2 Korẽntɩ 2 - ZE'ELEGO PAALEGA

¹ Bala, mam iŋɛ n puti'irɛ ti, n kan le wa'am na bihɛ ya la susageŋɔ.

² Se'ere en sɔi la, mam han sagum ya suya, ani n boi wan bo' mam pupeelum, han dagi se'em ti mam sagum a suure la?

³ Mam gulehɛ mam gulehɛ se'em wa la ti, la suŋɛ ti n han ta wa'am na n da nyɛ susageŋɔ sɛba n wan bo' ni mam pupeelum la zi'an. Se'ere en sɔi la, mam nam ya za'a ti, mam pupeelum wan dɛna ya za'a pupeelum.

⁴ Mam n gulehɛ gɔŋɔ wa la nimbaalega, la susageŋɔ, la nintam zo'e zo'e wa dagi la n bahɛ ti ya suya sagum, gee n bahɛ ti ya baŋɛ nɔŋerɛ kãtɛ se'ere ti mam tara bɔ'ɔra ya.

Sugeri

⁵ Gee se'em han tari susageŋɔ wa'am na, a ka sagum la mam ma'a suuren, gee fum han bihɛ, dagi la n ba' pa'alɛ gaŋɛ mɛ, gee la lagum paaɛ ya za'a mɛ.

⁶ Bala, tuberɛ dɔlegerɛ se'ere ti ya za'a naaɛ nuurɛ dɔlege nɛre-ina taaba tuberɛ wa la seke ya.

⁷ Bala nananawa, tugum di ya sugeri bo' en, gee bugelɛ a suure, ti a susageŋɔ la da ba' gaŋɛ en.

⁸ Bala, n kɔ'ɔm bɛlena ya mɛ ti ya malum pa'alɛ en ya nɔŋerɛ.

⁹ Mam n daa gulehɛ ya la yele dina wa zuo. N makɛ ya bihɛ, gee baŋɛ nyaa ya nane sɛla woo puan.

¹⁰ Se'em woo ti ya di sugeri bo' en, mam me di sugeri bo' en mɛ. Mam n di sugeri bo' sɛla la, wuu n han sirum tari se'em yele n suure wa puan gee di sugeri bo' en, la dela yamam sum zuo, Kiresta nɛŋan.

¹¹ Tu iti dina wa ti Sagena la n da nyaŋɛ tɔ. Se'ere en sɔi la, tu ka bu'uri a nyaleŋɔ la.

Pɔɔl susageŋɔ Torowase

¹² Mam n paaɛ Torowase tiŋa ti n muulɛ Kiresta faarɛ yelehum la, kuleŋa n yu'ɛ bo' mam Daana la puan,

¹³ gee mam puti'irɛ daa ka gã'arɛ, se'ere n sɔi la, n ka nyɛ n suuɔ Taitusi bini. Bala ti mam keehe ba, gee kiŋɛ Masedoniya.

¹⁴ Gee pɛka paaɛ Yinɛ, se'em n dole Kiresta puan saŋa woo bahɛ ti tu kina nyaŋerɛ kinɛ, gee dɔla tumam puan bahɛ ti tu yiregera nyuuŋo suŋɔ seko en boi Kiresta baŋerɛ puan zi'an woo la.

¹⁵ Se'ere en sɔi la, tumam dela Kiresta nyuunsuŋɔ bo' Yinɛ, sɛba n nyɛ Faarɛ, la sɛba n bɔregɛ tiŋasuka.

¹⁶ Sɛba n bɔregɛ la, nyuuŋo suŋɔ la han ŋmɛ'ɛra bamam, ba malum kiira mɛ. Sɛba n nyɛ faarɛ la me, nyuuŋo suŋɔ la han ŋmɛ'ɛra bamam, ba malum vɔna mɛ. Ani n seke wan ta'am tum tuunɛ wa?

¹⁷ Se'ere en sɔi la, tumam ka bureni Yinɛ yelehum la, wuu sɛba zo'e zo'e en iti se'em la. Gee Kiresta puan, tumam tɔgeri mɛ yelemɛŋerɛ, wuu nɛreba ti Yinɛ tum tɔ, gee ti tu me zɛ'a a nɛŋan saŋa woo la.