2 Korẽntɩ 4 - ZE'ELEGO PAALEGA

Tuulum lɔgerɔ n boi kaleŋa puan

¹ Bala, lan diŋɛ dɛna Yinɛ nimbɔ'zɔrɛ zuo ti tu bɔna tuun-ana wa puan la, tu yɛm ka yɔ'ɔri.

² Tumam zagehɛ nyanɛ tuunsɛ'a ti se'em sugera la mɛ. Tumam zagehɛ mɛ ti tu kan tuna pã'ahegɔ tuuma bii tu burum Yinɛ yelehum la. Gee tumam kɔ'ɔm tɔgera la yelehum la yelemɛŋerɛ, nɛrawoo nɛŋan la Yinɛ nɛŋan.

³ Tumam yelehum wa han pun pi' mɛ, bu pi' la sɛba en baheri yoo la zi'an.

⁴ Ba yele la dela, tiŋa wa zuo yinɛ la n pi' sɛba n ka nam Yezu la puti'ira, ti a gu ba ti ba da nyɛta faarɛ yelehum niihum la n de Kiresta suŋa la. Kiresta se'em n de Yinɛ mɛŋa naanɛ la.

⁵ Se'ere en sɔi la, tumam ka muuli la tu mɛhi yele, tu muulɛ la Yezu Kiresta se'em n de Daana la yele. Tumam mɛhi dela yamam yamehi Kiresta zuo.

⁶ Se'ere en sɔi la, la dela Yinse'ere n daa yeti, “Bahɛ ti niihum ze'ele lika puan niiɛ na la,” Yinɛ dinɛ mɛa n niiɛ tumam suya puan, ti a bo' tu a mi'ilum niihum la, n de Yinɛ suŋa niira Yezu Kiresta nɛŋa puan la.

⁷ Gee tumam tari tuulum lɔgerɔ tuna wa la yɔgerɔ kaleŋa puan, ti la niiɛ kpaii ti pankãtɛ kana wa n gani za'a wa dela Yinɛ paŋa gee dagi tumam paŋa.

⁸ Tu nyɛ namehegɔ mɛ bɔberɛ woo gee ku ka ku tɔ. Tu nɔya maam mɛ gee tu suya ka gu'uhi.

⁹ Tu nyɛ mɛlehegɔ, gee ba ka bahɛ tɔ, ti ba ŋmɛ' ta lobe gee ba ka sagum tɔ;

¹⁰ saŋa woo ti ziiri la Yezu kum tu ihe wa puan ti, Yezu vom la me wan niiɛ tu ihe la puan.

¹¹ Se'ere en sɔi la, tumam n vɔ wa, saŋa woo tumam ka gagɛ kum Yezu zuo, ti Yezu vom la wan ta'am niiɛ tu ihe wa puan.

¹² Ŋwana wa bahɛ ti kum n zabera tumam daare woo, gee ti vom bɔna la yamam.

¹³ Wuu tumam en lagum tara sia kayima tu sakerɛ puan doohe la gulehegɔ la n yeti, “Mam nam mɛ, ti n tɔgɛ.” Bala mɛa ti tumam me nam gee me tɔgɛ.

¹⁴ Se'ere en sɔi la, tumam mi' ti se'em n vo'e Daana Yezu la wan vo'e tumam me na naaɛ la Yezu, gee tari tumam la yamam paaɛ a nɛŋa.

¹⁵ Yelemɛŋerɛ, sɛla woo dela yamam zuo, ti zu'uhegɔ la, n pa'aherɛ se'em la paaɛ nɛreba zo'e zo'e, ti pɛka malum zo'e pa'ahɛ ti Yinɛ yu'urɛ nyɛ pɛka.

Vɔna la sakerɛ

¹⁶ Bala la, ti ka kɔ'ɛ suure, la tu inganɛ wa n namehɛ ta ana wuu ka pu'uri me wa, tu puan naanɛ la lebegere la paalega beere yilegeri woo.

¹⁷ Se'ere en sɔi la, namehegɔ pika wa n kan yuue wa maaheni tu mɛ ti tu ta'am to'e vom kamba'ahɛ sunsɛka n tibegɛ ka tara makerɛ la,

¹⁸ Tumam n ka biheri sɛla n nyɛti, gee tu biheri la sɛla n ka nyɛti zuo, sɛla n nyɛ zina ka yuure, gee sɛla n ka nyɛti ka tari ba'ahegɔ.