛba ti Dayua la mɛŋa looe ba ti a niiɛ Sɔ la pa'alɛ ba la.”

²³ Ti Yezu ŋmɛregɛ tɔ a zahereba la, gee yele ba bããlam yeti, “Sum boi mɛ la nini se'ehi en nyɛ sɛla ti yamam nyɛ wa.

²⁴ N yele ya ti, nɔtɔgeheba, la na'duma zo'e zo'e boti ni ti ba nyɛ yamam n nyɛ sɛla wa mɛ, gee ba ka nyɛ. Ba wum ni yamam n wum sɛla wa, gee ba ka wum.”

Samariya nɛresuŋɔ makerɛ

²⁵ Bilam bilam, ti yetɔge tɔgera ayima vaaɛ ihege ti a makɛ Yezu bihɛ, nyaa yeti, “Pa'ala, beni ti n wan iŋɛ la n ta'am nyɛ vom kamba'ahɛ wa?”

²⁶ Ti Yezu yele en yeti, “Beni en gulehɛ bɔna ze'elego la puan? Fum kãalɛ la beni bini?”

²⁷ Ti a lebehe yeti, “Fum nɔŋɛ Daana Yinɛ, la fum suure za'a, fum Sia za'a, la fum paŋa za'a, la fum puti'irɛ za'a, gee nɔŋɛ fum suuɔ wuu fum mɛŋa la.”

²⁸ Ti Yezu yele en yeti, “Fum kɔ'ɔm lebehe la ma'a. Kɔ'ɔm ita bala gee fum wan vɔna.”

²⁹ Gee buraa wa en boti ka nyɛ buurɔ la, ti ka soke yeti, “Ti ani n nyaa de n mabia?”

³⁰ Ti Yezu lerege en yeti, “Buraa kayima en ze'ele Yerusalɛm sigera Yeriko, ti fãareba ta gu' ka sore, sɛgehɛ ka gee ŋmɛ' ka, gee kiŋɛ gee bahɛ ka ti ka gee kum.

³¹ Ti la iŋɛ, ti malema daana ayima dɔla sore dinɛ mɛa sigera, en nyɛ buraa la, a lɔkɛ doohe la zi'an kayima ha tole.

³² Bala mɛa ti Levi wa'am na paaɛ zi'an la, nyɛ buraa la, gee me lɔkɛ doohe zi'an kayima ha tole.

³³ Gee Samariya n ta yɛ'a tɔla, wa'am na pɔra buraa la, nyɛ buraa la, ti nimbu'ɔ nyɔkɛ en.

³⁴ Ti ka sige paaɛ en, ka'ɛ kaam la daam duuhe en, gee pɔgeleŋɔ la lu', gee ɔ̃begɛ en pagelɛ a mɛŋa buŋa zuo, tari en paaɛ saama ga'aregɔ yire, bihɛ en.

³⁵ Ti yiimbeere ti a dikɛ ligeri wuu dabeha ayi yɔɔrɛ bo' se'em en biheri saama ga'aregɔ yire la, gee yele en yeti, ‘Bihera buraa wa suŋa bɔ'ɔra mam, ti n han ta tulege na ti sanɛ se'ere woo bɔna, n wan yɔ.’

³⁶ Ba ani batã wa puan, ti fum ti'ihɛ ti a dela buraa wa n lu fãareba nu'uhen wa mabia?”

³⁷ Ti yetɔge tɔgera la lerege yeti, “Se'em n zɔ a nimbu'ɔ la.” Ti Yezu yele en yeti, “Me kiŋɛ ta iŋɛ bala mɛa.”

Yezu kiŋɛ ta bihɛ Maata la Mɛɛri

³⁸ Ban boi sore zuo yɛ'a la, ba ta paaɛ la timbila kayima puan, ti pɔka bɔna bini ti ka yu'urɛ yi'ira Maata, yi' Yezu kule a yire.

³⁹ Maata wa me tari la a suuɔ yu'urɛ en yi'iri Mɛɛri, kɔ'ɔm zi'a Daana la nɛŋan kɛleha sɛla ti a tɔgera la.

⁴⁰ Gee ti Maata yee kiileŋɔ la tuuma. Bala ti a wa'am na soke Yezu yeti, “N Daana, Fum ka nyɛti n suuɔ wa bahɛ mam ti mam kɔ'ɔm kiilena la tuuma wa n ma'a? Yele en ti a ihege na suŋɛ mam.”

⁴¹ Gee Daana la yele en yeti, “Maata, Maata, la daani fum mɛ, ti fum puti'irɛ ka gã'a tiŋa la tuuma kekeko la zuo,

⁴² gee yele deyina ma'a n pakɛ. Mɛɛri looe la yele suŋa ti nɛra kan ta'am to'e ka a zi'an.”