3 Zã 1 - ZE'ELEGO PAALEGA

Gayɔse itesuŋɔ pɛka

¹ Kiima la, en gulehɛ bɔ'ɔra n sunɔŋerɛ Gayɔse, se'em ti n nɔŋɛ la yelemɛŋerɛ.

² N sunɔŋerɛ daana wa, mam pu'uhegɔ dela sɛla woo kina suŋa bɔ'ɔra hɔ, ti fum tara inma'ahum wuu lan ani suŋa se'em la fum sia la.

³ Mam puurɛ ba' pee mɛ tole, n zɔduma la basɛba en paaɛ na tɔgɛ fum en tari sakerɛ se'em yelemɛŋerɛ la puan, yele yele wuu fum boi yelemɛŋerɛ la puan se'em la.

⁴ Mam ka tari pupeelum kãtɛ gana ŋwana, ti n wum ti n kɔma boi yelemɛŋerɛ la puan.

⁵ N sunɔŋerɛ daana wa, fum tuni mɛ la yelemɛŋerɛ puan, sɛla woo ti fum ita bɔ'ɔra zɔduma la, la ban pun dɛna saama bo' fum la.

⁶ Ba yele fum nɔŋerɛ la yele mɛ lageŋɔ la nɛŋan. Fum wan iŋɛ suŋa, fum han wan iŋɛ ba suŋa ti ba tole, wuu Yinɛ en boti de se'em la.

⁷ Se'ere en sɔi la, ba pɔhɛ ba sore wa la Kiresta zuo, ka tɔ'ɔha suŋɛ sɛba n ka pa' ahɛ tu puan la zi'an.

⁸ Bala, tu dela tu suŋera nɛrebamam taaba, ti tu lagum dɛna tuntuneba yelemɛŋerɛ tuuma la puan.

Diyoterefise la Demetereyose

⁹ Mam gulehɛ sɛla bo' lageŋɔ la. Gee Diyoterefise en boti a dikɛ a mɛŋa iŋɛ ba nɛŋa daana la ka bihɛ nyɛ tumam kpe'eŋo la.

¹⁰ Bala, n han wa'am na, n wan bahɛ ti a baŋɛ en iti sɛla la, en dole yiregera pumpɔreŋɔ seko bɔ'ɔra tumam la. Ti bala ka seke en, ti a zagehɛ ti a kan to'e zɔduma la, gee gu'ura sɛba en boti ba iŋɛ bala la, pun ta sa'ahɛ ba lageŋɔ la puan.

¹¹ N sunɔŋerɛ daana wa, da tɔgeha sɛla en de be'em, gee tugum tɔgeha sɛla en ani suŋa. Se'em woo en iti sum ze'ele la Yinɛ zi'an na, se'em woo en tuni be'em nan ka nyɛ Yinɛ.

¹² Nɛra woo tɔgeri la sum yɛhera Demetereyose yɛla, bala mɛa ti yelemɛŋerɛ sore la me tɔgera a yele. Tumam me tɔgera a yele la bala, fum me mi' ti tumam en tɔgeri se'ere la dela yelemɛŋerɛ.

Ba'ahegɔ pu'uhegɔ

¹³ N tari la yɛla zo'e zo'e wan gulehɛ bo' fum, gee n tugum kan gulehɛ a iŋɛ gɔŋɔ puan,

¹⁴ gee n iŋɛ la n puti'irɛ ti n kan yuue gee nyɛ hɔ, ti tu nyɛta taaba gee sɔhɛ.

¹⁵ Suma'ahum bɔna la hɔ. Zɔduma la pu'uhi hɔ na. Pu'uhɛ zɔduma la en boi bilam la, nɛra woo a yu'urɛ a yu'urɛ.