2 Korẽntɩ 9 - ZE'ELEGO PAALEGA

Yerusalɛm Pu'uhereba suŋerɛ

¹ Nananawa, la ka pakɛ ti n gulehɛ Nɛresunduma tuuma la yele bo' ya.

² Se'ere en sɔi la, mam mi' ti ya ninmu'urɛ la n de mam nyu'ɔ ŋmɛ'a la ti mam tara ya ŋmɛ'ɛra bɔ'ɔra Masedoniya tiŋa nɛreba yeti, Akaiya pun maahum mɛ yuunɛ n tole ha la, ti yamam ninmu'urɛ la n gbirege nɛreba zo'e zo'e.

³ Gee mam tuni tu suurɔ wa na ti, tu nyu'ɔ ŋmɛ'a la ti tu tara ya ŋmɛ'ɛra la kan dɛna zaŋa dina wa puan. Bala la, ya wan maahum, wuu mam n pun yele se'em ti ya wan maahum la.

⁴ Han dagena bala, Masedoniya nɛreba basɛba han doohe la mam wa'am na nyɛ ti ya ka maahum, la wan dɛna vi bo' tu, mam pun kan yele ya se'ere yele dina puan.

⁵ Bala ti mam ti'ihɛ ti la nari ti n yele suurɔ wa ti ba diŋɛ nɛŋa wa'am ya zi'an na, la ba te'ele maahum bo'olum kãtɛ wa ti ya biŋe nuurɛ ti ya bo' wa, ti bu dɛna pupeelum bo'olum gee dagi pɛregerɛ bo'olum.

⁶ Lan de se'em la dela, Se'em daana n buti yaara yaara, kɛ̃'ɛ̃ri la yaara yaara, ti se'em me n buti yabi yabi me kɛ̃'ɛ̃ri la yabi yabi.

⁷ Nɛrawoo bo' wuu en maahum a suure ti a bo' se'em la. Dagi la a bɔ'ɔra la susageŋɔ bii a bɔ'ɔra la pɛregerɛ. Beni zuo, Yinɛ nɔŋɛ la se'em en bo'ori la pupeelum.

⁸ Ti Yinɛ wan ta'am bo' ya maalegɔ sɛlawoo puan ti la zo'e gaŋɛ, bala ti saŋa woo ya wan tara sɛla woo ti la seke, ti ya ta'am tɔrɛ ti la zo'e ya itesuŋɔ wuu puan.

⁹ Wuu lan gulehɛ se'em ti, “A bo'ori la yabi yabi, a bo'ori naheduma mɛ, a tuuntɔɔ tuuma la boi la wuuha.”

¹⁰ Yinɛ se'ere en bo'ori bumbuura ti ba buta, gee bɔ'ɔra buum ti ba dita la, wan bo' ya, gee nɔbɛ ya bumbuura ti ya wan burɛ, gee nɔbɛ ya tuuntɔɔ vom wala la ti ya kɛ̃' zo'e zo'e.

¹¹ Yamam za'a wan pãrɛ mɛ sɛla woo puan, la ya pupeelum bo'olum kãtɛ wa n wan bahɛ ti tumam ze'ele tu nama zuo bo' Yinɛ fara fara.

¹² Se'ere en sɔi la, yamam en tum tuun-dina wa la, dagi la ya bo' la nɛresunduma la ma'a, gee bu ɔlegeri mɛ la fara bu'a zo'e zo'e bɔ'ɔra Yinɛ.

¹³ Doohe la tumam en makɛ ya bihɛ la tuun-dina wa taaba la, ya bo' Yinɛ yu'urɛ pɛka mɛ la yan nam gee sakɛ bo' Yezu faarɛ yelehum la se'em la, la ya pupeelum tɔrega la ti ya tɔrɛ la ba, la basɛba me se'em la.

¹⁴ Ba nɔŋɛ ya, gee pu'uha bɔ'ɔra ya la Yinɛ zu'uhegɔ seko en ka tari makerɛ ti Yinɛ ka'ɛ bahɛ ya la zuo.

¹⁵ Fara fara dɛna Yinɛ dinɛ la a bo'olum sebo n ka tari makerɛ wa.