2 Korẽntɩ 8 - ZE'ELEGO PAALEGA

Yinɛ pu'uheba bu'a

¹ Sɛla me en boi dela tu boti ya baŋɛ mɛ tu suurɔ, doohe la Yinɛ zu'uhegɔ la ti a bo' lageŋɔ seto woo en boi Masedoniya tiŋa la.

² La, ban daa pun nyɛ namehegɔ kãra, nyɛ nɔŋɔ pɛɛlega la, ba nyɛɛma kãtɛ la ti ba tara la bahɛ ti ba bo' mɛ zo'e zo'e

³ Mam nini en nyɛ se'ere la, ba za'a iŋɛ la ba suure la bu'a, bɔ'ɔra ban tari sɛla, pun ta bo' gaŋɛ ban tari sɛla la.

⁴ 4 Pun ta bɛlena tumam ninmu'urɛ la ban nyɛ yɔ'ɔ seko ti ba lagum bo' sɛla tuunɛ wa puan suŋɛ nɛresunduma wa la,

⁵ la yele dina me, dagi ti tumam en yeen daa ti'iha, gee ba dikɛ la ba mɛhi bo' Daana la yia, gee nyaa dikɛ ba mɛhi bo' tumam me wuu Yinɛ suboolum n de se'em la,

⁶ ti tu ta'am tɔgɛ la Taitusi yeti, wuu eŋa n pun pɔhɛ la, a kɔ'ɔm ba'ahɛ pupeelum bo'olum tuunɛ wa ti ya dikɛ wa.

⁷ Nananawa, yamam en zo'ore sɛla woo puan se'em la, sakerɛ, tugum, mi'ilum, yiŋa yɛla ninmu'urɛ, la yan nɔŋɛ tu se'em la, bala mɛa ti tu bɔta ti ya me zo'e la pupeelum bu'a wa puan.

⁸ Mam ka yeti dina ti la dɛna la n bo' ya la nuurɛ, gee n boti n dikɛ la ya yelemɛŋerɛ nɔŋerɛ la makɛ la basɛba ninmu'urɛ.

⁹ Se'ere en sɔi la, yamam mi' pupeelum bo'olum sebo ti tu Daana Yezu Kiresta bo' doohe la en pun dɛna buntata la, gee yamam zuo ti a lebege naha, ti a nɔŋɔ la puan yamam wan dɛna buntateba.

¹⁰ Yele dina wa puan ti mam zɛ'ɛta bɔ'ɔra ya kã'aŋɔ. La dela de sore bo' yamam sɛba n pɔhɛ yuunɛ n tole ha iŋɛ sɛla la. La dagi la ya yeen iŋɛ la sɛla, gee ya suya n kɔ'ɔm nɔŋɛ ti ya ita sɛla la.

¹¹ Bala, kɔ'ɔm tum ya de ba'ahɛ, ti ya ninmu'urɛ la doohe la yan tum de ba'ahɛ se'em la yan tari sɛla la.

¹² Se'ere en sɔi la, ninmu'urɛ han bɔna, ba to'ore nɛra woo n tari sɛla ti a bo' la mɛ, gee dagi nɛra n ka tari sɛla.

¹³ Mam yeti se'em wa dagi la n bahɛ ti ya sɛba zɛ'a fai gee ti la wuna ya sɛba, gee sɛla woo dɛna ma'a ma'a bo' ya

¹⁴ yamam tarega nananawa wan bɔ'ɔra bamam ti bamam me tarega wan ta tee bɔ'ɔra yamam me, ti sɛla woo ti sɛla woo dɛna ma'a ma'a.

¹⁵ Wuu lan gulehɛ se'em yeti, “Se'em n tari zo'e, ka ba' tara gaŋɛ, ti se'em n tari fii me ka ba' tara ti la pɔ'ɛ” la.

Taitusi yele

¹⁶ Gee fara bo'ori la Yinɛ, se'em n kalum Taitusi suure, ti a nini mu'ɛ la ya wuu mam mɛŋa nini en mu'ɛ la ya se'em la.

¹⁷ Se'ere en sɔi la, dagi la a yeen to'e la tumam suhega la ma'a, gee a nini mu'ɛ mɛ gana saŋa woo, ti a mɛŋa daa pun maahum wa'am ya zi'an na la.

¹⁸ Tu tuni Taitusi mɛ la tu suuɔ kuyima en de nɛre kãtɛ tara zuo lageŋɔ la woo puan, muula faarɛ yelehum la mɛ.

¹⁹ Gee dagi bala ma'a, gee lageŋɔ la looe en mɛ ti a lagum ɛɛra la tɔ, tumam en dole ka'ahera nɔŋerɛ bo'olum tuuma wa, ti la dɛna na'ahegɔ bɔ'ɔra tu Daana la mɛŋa, gee me pa'alɛ tu susunɛ wa.

²⁰ Tu iŋɛ tu puti'ira mɛ ti se'em da zɛregɛ tɔ doohe pupeelum bo'olum wa ti tu ka'ahera wa.

²¹ Tumam iŋɛ tu puti'ira ti tu tum la sɛla n de ma'a, dagi la Daana la ma'a nɛŋan, gee saaleba nɛŋan me.

²² Bama en ye' na la, tu tuni la tu suuɔ seko ti tu viihɛ en saŋa zo'e zo'e puan, nyɛ ti a dela ninmu'urɛ daana yɛla zo'e zo'e puan, gee a nini nyaa pun mu'ɛ gana yia la mɛ la en nam ya paaɛ paaɛ se'em la.

²³ Han dɛna Taitusi, eŋa dela mam zɔ la mam tuntuna tadaana ya tuuma la puan, gee han dɛna tu suurɔ seto en dole la, bamam dela lageŋɔ la bitunehi, ti Kiresta nyɛta pɛka.

²⁴ Bala zuo la, ze'ele ya lageŋɔ la nɛŋan la ya pa'alɛ ba ya nɔŋerɛ, la se'ere zuo ti tu tari ya ŋmɛ'ɛra tu nyu'ɔ la.