2 Korẽntɩ 13 - ZE'ELEGO PAALEGA

Ba'ahegɔ ninmu'urɛ kã'aŋɔ

¹ Nuurɛ butã n ŋwana ti n yɛ'a ya zi'an na wa. “Zuuhego woo suni ti ku tara Aze' nyɛduma bayi' bii batã.”

² N daa pun ka'am sɛba n daa tum be'em la mɛ, la ya za'a la ninmu'urɛ. Gee kelum ka'ana ba la mam n pun ka bɔna la ya wa. Wuu mam daa boi la ya n kinɛ buyi' puan la. N daa yele ya yeti, n han le lebe na, n ka yeti n tara ninkɔrɛ la se'em.

³ Yan diŋɛ bɔta sɛla ti la pa'alɛ ti Kiresta tɔgeri dɔla n puan la, a dagi tɔregɔ daana kan ta'am iŋɛ yan en boti se'em, gee a paŋa karegɛ mɛ ya puan.

⁴ Ba daa kpa' en mɛ a tɔregɔ puan, gee a vo'e mɛ Yinɛ paŋa la puan. Tumam dela tɔregɔ a puan, gee tumam han tuna la yamam, tu vɔi mɛ la en, Yinɛ paŋa la puan.

⁵ Magehɛ ya mɛhi bihɛ nyaa ya vɔi sakerɛ la puan. Magehɛ ya mɛhi bihɛ, ya ka baŋɛ ti Kiresta boi ya puan? Han dagena ti ya sirum koŋe la ya magehɛ ya mɛhi bihɛ.

⁶ Mam puti'irɛ dela, ya wan baŋɛ ti tu ka koŋe.

⁷ Gee tu pu'uhi Yinɛ ti ya da tum se'ere tuue. Dagi la tu nyaŋɛ magehegɔ la mɛ, gee la dela ya ita sɛla n de ma'a, tu han pun koŋe magehegɔ la mɛ.

⁸ Se'ere en sɔi la, tu kan ta'am iŋɛ sɛla tuue yelemɛŋerɛ la, han dagena tu tuna yelemɛŋerɛ la ma'a.

⁹ Tumam nyɛɛni mɛ, tu han tara tɔregɔ gee ti yamam kpe'em. Tumam n pu'uhi se'ere dela, ya ze'ele suŋa, ba'ahɛ suŋa suŋa.

¹⁰ Bala, mam gulehɛ gɔnkuna wa bɔ'ɔra ya ti n ka boi la ya, bala ti n han ta wa'am na, n kan dikɛ sukpe'ene dikɛ pansɛka ti Daana la dikɛ bo' mam ti n mɛ ya la, sagum ya.

Ba'ahegɔ pu'uhegɔ la kã'aŋɔ

¹¹ Ba'ahegɔ za'a n suurɔ, nyɛɛni ya. Maahum ya sɛla woo suŋa, kpemehe ya taaba suya, sakerɛ ya bo'ori ya taaba, boni ya la suma'ahum, ti Yinɛ En de nɔŋerɛ la suma'ahum Yinɛ la wan bɔna la ya.

¹² Pu'uhɛ ya taaba la tuulum suma'ahum kɔkerɛ.

¹³ Nɛresunduma la za'a pu'uhi ya na.

¹⁴ Tu Daana Yezu Kiresta zu'uhegɔ, Yinɛ nɔŋelum, Fa'a Sia suunuurɛ bɔna la ya za'a.