2 Pita 2 - ZE'ELEGO PAALEGA

Pumpɔreŋɔ nɔtɔgeheba, la ba namehegɔ

¹ Gee nɔtɔgeheba pumparenduma en yuum ihege na bɔna nɛreba la puan, wuu pumparenduma pa'aleba en wan bɔna ya puan se'em la, sɛba en wan li'ihɛ tari sageŋɔ puti'ira wa'am ya puan na. Ba wan pun ta zagehɛ ba Daana se'em en da' ba la, tari sageŋɔ wa'am ba mɛhi zuo na kalam.

² Gee bala za'a, zo'e zo'e wan dɔla ba yaalegɔ sadɔtɔ la. Pumpɔrum-pa'aleba wa zuo, nɛreba wan tuura yelemɛŋerɛ sore wa.

³ Ba nyika la zuo, ba wan fa' ya la ba pã'ahegɔ yelehum la. Ba namehegɔ la en purɛ bahɛ ba zuo yuuman yuuman ha la, dagi yoo, ba sageŋɔ la kan gã'arɛ.

⁴ Se'ere en sɔi la, Yinɛ yuum han ka bahɛ suŋereba, ban yuum tum be'em la, gee lobe ba bahɛ bugum timpaberɛ, ba' ba la bahɛ lika puan ha, ti ba bɔna bilam gura gakerɛ,

⁵ Yinɛ yuum han ka bahɛ diimen diimen saŋa la, la eŋa en yuum pun faaɛ Nowa, se'em en muulɛ tuuntɔɔ vom yele la, la nɛreba bayopɔi basɛba la, gee yuum bahɛ ti ko'om di sankaŋa be'em buuri la.

⁶ En yuum bahɛ ti Sodom la Gomora tihi lebege tampɛgelum, sagum ba puga puga ti maalegɔ ka bɔna la, ti ba dɛna makerɛ pa'alɛ sɛla en wan wa'am be'em duma zuo na la.

⁷ Gee yuum faaɛ Lɔti en de tuuntɔɔ nɛra, gee yuum dita ɛregɔ a buuri saŋa yaalegɔ tuuma la zuo la,

⁸ (Se'ere en sɔi la, tuuntɔɔ buraa wa, boi la ba mɛ beere en yilegeri woo, nyɛta namehegɔ a tuntɔɔnɛ sia puan, ba yaalegɔ tuuma la ti a nyɛta gee wuna la zuo),

⁹ bala, Daana la mi' en faari tuuntɔɔ duma magehegɔ puan se'em bahɛ mɛ, gee bahɛ ti be'em duma bɔna namehegɔ puan gura gakerɛ dabeherɛ la,

¹⁰ yele yele wuu sɛba en tari ba ihi tuna yaalegɔ tuunsɛ'a taaba, la sɛba en ka zoti kpe'eŋo seko woo la. Ba kpe'em mɛ, ti ba suya kãbɛ, ti ba ka zɔta ba sagum Saazuo pãkara duma yu'ura,

¹¹ ti suŋereba en tugum kpe'em, dɛna paŋa duma, ka malum tara tuurɛ yɛla gakeri ba Daana la nɛŋan.

¹² Nɛrebana wa ani mɛ wuu duhi gɔɔnɔ la, ba yeen dɛna la bunvɔɔhi en ka tari vuurɛ, ti ba yeen dɔgɛ ba ti ba nyɔgɛ ba ku la. Ba tuurɛ la sɛla ti ba ka bɔkɛ, ti ba han ta sagum bunvɔɔhi sina la ba'ahɛ, ba wan sagum bamam me.

¹³ Ba namehɛ la ba tuure namehegɔ. Ba dikɛ dɛ ti la dɛna la nyɛlum bo' ba, ti ba ɛɛra dita dikãra peelumen peelumen. Ba dela nɛrefi'iha, la zufagehum duma, nɔŋɛ ba dita ba dikãra mɛa la fagehum ya nɛŋan.

¹⁴ Ba nini kɔ'ɔm biha la yaalegɔ yɛla ma'a, ka tigera be'em. Ba ta' pa'aha la sɛɛhi se'ehi en ka ze' suŋa la. Ba zamehi ba suya la nyika. Nɔpɔrɛ kɔma en de ba!

¹⁵ Ba bahɛ tuuntɔɔ sore la mɛ gee tuuna, dɔla Balaam, Boso dayua la sore la, se'em en nɔŋɛ be'em yɔɔrɛ,

¹⁶ ti a mɛŋa be'em wa tahɛ en la. Boŋa en ka ta' tɔgera en wa tɔgɛ asaala kua bo' en, gu' nɔtɔgeha wa a zɔlegɔ tuunɛ la puan.

¹⁷ Nɛre bana wa dela bulekɛ'ɛhi, dɛna pika ti kusebego pɛ'ɛra kina. La dela bana ti lika paaɛ paaɛ pun maahum biŋe gura ba la.

¹⁸ Se'ere en sɔi la, ba ta' pageri la page yooro, tara ba yaalegɔ kunkoma'ahum la, pa'ahɛ nɛresɛba en nan kɔ'ɔm piiɛ sɛba en boi be'em puan la.

¹⁹ Ba biŋere ba nɔya, ti fai wan bɔna, gee ba mɛhi dela ŋmɛlema tuuma da'aba. Se'ere en sɔi la, nɛreba dela da'aba bo' sɛla woo en ta' ba.

²⁰ La han dɛna ti, ban piiɛ timpaberɛ wa zuo galeŋɔ la, doohe ban mi' tu Daana, la tu faara Yezu Kiresta la, ba le lebe lu la ba puan, ti la nyaŋɛ ba, ti ba'ahegɔ puan, ba pun nyaa yalegɛ nuurɛ gana ba yia la mɛ.

²¹ La ani ni suŋa bo' ba, ti ba pun da baŋɛ ni tuuntɔɔ sore la, nyana ban baŋɛ dɛ gee biri ba poore bahɛ fa'a ze'elego la ti ba yuum dikɛ bo' ba la.

²² La iŋɛ ba doohe la yelemɛŋerɛ tɔgɛ biŋere la en yeti, “Baa lebere la ka tiiro puan la,” la, ba sɔɔri kurikuri ti ka lebe ta lirum la bɛgerɔ puan.