2 Timoti 3 - ZE'ELEGO PAALEGA

Ba'ahegɔ dabeha be'em

¹ Fum dela fum mina dina wa, ti, ba'ahegɔ dabeha la, sukpɛlehi saŋa wan wa'am na.

² Se'ere en sɔi la, nɛreba wan nɔŋɛ ba mɛhi, nɔŋɛ ligeri, nyɔ'ŋmɛ'ɛreba, nɛre wureba, kɛhega, ka nana dɔgereba, nini ka tigera, dɛgerɔ vom,

³ ka tara giile, ka dita sugeri, yu'sageneba, ka tana nyɔkera ba mɛhi, sukãberɛ, kiha sum,

⁴ taaba ŋma'a, bura bura, pa'alɛ mɛŋa, nɔŋɛ nyɛlum gana a nɔŋɛ Yinɛ,

⁵ kɔ'ɔm gurɛ yiŋa tuunsuma, gee zagehɛ Yinɛ paŋa la. Lɔkera ba.

⁶ Se'ere en sɔi la, ba puan basɛba dela sɛba en kɛ̃'ɛ̃ri yiya puan pã'aha pɔgese'ehi en de geto, pirɛ la be'em, ti kɔrehi woo tana ba,

⁷ ti ba pa'ala ba saŋa woo gee ba kan malum baŋɛ yelemɛŋerɛ la.

⁸ Wuu Yenesi la Yamberese en yuum ka sakɛ bo' Moose se'em la, bala ti nɛrebana wa en tari putɛ'be'o la sakerɛ se'ere en dagi yelemɛŋerɛ wa, me ka sakɛ bo' yelemɛŋerɛ la.

⁹ Gee ba kan ba' nyɛ nɛŋa tɔlega bala, beni zuo, wuu lan daa ani se'em buraahi siyi la puan la, bamam gɔɔn tuuma la me wan niiɛ peelumen ti nɛra woo nyɛ.

Pɔɔl kagɛ Timoti

¹⁰ Nananawa, fum Timoti, mi' mam pa'alegɔ, la mam aŋa, mam puti'irɛ en de se'em vom puan, n sakerɛ, n sugeri, n nɔŋerɛ, mam n ze' kankaŋi se'em,

¹¹ n mɛlehegɔ la n namehegɔ, la yelesɛ'a en paaɛ mam Antiyoke, Ikonium la Lisitera tihi, namehegɔ seko ti n ŋmibera ku puan! Gee la bala za'a, Daana la faaɛ mam ba za'a puan bahɛ mɛ.

¹² Yelemɛŋerɛ, sɛba woo en boti ba vɔna Yinɛ zoolum vom Kiresta Yezu puan, wan nyɛ mɛlehegɔ.

¹³ Gee tuunfi'iha duma, la pumpã'ahum duma wan ze'ele sageŋɔ paaɛ nɔyalegerɛ. Ba wan pã'aha basɛba, ti basɛba me pã'aha ba.

¹⁴ Gee han dɛna fum, bɔna sɛla ti fum zamehɛ la puan, gee nam suŋa suŋa, mina se'em daana zi'an ti fum zamehɛ a la,

¹⁵ ze'ele fum biilemen na, fum mi' fa'a gulehegɔ wa, en wan ta'am pa'alɛ fum ti fum nyɛ faarɛ doohe sakerɛ Kiresta Yezu puan.

¹⁶ Gulehegɔ la za'a ze'ele la Yinɛ Fa'a Sia la puan na, ana suŋa ti ba tara pa'ala, tahera, dɛmeha, la tuuntɔɔ vom kpemehego,

¹⁷ bala ti se'em woo en de Yinɛ dinɛ wan seke, bi'ɛ wan ta'am tum tuunsunɛ woo.