2 Korẽntɩ 3 - ZE'ELEGO PAALEGA

Nɔpu'ulegɔ paalɛ tuntuneba

¹ Tumam pɔhɛ ti tu pɛgɛ la tu mɛhi le yɛ'ɛha? Yelemɛŋerɛ, dinɛ ka pakɛ tumam wuu sɛba en iti se'em la. Tu gulehɛ pɛka gɔnɔ bo' yamam, bii yamam gulehɛ pɛka gɔnɔ bo' tumam na?

² Yamam mɛhi en de tumam gɔŋɔ, gulehɛ bɔna tumam suya puan, ti nɛra woo wan mina, gee kãalɛ.

³ Ya mɛhi la mɛ pa'alɛ ya ti ya dela Kiresta gɔŋɔ, ti tumam en de sɛba en maahum kɔ. Tu ka dikɛ zigemɔlegɔ gulehɛ, gee tu dikɛ la Yinɛ vua wa Fa'a Sia la gulehɛ ya. Tu ka gulehɛ iŋɛ la kugelama puan, gee tu gulehɛ iŋɛ la saaleba suya puan.

⁴ Tumam en nam Yinɛ se'em en bala Kiresta puan.

⁵ Dagi la tumam mɛhi en ta' sɛla ita, wan ta'am yeti ŋwana la ŋwana tumam mɛhi zi'an na; tumam tã'alum ze'eti la Yinɛ zi'an na.

⁶ Yinɛ en de se'em en iŋɛ tumam ti tu dɛna tuntuneba a nɔpu'ulepaalɛ la puan, dagi la pa'alegɔ yoo puan, gee Sia la puan. Se'ere en sɔi la, pa'alegɔ yoo la kuuri mɛ, gee Sia la bo'ori la vom.

⁷ Nananawa, kum tuuma yɛla la ba daa kɔrum a iŋɛ labelɛ kugelama puan la, han daa wa'am na na la niihum en kpigeri Iziraleduma la nini ti ba ka tana bihera Moose nɛŋa, kan daa ba' nyagera la zuo, dɛna niihum sebo en nyaa gbe'e biŋe pooren wa, nyaa bihɛ!

⁸ Niihum kãtɛ boni taaba n wan dɔla Sia tuuma yɛla wa!

⁹ Suŋa kana taaba daa han dɔla sageŋɔ tuuma yɛla la, suŋa kãtɛ en gani bala wan dɔla buurɔ tuuma yɛla.

¹⁰ Yelemɛŋerɛ, sɛla n tabeli tara suŋa, suŋa la ni ta bɔregɛ mɛ, doohe la suŋa kãtɛ kayima n wa'am na zuo.

¹¹ Se'ere en sɔi la, sɛla en kan bɔna wuuha daa han tara niihum buna taaba, sɛla n wan bɔna wuuha la niihum wan gana bala mɛ.

¹² Tumam n diŋɛ tara beere putɛ'dina wa la, tu tuni mɛ la sukpe'ene.

¹³ Tu ka ani wuu Moose, n daa dikɛ fuo pi' a nɛŋa ti, Izirale nɛreba la da ba' biha niihum sebo n kan bɔna wuuha la.

¹⁴ Gee ba suya yuum ba' kãbɛ mɛ. Yelemɛŋerɛ, wa'am na paaɛ zina, ba han wum nɔpu'ulegɔ kɛka la kãalegɔ, sɛla n daa pi' ba nini la kelum pi' ba mɛ, se'ere en sɔi la, Kiresta ma'a puan ti sɛla n pi' ba la wan pilege bahɛ.

¹⁵ Yelemɛŋerɛ, la zina me, ba han kãalɛ Moose pa'alegɔ la, tanɛ la kelum pi' ba puti'ira la bala.

¹⁶ Gee se'em n ŋmɛregɛ wa'am Daana la zi'an na, tanɛ la ni pilege mɛ.

¹⁷ Lan de se'em dela, Daana la n de Fa'a Sia la, ti zi'an ti Daana la Sia bɔna, fai n boi bini.

¹⁸ Gee tumam za'a pilehe tu nɛhi bahɛ mɛ, gee biha Daana la suŋa la, wuu biheŋa puan la, ti la tee tu, ti tu tara Yezu naanɛ, zɛ'ɛta suŋa puan malum paara suŋa puan. Yele dina wa ze'eti la Daana la n de Fa'a Sia la zi'an.