2 Timoti 2 - ZE'ELEGO PAALEGA

Kiresta Yezu pɛntiira suŋa

¹ Nananawa, fum n bia wa, kpe'em mɛ la zu'uhegɔ seko en boi Kiresta Yezu puan la,

² la sɛla ti fum wum mam zi'an nɛreba zo'e zo'e nɛŋan la. Dikɛ bo' yelemɛŋerɛ duma sɛba en wan ta'am pa'alɛ basɛba me.

³ Lagum nameha wuu fum de Kiresta Yezu pɛntiira suŋa la.

⁴ Nɛra ka boi tuna pɛntiireba tuuma, gee le gɛ̃ta a mɛŋa la daare woo yɛla. Pɛntiira puti'irɛ dela a pee a daana la puurɛ.

⁵ Gee mina en zoti puan, nɛra ka boi zɔta dita mi'a gee ka zɔ doohe zua ze'elego la.

⁶ Kaara se'em n kɔ la, eŋa en de a to'e a tɔtɛ va'am dia la puan yia.

⁷ Ti'ihɛ mam en yele fum sɛla wa, se'ere en sɔi la, Daana la wan bo' fum bɔkerɛ sɛla woo puan.

⁸ Tɛra ti Yezu Kiresta ihege mɛ a kum la puan, a dela Deviti yaaŋa, mam faarɛ yelehum en bala.

⁹ Dina zuo ti mam nyɛ namehegɔ too, pun ta paaɛ ba ba' mam wuu tuunfi'iha daana la. Gee Yinɛ yelehum ka ba'ari.

¹⁰ Bala zuo, mam ŋmiberi mɛ sɛla woo puan, sɛba ti ba looe la zuo, ti ba me nyɛ faarɛ se'ere en boi Kiresta Yezu puan, la na'ahegɔ seko en ka tari ba'ahegɔ la.

¹¹ Yetɔge buna wa dela yelemɛŋerɛ, ti tu han ki mɛ la en, tu me wan vɔna la en,

¹² Tu han ŋmibe, tu me wan di na'am la en, Tu han zagehɛ en, a mɛ wan zagehɛ tɔ,

¹³ Tumam han ka tara sakerɛ, eŋa nuun dela a sakerɛ daana. Se'ere en sɔi la, eŋa kan ta'am zagehɛ a mɛŋa.

Tuntuna sɛka ti Yinɛ looe

¹⁴ Tiɛ ba dina wa, gee kagɛ ba la ninmu'urɛ Yinɛ nɛŋan, ti ba bahɛ ba tara yɛla ŋmɛ'ɛra nɔkpɛ'ɛma, sɛla en ka tari suŋɛ, gee Sagena kɛleheba la.

¹⁵ Kpeŋe fum mɛŋa la fum kaabɛ fum mɛŋa suŋa bo' Yinɛ wuu se'em ti Yinɛ mɛŋa nam la. Tuntuna sɛka en ka de a zɔta valum, pa'ala yelemɛŋerɛ yelehum la tuuntɔɔ.

¹⁶ Lɔkera sɛba en tɔgeri yetɔge yaalehi, se'ere en sɔi la, bu wan tari nɛreba malum kɛ̃ dɛgerɔ yɛla puan.

¹⁷ Ba tugum la wan taaɛ wuu kɔhi kɛka la. Nɛre bana wa basɛba dela Hɛmenayɔse la Filetuse,

¹⁸ sɛba en buregɛ yelemɛŋerɛ pa'alegɔ la puan, yɛta ti ihegere la pun iŋɛ mɛ. Ba dole tulena la basɛba sakerɛ.

¹⁹ Gee Yinɛ ɛ̃berɛ la kɔ'ɔm zɛ'a la kankaŋi, tara daalehum buna wa: “Daana la mi' sɛba en de a dinɛ.” Bala la, bahɛ ti “Sɛba woo en yi'iri Daana la yu'urɛ la yehe ba mɛhi be'em puan.”

²⁰ Yikãtɛ puan, lɔgerɔ boi bini mɛ, gee dagi la salema la salempɛɛla lɔgerɔ ma'a, gee dɔɔrɔ la yɔgerɔ lɔgerɔ. Basɛba dela la tuulum lɔgerɔ, basɛba mɛ dela tuni woo lɔgerɔ.

²¹ Sɛba woo en pee ba mɛhi yehe yele sɛ'a ti n yele wa puan, wan dɛna tuulum lɔgerɔ en yehe ze'ele, tari tuunɛ bɔ'ɔra yire la daana. Maahum gura tuunsunɛ woo.

²² Zɔ yehe bumbile paalumen kɔrehi puan, gee dɔla tuuntɔɔ vom la ninmu'urɛ, sakerɛ, nɔŋerɛ la suma'ahum la sɛba en pu'uhi Yinɛ la susunɛ la.

²³ Da tara sɛla ita la geto la nɔkpe'en yooro. Fum mi' ti, ba tari la zaba kina na.

²⁴ Daana la tuntuna ka de a dɛna zabe-zabera, gee a ana ma'ma' la nɛrawoo, a tana pa'ala gee tara sugeri.

²⁵ A pa'ali sɛba en ka sakeri bɔ'ɔra en la, la sigehe mɛŋa. Ani en mi,Yinɛ ta'am bahɛ ti ba tee gee baŋɛ yelemɛŋerɛ la,

²⁶ la ba ta'am piiɛ bumbɛ'a bɛregɔ la, bamam sɛba ti a pun nyɔkɛ ti ba dɛna a da'aba ti ba tum a puti'irɛ la.