2 Tesaloniki 2 - ZE'ELEGO PAALEGA

Be'em daana

¹ Gee han dɛna tu Daana Yezu Kiresta kinɛ na la, la tumam n wan ta lagehɛ taaba bɔna la en la, tu beleni ya mɛ, tu suurɔ,

² ti ya da bu'ura ya puti'ira puan, bii ya pabegɛ Sia puan bii yelehum bii gɔŋɔ seko en zi'im ze'ele tumam zi'an na yɛta ti, Daana dabeherɛ la pun paaɛ mɛ.

³ Da bahɛ ya ti se'em pã'ahɛ ya sadɔɔ seko puan. Se'ere en sɔi la, daan dinɛ daarɛ la kan wa'am na, han dagena pobiriga la n wa'am yia na. Se'em daana en ka kihi yele la, niiɛ a mɛŋa na, se'em ti la pun maahum biŋe ti a nyɛ sageŋɔ la.

⁴ A ka sakɛ bo' se'em, gee zɛkɛ a mɛŋa gana sɛla woo ti ba yi'ira yinɛ bii na'ahegɔ daana woo, la a nyaa ta'am tara a kuka Yinɛ pu'uhegɔ yire puan, dikɛ a mɛŋa lebege Yinɛ.

⁵ Yamam ka tɛri ti mam pun yele ya yele ana wa, mam daa kelum bɔna la ya la?

⁶ Ya mi' sɛla en gu'uri be'em daana wa kinɛ nananawa mɛ, gura a ta niiɛ a mɛŋa, a saŋa la han ta paaɛ.

⁷ Se'ere en sɔi la, se'em daana en ka kihi yele la nyaleŋɔ la pun tuna mɛ, gee la wan niiɛ la se'em ma'a ti se'em en gu'uri a paŋa nananawa la ta bahɛ.

⁸ Bala ma'a ti se'em daana en ka kihi yele wa nyaa wan niiɛ a mɛŋa na, se'em ti Daana Yezu wan sagum en la a nuurɛ sabeeo, diihe en vi doohe a lɛbega la puan na.

⁹ Se'em daana en ka kihi yele la kini na niiɛ mɛ Sagena la tuuma puan, se'em en tari pahi woo, kirehi, la pumpɔreŋɔ nyalema tuuma,

¹⁰ la pa'ahegɔ kãra woo, bɔ'ɔra sɛba en wan bahɛ yoo, ban zagehɛ ba nɔŋɛ yelemɛŋerɛ la ba nyɛ faarɛ la.

¹¹ Ŋwana zuo ti Yinɛ tum pa'ahegɔ paŋa na, ti ka bahɛ ti ba nam bo' pumpɔreŋɔ,

¹² ti la bahɛ ti sɛba woo n ka nam yelemɛŋerɛ la, gee dikɛ la kunkɔma'ahum la dɛgerɔ tuuma la nyɛ sageŋɔ.

Ba looe ya bo' la Faarɛ

¹³ Gee tumam dela tu bɔ'ɔra Yinɛ fara saŋa woo ya zuo, n suurɔ ti Daana la nɔŋɛ wa, se'ere en sɔi la, Yinɛ en looe ya ti ya dɛna wala diina faarɛ puan, doohe Fa'a Sia la en pee ya la, la yan nam yelemɛŋerɛ la.

¹⁴ Dina zuo, ti a yi' ya doohe tumam n muulɛ faarɛ yelehum la bo' ya la, ti ya ta'am tara tu Daana Yezu Kiresta suŋa la.

¹⁵ Bala zuo, n suurɔ, sɛ ya ze'ele kankaŋi, gee gurɛ ya pa'ali seko ti tu pa'alɛ ya la. La dɛna tu nuurɛ pa'alegɔ, bii tu gulehɛ la gɔŋɔ bo' ya na.

¹⁶ Nananawa, tu Daana Yezu Kiresta mɛŋa, la Yinɛ en de tu Sɔ se'em en nɔŋɛ tɔ gee doohe a zu'uhegɔ puan, bo' tu sumbugehum la beere putɛ'sunɛ en ka tari ba'ahegɔ la,

¹⁷ bugelɛ ya suya, gee kpemehe ya suya tunsuma woo la yetɔge sumɔ woo puan.