2 Korẽntɩ 7 - ZE'ELEGO PAALEGA

¹ Tumam n diŋɛ tara nɔbiŋe-ana wa la, n suurɔ, bahɛ ya ti tu pee tu mɛhi ingɔŋɔ la sia puan galeŋɔ woo puan. Tu bahɛ ti tuulum vom pirɛ, doohe tu Yinɛ zoolum puan.

Pɔɔl pupeelum

² Bo' ya tu zi'an ya suya puan. Tumam ka tuue ya se'em, tu ka galum se'em, tu ka bihɛ ya se'em yoo.

³ Mam ka yeti ŋwana ti n zɛregɛ ya mɛ, se'ere en sɔi la, mam pun diŋɛ yele yeti, ya boi la tumam suya puan, ti tu wan lagum ki la taaba bii tu lagum vɔna la taaba.

⁴ Mam tari ya saŋa woo ŋmɛ'ɛra n nyu'ɔ. Mam tari ya pagera mɛ. Buga buga nyaa pirɛ mam mɛ. Nyɛɛma n pirɛ mam tu namehegɔ la woo puan.

⁵ La tumam n daa pun ta kɛ̃ Masedoniya tiŋa na la, tu ihe wa daa ka nyɛ vo'ohego, gee tu daa kɔ'ɔm nyɛta la namehegɔ zi'an woo. Nɔkpɛ'ɛma la sɛba en ka pa'ahɛ tu puan, la dabeem sebo n boi tumam mɛhi tiŋasuka.

⁶ Gee Yinɛ, se'em n bugelɛ se'em suure n sagum la, bugelɛ tu suya mɛ la Taitusi paaɛ na.

⁷ Gee dagi Taitusi kinɛ la ma'a, gee subugehum sebo ti yamam daa bugelɛ a suure, ti a wa'am na yɛta tɔ yan boti ya nyɛ mam se'em, yan kele se'em, yan mu'ɛ nini se'em la. Ti la bahɛ ti mam me nyɛɛna, kɔ'ɔm kelum nyɛɛna yɛ'a ha.

⁸ La ha pun dɛna la mam sagum la ya suya doohe la n gɔŋɔ la, mam ka lebere pooren, (n lebe pooren se'ere en sɔi la, n daam la ya suya la n gɔŋɔ la. N nuun daam ya suure, gee la yeen dɛna la saŋa fii wa).

⁹ Nananawa, mam nyɛɛni mɛ, ti la dagena la ya suya n sagum la, gee ya susageŋɔ la bahɛ ti ya nyɛ la suteere. Ya nyɛ Yinɛ zoolum susageŋɔ, bala ti ya susageŋɔ la ka daam tɔ sadɔɔ seko puan.

¹⁰ Se'ere en sɔi la, Yinɛ zoolum susageŋɔ bo'ori la suteere se'ere en bo'ori faarɛ ti pooren lɛbega ka bɔna. Gee tiŋa zuo susageŋɔ bo'ori la kum.

¹¹ Bihɛ ya yelemɛŋerɛ se'ere ti Yinɛ zoolum susageŋɔ wa iŋɛ ya puan. Beni ninmu'urɛ ti ya ka mu'ɛ ti ya yehe ya mɛhi, beni sigehe mɛŋa, beni pakerɛ, beni boolum, beni zika, beni namehegɔ. Sadɔɔ seko woo puan ya pa'alɛ mɛ ti ya ka tari tuure yele la puan.

¹² Bala, la mam en pun gulehɛ bo' ya na la, la dagi tu guleheri la se'em n tuue la yele, bii se'em ti ba tuue la yele, gee tu boti tu bahɛ ti ya ninmu'urɛ se'ere ti ya tara la tumam la n niiɛ bo' ya Yinɛ nɛŋan.

¹³ Dina puan ti tu nyɛta suma'ahum. Sɛla en pa'ahɛ tumam mɛhi subugehum la puan dela, tu kelum kɔ'ɔm nyɛɛna mɛ la Taitusi. Se'ere en sɔi la, a suure gã'arɛ la ma'ahum, yamam za'a zuo.

¹⁴ Mam han daa dikɛ ya ŋmɛ' la n nyu'ɔ sadɔɔ seko puan boi en, bu nyanɛ ka di mam. Gee sɛla woo ti tu tɔgera bɔ'ɔra ya en de yelemɛŋerɛ la, tum ŋmɛ'ɛri tu nyu'ɔ se'em bɔ'ɔra Taitusi la dela yelemɛŋerɛ.

¹⁵ Ti a ka'ɛ a suure za'a za'a bɔ'ɔra ya na, en ti'iheri ya za'a n nane se'em, la yan to'e en se'em la Yinɛ zoolum dabeem, la gbi'a se'em la.

¹⁶ La bahɛ ti mam puurɛ pee mɛ la ya, se'ere en sɔi la, mam ba' nam ya mɛ za'a za'a.