2 Timoti 1 - ZE'ELEGO PAALEGA

Pu'uhegɔ

¹ Pɔɔl, Kiresta Yezu tuntuna, Yinɛ suboolum puan, doohe nɔbiŋere la en biŋe doohe vom sebo en boi Kiresta Yezu puan la zuo.

² N gulehɛ bɔ'ɔra la Timoti en de mam sunɔŋerɛ dayua. Zu'uhegɔ, nimbɔ'zɔrɛ, la suma'ahum en ze'ele Yinɛ en de tu Sɔ la, la Kiresta Yezu tu Daana la zi'an na, bɔna la hɔ.

Fara bu'a la kpemehego

³ Mam suure pee mɛ la Yinɛ, se'em ti mam pu'uha la putɛ'sunɛ, wuu mam sɔyaabe duma en yuum iti se'em la, wuu mam en tɛri fum yele saŋa woo se'em n yu'uŋɔ la wuntɛɛŋa pu'uhegɔ puan.

⁴ Mam en tiiheri fum nintam la, n kɔ'ɔm bɔta ti n nyɛ fum mɛ, ti n poore pee.

⁵ La tiiheri mam mɛ fum yelemɛŋerɛ sakerɛ la yele, sakerɛ se'ere en yuum boi fum mayaaba Lois puan yia, tagelɛ fum ma Yunise, ti nananawa, mam mina ti de boi fum me puan.

⁶ Dɛna zuo ti mam tɛɛra hɔ ti fum malum gbirege Yinɛ bo'olum sebo en boi fum puan, ti mam daa dikɛ n nu'uhi pagelɛ fum zuo pu'uhɛ la,

⁷ se'ere en sɔi la, Yinɛ ka bo' tu la dabeem Sia, gee a tugum bo' tu la Sia en tari paŋa, la nɔŋerɛ, la fum mɛŋa tarega.

⁸ Bala zuo da tara valum la tu Daana yɛla la muulegɔ, bii mam se'em en boi paka deen a zuo la, gee naaɛ la mam, namehɛ faarɛ yelehum wa zuo, dɛla Yinɛ paŋa la,

⁹ se'em en faaɛ tɔ, gee yi' tu tuulum yi'a, dagi la tu tuuma zuo, gee eŋa mɛŋa en boti se'em, la a zu'uhegɔ zuo. Zu'uhegɔ kuna wa dikɛ bo' tu doohe la Kiresta Yezu puan, diimen diimen ha,

¹⁰ gee de nyaa niiɛ mɛ na, doohe tu Faara Kiresta Yezu niirɛ na la puan, se'em en wa'am na sagum kum paŋa, gee tari vom la sɛla en ka kiiri, ti la niiɛ peelumen na, doohe faarɛ yelehum la puan.

¹¹ Faarɛ yelehum buna wa ti ba looe mam ti n dɛna bu muula, bu tuntuna, la bu pa'ala,

¹² dina wa zuo ti mam nameha wuu mam en namehɛ se'em wa. Gee vi ka tari mam, se'ere en sɔi la, mam mi' se'em ti mam delum en la mɛ, N me mi' suŋa suŋa ti a wan ta'am gura mam ta paaɛ de daarɛ, la sɛla ti a dikɛ iŋɛ mam puan la.

¹³ Gurɛ yelemɛŋerɛ pa'alegɔ la suŋa, sebo ti fum wum mam zi'an la, la sakerɛ la nɔŋerɛ se'ere en boi Kiresta Yezu puan la.

¹⁴ Tara tuulum yelesɛ'a en dikɛ iŋɛ fum puan la suŋa, doohe la Fa'a Sia la en boi tu puan la.

¹⁵ Fum mi' ti sɛba woo en boi Esiya tiŋa la zagehɛ mam mɛ, bamam basɛba dela, Figeluse la Hɛmogenese.

¹⁶ Daana la wan zɔ Onesiforuse yire duma za'a nimbu'ɔ, beni zuo, a dela se'em en baheri ti mam puti'irɛ gã'a tiŋa, ti vi ka tara en la mam bãhi wa.

¹⁷ Eŋa paaɛ Arome tiŋa la, a ɛ mam mɛ la ninmu'urɛ ta nyɛ mam,

¹⁸ Daana la bahɛ ti a ta nyɛ nimbɔ'zɔrɛ Daana la zi'an de daarɛ. Fum me mi' en tum zo'e se'em Ɛfisu puan.