2 Korẽntɩ 5 - ZE'ELEGO PAALEGA

¹ Tu mi' ti tiŋa zuo sugeri wa ti tu bɔna de puan wa han ta sagum ba'ahɛ, tu tari yire n ze'ele Yinɛ zi'an na, yise'ere ti nu'uhi ka mɛ, ka tari ba'ahegɔ saazuo ha.

² Se'ere en sɔi la, tu tiŋa zuo sugerɛ wa ti tu bɔna de puan tu uheri mɛ la ninmu'urɛ, kɔ'ɔm boti ni ti tu yɛ ni tu saazuo fuo la.

³ Yelemɛŋerɛ, tu han yɛ tu saazuo fuo wa, tu kan zɛ'a beele.

⁴ Tumam en nan boi tiŋa wa zuo inganɛ wa puan la, ti uheri mɛ la too tu zeero puan, se'ere n sɔi la, tu ka boti tu zɛ'a beele, gee ba tum malum bagɛ tɔ la lɔgerɔ pa'ahɛ. Bala ti Yinɛ vom la wan vole sɛla n pu'uri la.

⁵ 5 Se'em n maahum tɔ gura yele dina wa dela Yinɛ, se'em en bo' tu a Sia la ti la dɛna daalehum ti a wan tum la.

⁶ Bala, saŋa woo tu tari puti'irɛ mɛ, la tum pun mina ti tu boi inganɛ wa puan ka'lam wa la, tu zaaɛ mɛ la Daana la.

⁷ Tu vɔi me la sakerɛ gee dagi sɛla ti tu nini nyɛta.

⁸ Yelemɛŋerɛ, tumam nam ya ti tu bahɛ inganɛ wa gee ta bɔna la Daana la.

⁹ Bala, tu bɔna inganɛ wa puan, la tu ka boi inganɛ wa puan, tumam lu' tu suya ti tu tigɛ la a nini.

¹⁰ Se'ere en sɔi la, tu za'a wan ze'ele Kiresta gakerɛ kuka la nɛŋan, ti nɛra woo to'e a yɔɔrɛ en tum sɛla a inganɛ wa puan. La dɛna sum bii be'em.

Naarɛ tuuma

¹¹ Bala, tumam n mi' tu zɔta Daana la vuurɛ n de sɛla la, tu tiregerɛ mɛ ti tu bahɛ ti basɛba me baŋɛ en. Gee han dɛna tumam mɛhi, Yinɛ mi' tumam mɛ suŋa suŋa, n me tari puti'irɛ ti yamam me mi' tu suŋa suŋa ya suya puan.

¹² Tumam ka pɛgeri tu mɛhi bɔ'ɔra ya le yɛ'ɛha yoo, gee tu bo'ori ya la yɔ'ɔ ti ya ŋmɛ'ɛra nyu'ɔ tu zuo, la ya ta'am lebehe sɛba n ŋmɛ'ɛrɛ nyu'urɔ ba yiŋa gee dagi ba suure puan la.

¹³ Se'ere en sɔi la, tu iŋɛ ya gaafara, tumam zuto han ka tuna, la dela Yinɛ zuo, tu han le dɛna tu mɛhi la dela yamam zuo.

¹⁴ Kiresta nɔŋerɛ la en bo'ori tɔ paŋa, se'ere zuo, tu za'a sakɛ ya ti nɛra ayima n ki bo' nɛrawoo, bala la, nɛrawoo ki mɛ.

¹⁵ Yezu ki bo' la nɛra woo, ti sɛba n vɔ kan le vɔna bɔ'ɔra ba mɛhi gee se'em n ki gee ihege bo' ba la.

¹⁶ Yehe nananawa yɛ'ɛha ha, tu ka le bɛha nɛra inganɛ puan, la tumam n pun tabelɛ mina Kiresta inganɛ puan la, tu ka le malum mina n en sadɔkuŋɔ puan.

¹⁷ Bala, se'em han bɔna Kiresta puan, a dela naanɛpaalega, sɛla woo n de kɛka tole ya, bihɛ, sɛla woo nyaa lebege la paalega.

¹⁸ Dina wa za'a ze'ele la Yinɛ zi'an, se'em n dikɛ tu naaɛ la a mɛa doohe Kiresta puan, gee bo' tumam naarɛ tuunɛ wa.

¹⁹ Dina dela, Kiresta puan ti Yinɛ dɔla dikera tiŋa wa za'a naara a mɛa, ka dikera ba be'em taala pagela ba zuo, tum dikɛ naarɛ sɔɔleŋa wa iŋɛ tumam nu'uhen.

²⁰ Bala, tumam dikɛ la Kiresta na'arɛ, se'ere n sɔi la, Yinɛ beleni ba dɔla la tumam puan. Bala tu yeti ya mɛ la ninmu'urɛ Kiresta zuo, ti ya lebe naaɛ la Yinɛ

²¹ Se'ere en sɔi la, tumam zuo ti Yinɛ iŋɛ en ti a ana wuu a dela be'em daana la, eŋa se'em en ka tabelɛ mina be'em, ti doohe eŋa puan tu wan tara Yinɛ tuuntɔɔ vom la.