2 Pita 3 - ZE'ELEGO PAALEGA

Daana kinɛ nɔbiŋere

¹ Nananawa n zɔduma wa, n yi'i gɔŋɔ en ŋwana ti n guleha bɔ'ɔra ya na wa. N gɔnɔ wa puan, n zigeri ti n gbirege la ya putɛ' sunɛ la ti ya tara la, doohe mam tiiheri ya,

² ti ya tɛra yelehum la en tɔgɛ bo' ya yuuman yuuman ha doohe tuulum nɔtɔgeheba la puan la, la nɔsɛ'a ti tu Daana, la tu Faara la tɔgɛ doohe a tuntuneba puan la.

³ Yia, ya za'a dela ya bɔkɛ ti, ba'ahegɔ dabeha la puan, sinsɛhi wan wa'am na, sɛna la ba mɛhi kunkoma'ahum,

⁴ gee yɛta ti “A lɛbega na nɔbiŋere la yee la bɛ? Tu sɔyaabe duma en tole na ki ba'ahɛ la, sɛla woo kelum bɔna la lan yuum boi se'em timpaberɛ wa naaŋɔ puan na la.”

⁵ Ba kɔ'ɔm mina mɛ gee zagehɛ yelemɛŋerɛ dina wa, ti Yinɛ yelehum la en naam saazuo wa yuuman yuuman la timpaberɛ wa, la ko'om wa en gã' wa,

⁶ ko'bumɔ mɛa en yuum di timpaberɛ wa, ti ka za'a sagum la.

⁷ Yelehum bumɔ mɛa en tɔgɛ biŋe, ti zina beere saazuo la timpaberɛ wa gura ba sige bugum puan la. Ba gã' gura la gakerɛ dabeherɛ la, la sɛba en ka zoti Yinɛ la sageŋɔ dabeherɛ la.

⁸ Gee da bahɛ ya yelemɛŋerɛ dina wa, n sunɔŋerɛ duma, ti Daana la zi'an, daan yinɛ ani mɛ wuu yuuma tuha la, ti yuuma tuha ana wuu daan yinɛ la.

⁹ Daana la ka gu'uni a nɔbiŋere la, wuu sɛba en ti'ihɛ gu'uŋɔ se'em la, gee a di'ihe la suure la ya, ka bɔta ti se'em bahɛ yoo, gee ya za'a wa'am na tee.

¹⁰ Gee Daana dabeherɛ la yeti la wa'am me na wuu nageyiga la, ti saazuo wa mɛlum la voole kãtɛ, ti bugum nyɛlegɛ lɔgerɔ, ti sɛla woo en boi timpaberɛ wa zuo nyɛlegɛ la bugum.

¹¹ Yele ana za'a en wan ta nyɛlegɛ ŋwana la, yan wan dɛna nɛre sɛba taaba dela, ya vɔna Yinɛ tuulum vom, la Yinɛ zoolum vom,

¹² gura, gee bɔta ti Yinɛ kinɛ na dabeherɛ la wa'am kalam na, beni zuo, de daarɛ ti saazuo wan taaɛ bugum mɛlum, ti sɛla woo wan nyɛlegɛ la bugum la?

¹³ Gee, doohe a nɔbiŋere la puan, tu guri la saazuo paalega, la timpaberɛ paalega, sɛka puan ti tuuntɔɔ vom bɔna la.

Ba'ahegɔ kã'aŋɔ

¹⁴ Bala, n sunɔŋerɛ duma wa, yan guri yele ana wa la, zigɛ ya mɛ ti ya nyɛ en la suma'ahum, ti dɛkɔ ka lama ya, bii tuure,

¹⁵ gee biheri ya tu Daana sugeri la ti bu dɛna tu faarɛ zuo. Bala mɛa ti tu sunɔŋerɛ suuɔ Pɔɔl guleha bɔ'ɔra ya, la yɛm sebo ti Yinɛ dikɛ bo' en la,

¹⁶ tɔgera yele ana wa yele wuu en iti se'em a gɔnɔ woo puan la. Yɛla asɛ'a boi a gɔnɔ la puan ti a bɔkerɛ kpe'em, ti sɛba en ka mi' la, la sɛba en ka ze' bɔbeyinɛ la ŋmɛreha a, tari sageŋɔ kina ba mɛhi zuto na, wuu ban pun ita vom gɔŋɔ la luga a sɛ'a se'em la.

¹⁷ Ŋwana zuo la, yamam n sunɔŋerɛ duma wa, mam en te'ele ka'am ya la zuo, bihɛ ya suŋa ti yalum duma wa tuure la da ve'e ya kiŋɛ ti ya da ta'am ze'ele ya mɛŋa.

¹⁸ Gee tugum zo'ore ya zu'uhegɔ, la ya mi'ilum tu Daana la tu faara Yezu Kiresta puan. Eŋa ti pɛka za'a dɛna a dinɛ, nananawa ta paara dabeherɛ se'ere en ka tari ba'ahegɔ la. (Taari.)