2 Korẽntɩ 6 - ZE'ELEGO PAALEGA

¹ Wuu tumam n lagum tuna la en la, ti beleni ya mɛ ti ya da to'e Yinɛ zu'uhegɔ la yoo.

² Se'ere en sɔi la, Yinɛ yeti, “To'ore saŋa la n paaɛ la, mam kelehe ya mɛ. Dabeherɛ se'ere en de n faaɛ ya la, mam faaɛ ya mɛ.” Bihɛ, to'ore saŋa la n ŋwana. Bihɛ, zina n de faarɛ dabeherɛ la.

³ Tumam ka dikeri sɛla bɛŋera se'em sore ti, tuure da bɔna tu tuunɛ wa puan.

⁴ Gee tumam en de Yinɛ yamehi la, tu nyɔkɛ tu mɛhi mɛ yɛla zo'e zo'e puan. Ŋmibega kãtɛ, namehegɔ, wuŋerɛ, nɔyalegerɛ,

⁵ ŋmɛ'a, paka, gbiregeri, tuunkãra, gɔgara, kom,

⁶ Zulaam, mi'ilum, sugeri, itesuŋɔ, Fa'a Sia puan tuntɔɔnɛ, yelemɛŋerɛ nɔŋerɛ,

⁷ yelemɛŋerɛ tugum, la Yinɛ paŋa, la tuntɔɔnɛ zaberɛ lɔgerɔ ti tu zãla zuɔ la gɔbega,

⁸ na'ahegɔ la fakerɛ yɛla, bã'ahi, imma'ahum puan. Ba ita tu wuu tu dela pumpã'ahum duma, gee ti tu dɛna yelemɛŋerɛ duma,

⁹ tu ani wuu nɛra n ka mi' tu la, gee nɛreba mi tɔ mɛ. Tu ani wuu tu kiiri mɛ la gee bihɛ, tɔ vɔ mɛ. Tu ani wuu ba namehɛ tu mɛ la gee ba ka ku tɔ.

¹⁰ Tu ani wuu tu suya n sagum la, gee tu nyɛɛni mɛ saŋa woo. Tu ani mɛ wuu naheduma la, gee me iŋɛ nɛreba zo'e zo'e ti ba dɛna buntateba, tu ani wuu tu ka tari la sɛla la, gee me tara sɛla woo.

¹¹ Ti tɔgɛ la yelemɛŋerɛ bo' yamam Korintiduma wa. Tu suya kɔ'ɔm yu'ɛ mɛ bo' ya.

¹² Gu'a ka boi tumam n nɔŋɛ ya se'em la puan, gee la boi la yamam ma'a puan.

¹³ Mam n boti sɛla ya zi'an dela, n yeti ya mɛ wuu n kɔma la, ti ya me yu'ɛ ya suya za'a.

Yinɛ vua la pu'uhegɔ yire

¹⁴ Da tari ya mɛhi naara yoo yoo la sɛba n ka dole Yezu. Se'ere en sɔi la, beni nɔyinɛ en boi la sɛla n de tuuntɔɔ la sɛla n dagi tuuntɔɔ? Beni sɔhega n boi lika la niihum tiŋasuka?

¹⁵ Beni sakerɛ ti Kiresta tara la pumparema? Bii beni ti sakera tara la se'em n dagi sakera?

¹⁶ Beni nuurɛ ti Yinɛ pu'uhegɔ yire la wan ku la baga zɔŋɔ? Se'ere en sɔi la, tumam dela Yinɛ vua wa pu'uhegɔ yire la, wuu Yinɛ mɛŋa en yele yeti, “Mam wan bɔna ba puan, kina la ba, n wan dɛna ba Yinɛ, ti ba me dɛna n nɛreba.

¹⁷ Bala, yehe ya ba puan wa'am na, la ya bɔna ya tɔka la ba. Daana la n yele, da kalum ya dɛkɔ lɔkɔ, gee n wan to'e ya.

¹⁸ N wan dɛna ya Sɔ, ti ya dɛna n kɔma. Daana la en de Gani Za'a Daana la en yele.”