2 Timoti 4 - ZE'ELEGO PAALEGA

¹ Yinɛ, la Kiresta Yezu nɛŋan, se'em en wan gakɛ vɔpa la ki'induma la, la a lɛbega na, la a sɔ'ɔlum la zuo, n kageri fum mɛ la ninmu'urɛ.

² Muula yelehum la, kɔ'ɔm zɛ'a mɛ kankaŋi, sum saŋa bii be'ero saŋa, tɔgera tɛɛra, tahɛ, kpɛmeha, la pa'alegɔ sugeri zo'e, zo'e.

³ Gee saŋa la kini na, ti nɛreba kan bɔta yelemɛŋerɛ pa'alegɔ, gee ban tari tuba en zakeni la, ba wan kã'ahɛ pa'aleba bo' ba mɛhi, wuu ba kɔrehi la en boti se'em la.

⁴ Gee wan biri pɔya, kan kɛleha yelemɛŋerɛ la, gee tuuna yɛ'a solum yooro puan.

⁵ La han dɛna fum, saŋa woo ta'na fum mɛŋa tara suŋa, ŋmibera namehegɔ puan, tuna ayehemuulɛ daana tuuma, tum fum tuunɛ ba'ahɛ suŋa suŋa.

⁶ Nananawa, la han dɛna mam, ba pun ka'ɛ mam mɛ wuu kaabegɔ ko'om la, mam ye'ehego saŋa paaɛ ya.

⁷ Mam zabɛ la zabesunɛ, mam ba'ahɛ n zua la, mam gurɛ en sakerɛ la mɛ.

⁸ Nananawa yɛ'a ha, sɛla en dikɛ biŋe gura mam dela, tuuntɔɔ vom muŋa, sɛka ti Daana la en de tuuntɔɔ gakera la, wan dikɛ bo' mam de daarɛ, gee dagi mam ma'a, gee sɛba woo en me guri Yezu lɛbega na la.

Pɔɔl mɛŋa kã'aŋɔ

⁹ Kpeŋe fum mɛŋa gee wa'am n zi'an kalam na,

¹⁰ se'ere en sɔi la, Demase en nɔŋɛ zina beere tiŋa wa la, bahɛ mam gee kiŋɛ la Tɛsalonika tiŋa. Gee Kiresensi kiŋɛ Galatia, ti Taitusi me kiŋɛ Dalematiya tiŋa.

¹¹ Luki ma'a en boi la mam ka'lam. Ɛ Maki la fum doohe en na, se'ere en sɔi la, a tari tuulum mam la tuuma wa puan.

¹² Mam tum Takikuse la Ɛfisu.

¹³ Fum han kina na, tari n fuwoko la ti n bahɛ la Kapuse en boi Torowase tiŋa la, la gɔnɔ la, yele yele woo gɔnɔ seto ti n kilum la.

¹⁴ Alɛgezanda se'em en kuti la ba' pɔgelum mam mɛ, Daana wan lebehe yɔ en a be'em tuuma la.

¹⁵ Yamam me dela ya mina a yele, se'ere en sɔi la, a kɔ'ɔm mum la nini zagehɛ tumam yelehum la.

¹⁶ Mam wa kiŋɛ yia ti n tɔgɛ n nuurɛ la, nɛra daa ka ze'ele ti a suŋɛ mam, gee ba za'a zagehɛ mam mɛ. Yinɛ bahɛ ba taalɛ bo' ba.

¹⁷ Gee Daana la en ze'ele la mam, gee bo' mam paŋa, ti doohe mam puan, yelehum la wan muulɛ suŋa, ti sɛba en dagi Yuuduma la wan wam dɛ. Bala ti a faaɛ mam gbigenɛ nuuren la.

¹⁸ Daana la wan faaɛ mam be'em zaberɛ woo puan bahɛ, gee tara mam kɛ̃ a saazuo sɔ'ɔlum la puan. Eŋa en sɔi na'ahegɔ wuuha wuuha. Taari.

Ba'ahegɔ pu'uhegɔ la ka'a

¹⁹ Pu'uhɛ Pirisila la Akuila, la Onesiforuse yire duma.

²⁰ Pu'uhɛ Erastuse en yee Korinti, la Tirofimuse en ka paaɛ a mɛŋa ti mam bahɛ en Militusi la.

²¹ Kpeŋe fum mɛŋa la fum wa'am na gee ti ko'oro saŋa paaɛ. Yubuluse pu'uhi fum na, bala mɛa ti Pudɛnsi, Linuse, Kulodiya la tu suurɔ za'a pu'uha fum na.

²² Daana la bɔna la hɔ sia, zu'uhegɔ bɔna la hɔ.