Afilmõ 1 - ZE'ELEGO PAALEGA

Pu'uhegɔ

¹ Pɔɔl, se'em ti ba page en Kiresta Yezu zuo, la Timoti tu suuɔ. N guleheri bɔ'ɔra la Filemɔn tu zɔ ti tu suure nɔŋɛ, la tu tuntuna tadaana,

² n kelum guleha bɔ'ɔra la Afiya, tutã la Arekipus en de tu pɛntiira tadaana, la lageŋɔ seko en boi fum yire la.

³ Zu'uhegɔ bɔna la ya, la suma'ahum en ze'ele Yinɛ tu Sɔ, la tu Daana Yezu Kiresta zi'an na.

Filemɔn nɔŋerɛ la sakerɛ

⁴ Mam han ta tiɛ fum yele n pu'uhegɔ puan, mam ni bɔ'ɔra la Yinɛ fara saŋa woo,

⁵ se'ere en sɔi la, mam wum fum nɔŋɛ Yinɛ tuulum nɛreba la woo se'em, la fum sakerɛ Daana Yezu puan.

⁶ Mam pu'uheri mɛ ti fum wan tara fum sakerɛ la tuna, fum han bɔkɛ tuunsuma sɛ'a za'a ti tu tara Kiresta puan la.

⁷ Yelemɛŋerɛ, mam puurɛ ba' pee mɛ la kpemehego seko en ze'ele fum nɔŋerɛ puan, beni zuo, tuulum nɛreba la suya malum gã'a la timpaberɛ fum puan, n suuɔ.

Pɔɔl suhega

⁸ Dina wa zuo, la mam n pun tara paŋa Kiresta puan, ti n bo' fum nuurɛ ti fum tum fum tuunɛ,

⁹ gee mam wan tugum suhɛ fum la nɔŋerɛ puan, se'ere en sɔi la mam Pɔɔl nyaa kuregɛ mɛ, gee me le bɔna paka deen Kiresta Yezu zuo.

¹⁰ Mam sɔheri fum mɛ n bia Onesimuse zuo, mam dela a Sɔ n paka saŋa la.

¹¹ A daa ka tari vuurɛ bo' fum, gee nananawa, a tari vuurɛ bo' fum, ta ta' la mam me.

¹² N dikeri en bɔ'ɔra fum me na, la en pun dɛna mam suure bia la, en dikeri en bɔ'ɔra fum me na.

¹³ Mam boti ni ti a boni mɛ la mam, la a sooe ni fum na'arɛ tuna bɔ'ɔra mam ban daa pagɛ mam faarɛ yelehum wa zuo la;

¹⁴ gee n ka boti n iŋɛ sɛla gee ti fum ka mina, ti fum tuunsuma la wan dɛna la fum suure en boti gee dagi sɛla en de pɛregerɛ.

¹⁵ Daanse'ere bala en sɔi ti a daa yehe fum zi'an saŋa fii wa, gee a wan lebe na bɔna la hɔ wuuha,

¹⁶ a han lebe na a kan le dɛna da'aberɛ, a gana da'aberɛ mɛ, a dela sunɔŋerɛ suuɔ bu — yele yele mam, gee la wan gana bala fum zi'an, inganɛ puan, la Daana la me puan.

¹⁷ Bala la, fum han nam ti tu lagum tuna mɛ, to'e en wuu fum wan to'e ni mam se'em la.

¹⁸ A han tuue fum se'ere puan, bii a tari la fum sanɛ, bahɛ ti la dɛna mam sanɛ.

¹⁹ Mam Pɔɔl mɛŋa n gulehɛ gɔŋɔ wa la n nu'o. Mam wan lebehe yɔ dɛ. Mam ka yele se'ere la fum mɛŋa en tari mam sanɛ la pun ta ta' fum mɛa.

²⁰ Ɛ̃ɛ n suuɔ, bahɛ ti n nyɛ nyuurɔ dina fum puan Daana la zuo! Bahɛ ti n suure gã'a timpaberɛ Kiresta puan.

²¹ Mam mi' suŋa suŋa ti fum wan nam mam guleheri bɔ'ɔra fum wa, mam mi' ti, fum wan pun iŋɛ gaŋɛ mam en yele fum sɛla wa.

²² Yele Yinɛ en gee — maahum saama bɔ'ɔ bo' mam, mam tari puti'irɛ ti, fum pu'uhegɔ puan n wan bɔna la hɔ.

Ba'ahegɔ pu'uhegɔ la ka'a

²³ Epafarase, se'em ti ba lagum pagɛ en la mam Kiresta Yezu zuo la, pu'uhi fum na,

²⁴ bala mɛa ti Maki, Aristakuse, Demase la Luki, n tuntuna tadaanduma la me pu'uhi fum na.

²⁵ Daana Yezu Kiresta zu'uhegɔ bɔna la fum sia.