2 Tesaloniki 3 - ZE'ELEGO PAALEGA

Pu'uhɛ ya bɔ'ɔra tɔ

¹ Ba'ahegɔ puan, n suurɔ, pu'uheri ya bo'ori ya tɔ, ti Daana yelehum la yiregɛ kalam gee nyɛ na'ahegɔ zi'an woo, wuu bumɔ en ani se'em ya puan wa,

² gee ti tumam me piiɛ putɔpa, la nɛre ŋmɛlema duma nu'uhen. Se'ere en sɔi la, dagi nɛra woo en tari sakerɛ.

³ Gee Daana la dela yelemɛŋerɛ daana. A wan sɛ ya ze'ele, gee gu' ya nɛrebɛ'a la zi'an.

⁴ Tumam nam Daana la mɛ ya zuo, ti ya iti, gee wan kelum ita yelesɛ'a za'a ti tu bo' ya nuurɛ ti ya ita la.

⁵ Daana la bahɛ ti ya suya kiŋɛ Yinɛ nɔŋerɛ, la ŋmibega Kiresta puan.

Zinyageduma ka'agɔ

⁶ Nananawa, tu bo'ori ya la nuurɛ tu zɔduma, Daana Yezu Kiresta yu'urɛ puan ti, ya zaaɛ la sakereba sɛba en vɔi zinyagerɛ vom, ka dɔla la pa'aleŋɔ la ti ba to'e tumam zi'an la.

⁷ Se'ere en sɔi la, ya mɛhi mi' yan de ya tɔgehɛ tumam se'em. Tu daa dagi zinyage duma tumam n daa boi la ya la,

⁸ tu daa ka di se'em dia gee ka yɔ. Gee tu daa tuni mɛ gee wɔbegera muregere yu'uŋɔ la wuntɛɛŋa, ti tu da dɛna zeero bo' ya se'em.

⁹ Ŋwana dagi la tu ka tari la sore ti tu soke ya tumam en boti sɛla, gee tu boti tu iŋɛ biŋe mɛ ti ya tɔgehɛ.

¹⁰ Se'ere en sɔi la, tumam en daa pun bɔna la ya la, tu bo' ya nɔdina wa mɛ yeti, “Se'em en ka boti a tum, da di.”

¹¹ Tumam wum ti ya sɛba vɔi la zinyagerɛ vom, yeen kiilena, ka tara tuun vua.

¹² Nananawa, nɛre bana taaba wa, tu bo'ori ya nuurɛ, gee ka'ana ya Daana Yezu Kiresta puan, ti nɛra woo tum ti a nu'o paaɛ a nuuren .

¹³ N suurɔ, da taregɛ ya la itesuŋɔ.

¹⁴ Mini ya sɛba en ka nam sɛla ti tu yɛta ya gɔnkuna wa puan wa. Da tari ya sɛsɛla ita la ba, bala ti vi wan di ba,

¹⁵ gee la bala za'a, da bihɛ ya ba wuu ba dela ya dinduma, gee ka'ani ya ba la ninmu'urɛ wuu ya suurɔ la.

Ba'ahegɔ pu'uhegɔ, la ka'a

¹⁶ Nananawa, suma'ahum Daana la mɛŋa wan bo' ya suma'ahum saŋa woo, sadɔɔ seko woo puan. Daana la bɔna la ya za'a.

¹⁷ Mam Pɔɔl, n gulehɛ pu'uhegɔ kuna wa la n mɛŋa nu'o. Ŋwana wa en de daalehum mam gɔŋɔ woo puan, mam n gulehɛ se'em n bala.

¹⁸ Tu Daana Yezu Kiresta zu'uhegɔ bɔna la ya za'a.