2 Pita 1 - ZE'ELEGO PAALEGA

Pu'uhegɔ

¹ Mam Simɔn Pita, en de yameŋa, dɛna Yezu Kiresta tuntuna la, en gulehɛ bɔ'ɔra sɛba en doohe Yinɛ la Faara Yezu Kiresta tuntɔɔnɛ la puan to'e sakerɛ en de tuulum lɔkɔ wuu tumam dinɛ la.

² Zu'uhegɔ la suma'ahum en pirɛ paaɛ dɛna ya dinɛ doohe yan mi' Yinɛ, la tu Daana Yezu Kiresta se'em la.

Kiresta kɔma yi'a, la ba loore

³ Yinɛ sia puan paŋa la bo' tu sɛla woo ti tu bɔta, ti tu ta'am vɔna gee tara Yinɛ zoolum doohe tumam mi' se'em daana en yi' tu a mɛŋa suŋa, la a itesuŋɔ puan la.

⁴ Bala ti a doohe yele ana wa puan, bo' tu a tuulum nɔbiŋe kãra la, ti bamam puan, ya wan ta'am piiɛ ŋmɛlema sɛ'a en boi timpaberɛ wa zuo, kunkoma'ahum zuo la, gee tugum lagum tara a sia puan naanɛ la.

⁵ Putɛ'dina zuo la, kpeŋe ya mɛŋa sadɔɔ seko woo puan, la ya tiregɛ ya sakerɛ la, la tunsuma. Ti tuunsuma la puan, mi'ilum pa'ahɛ bini,

⁶ ti mi'ilum la puan, zulaam bɔŋa pa'ahɛ bini, ti zulaam bɔŋa la puan, ŋmibega pa'ahɛ bini, ti ŋmibega la puan, vom sumɔ pa'ahɛ bini,

⁷ ti vom sumɔ la puan, taaba giile pa'ahɛ bini, ti taaba giile la puan, taaba nɔŋerɛ bɔna bini.

⁸ Yele ana han sirum bɔna ya puan, gee malum pa'aha ya puan, la wan gu', ti ya ka tara tɔregɔ, gee gu' sɛla en wan bahɛ ti ya kan wuna yan mi' tu Daana Yezu Kiresta la.

⁹ Se'em woo en koŋe yele ana wa, ka nyɛti zaara, dɛna fua, gee me tamena ti Yinɛ duuheri a be'em sebo en tole la bahɛ mɛ.

¹⁰ Ŋwana zuo, n suurɔ, kɔ'ɔm mu'ɛ ya nini ti ya pa'alɛ, ti Yinɛ en yi' ya gee looe ya. Se'ere en sɔi la, ya han ita yele ana, ya kan malum sɛregɛ.

¹¹ Bala, ya han ita ŋwana, ya kɛ̃'a tu Daana, la tu Faara Yezu Kiresta sɔ'ɔlum la en ka tari ba'ahegɔ la puan, wan yu'ɛ yɔlaam bo' ya.

¹² Ŋwana zuo, mam ku n puti'irɛ mɛ ti n tiihera ya yele ana wa, la yan pun mina a, gee sɛ zɛ'a yelemɛŋerɛ se'ere en wa'am ya zi'an na la.

¹³ Mam ti'ihɛ ti la de la ma'a ti mam nan boi timpaberɛ zuo sugerɛ wa en kan yuue wa puan la, n malum tiihɛ ya,

¹⁴ la mam pun mi' ti n kum dabeha ka zaaɛ, n wan yehe sugerɛ wa puan wuu tu Daana Yezu Kiresta en niiɛ de se'em bo' mam la.

¹⁵ N me wan kpeŋe n mɛŋa sadɔɔ seko woo puan, ti n han ta bahɛ timpaberɛ wa zuo, ya wan ta'am tiiha yele ana wa, sansɛka woo puan.

Aze'nyɛduma en nyɛ Kiresta suŋa la se'em

¹⁶ Tumam ka yeen kɔ'ɔm dɔla la pumpɔreŋɔ kãra sɔlema, tumam en bahɛ ti ya baŋɛ tu Daana Yezu Kiresta paŋa, la a lɛbega na la, gee tumam dela aze'nyɛduma bo' a pankãtɛ la.

¹⁷ Se'ere en sɔi la, a to'e la na'ahegɔ la pɛka Yinɛ en de Sɔ la zi'an. Doohe la kɔsɛka en wa ze'ele Pɛntiireba za'a Daana la zi'an tɔgɛ bo' en na yeti, “Mam Dayua en ŋwana, mam Dayɔba'arɛ, se'em ti mam nini tigɛ.”

¹⁸ Tumam mɛhi en daa wum kua wa en ze'ele saazuo ha tɔgɛ bahɛ na. Tumam en daa boi la en tuulum zoore la zuo.

¹⁹ Bala, tumam en tari purega yelehum la yelemɛŋerɛ. La wan ana ya suŋa, ya han kpeŋe ya mɛhi kɛleha yelehum wa en de butolela niira lika puan wa, gura ti beere ta yilegɛ, ti bulika belum ŋma'arɛ niira ya suya puan.

²⁰ Yia, ya mina ti purega ka boi gɔŋɔ la puan dɛna asaala mɛŋa puti'irɛ,

²¹ beni zuo, purega ka tabelɛ ze'ele asaala sumboolum puan na, gee saaleba, buraahi la pɔgehi en ze' zulaam, ti Fa'a Sia la tɔgɛ Yinɛ zi'an doohe ba puan.