2 Korẽntɩ 12 - ZE'ELEGO PAALEGA

Pɔɔl zaaheŋɔ la lilegere

¹ La ani suŋa ti tu ŋmɛ'ɛra nyu'ɔ, gee nyuurɔ ka boi bini tɔ'ɔra. Gee mam wan kelum ŋmɛ'ɛra n nyu'ɔ mɛ la mam en nyɛ sɛla, la Daana la en lilegere sɛla la puan.

² Mam mi' buraa kayima en wa dɔla Kiresta sore wa. Ti yuumpia la anaahi n tole ha, ti sɛla yuum zɛ en zom la tinsuŋan ha. La yuum dela sia puan, bii inganɛ puan, mam ka mi', Yinɛ ma'a n mi'.

³ Gee mam mi' ti nɛre-ina taaba wa, a boi la inganɛ puan bii sia puan, mam ka mi'. Yinɛ ma'a n mi'.

⁴ Sɛla en yuum zɛ en zom zi'suŋan ha (ti ba yi'ira Paradase la), ti a ta wum yɛla n dagi ba tɔgɛ bii asaala tɔgera a yele.

⁵ Buraa kana wa zuo ti mam wan ze'ele ŋmɛ' nyu'ɔ, gee han dɛna mam mɛŋa ma'a, mam kan ta'am ŋmɛ' nyu'ɔ, han dagena n ti'iha n tɔregɔ yɛla ma'a.

⁶ Gee mam han bɔta ti n ŋmɛ' n nyu'ɔ, mam kan dɛna gerego, se'ere en sɔi la, mam nyu'ɔ ŋmɛ'a la wan dɛna la yelemɛŋerɛ, tɔgera la yelemɛŋerɛ la. Gee mam zagehɛ mɛ ti n kan ŋmɛ nyu'ɔ, ti se'em da ti'iha mam yele gana en nyɛti sɛla bii en wum se'ere mam puan la.

⁷ A daana han pun biha mam nyɛ lilegere se'ere en boi deyima la. Bala, sɛla n wan gu' mam ti mam kan ba' zɛkera n mɛŋa la dela, gũ'a n dikɛ lu' mam inganɛ puan, dɛna Sagena la bituneŋa, ti a nameha mam, la a gu' mam ti n da ba' zɛkera n mɛŋa.

⁸ Sugum nuuren butã ti mam suhɛ Daana la yele wa zuo ti de bahɛ mam,

⁹ gee Daana la yele mam yeti, “Mam zu'uhegɔ la seke bo' fum, se'ere en sɔi la, paŋa niiri ka mɛŋa la tɔregɔ puan.” Bala, mam wan tum ŋmɛ'ɛra nyu'ɔ mɛ la nyɛɛma n tɔregɔ la puan, bala ti Kiresta paŋa la wan bɔna n puan.

¹⁰ Bala zuo la, mam nini tigɛ ya la tɔregɔ, tuurɛ, wuŋerɛ, mɛlehegɔ, la nɔyalegerɛ Kiresta zuo. Se'ere en sɔi la, sansɛka woo ti tɔregɔ kɛ̃ mam, mam ni nyɛ la paŋa.

Pɔɔl ti'ihɛ lageŋɔ la yele

¹¹ Mam dela gerego. Yamam n pɛregɛ mam kɛ̃ bini. Yelemɛŋerɛ, yamam n tugum deni sɛba en wan pɛgeri ni mam, se'ere en sɔi la, mam dagi bumbila sadɔɔ seko puan bo' sɛba en zɛkeri ba mɛhi ti bamam dela tuntuneba wa zi'an, la mam pun dagena sɛla wa.

¹² Daalehum sebo n pa'ali ti nɛra dela Yezu tuntuna yelemɛŋerɛ la daa tum ya puan mɛ la nyɔkɛ n mɛŋa. Nyalema la kirehi la tuunkãra.

¹³ Mam tum la be'em boni bo' ya lageŋɔ wa gana lageŋɔ seto woo en boi la, han dagena mam n ka dikɛ n mɛŋa ziile ya wa ma'a? Dina wa han dɛna la tuure, yi di ya sugeri bo' mam de zuo.

¹⁴ Mam n ŋwana, maahum ti n wa'am ya zi'an na sugum nuuren butã wa. N me kan dɛna zeero bo' ya, se'ere en sɔi la, mam ka boti sɛla en de ya dinɛ, gee n boti la yamam mɛhi. Se'ere en sɔi la, dagi kɔma en de ba bɔ biŋe ba dɔgereba, gee dɔgereba n de ba bɔ biŋe ba kɔma.

¹⁵ Mam wan yuregɛ n lɔgerɔ la pupeelum, gee bahɛ ti ba yuregɛ mam mɛŋa pa'ahɛ bo' ya. Mam han nɔŋɛ ya zo'e ŋwana, yamam dela ya nɔŋɛ mam fii yoi?

¹⁶ Yi mini ya suŋa, ti mam daa ka dikɛ n mɛŋa ziile ya. Gee la bala za'a, (ya yeti) mam wikɛ mɛ, n daa pa'ahɛ zu ya mɛ.

¹⁷ Mam daa fa' ya mɛ doohe sɛba ti n tum ya zi'an na la puan yoi?

¹⁸ Mam daa belum la Taitusi ti a wa'am na, gee tum tu suuɔ la pa'ahɛ a puan. Taitusi daa ka fa' ya, bii a daa fa' ya mɛ? Tu daa ka tari tu mɛhi mɛ sia kayima puan? Tu daa ka tari la putɛ'yinɛ?

¹⁹ Yamam ni tugum ti'iha ti tumam tɔgeri pɔ'ɔra la tu mɛhi wa? Tumam tɔgeri la yelemɛŋerɛ Kiresta puan, Yinɛ nɛŋan. Sɛla woo ti tumam ita, n suurɔ wa, la dela ya zo'ore zuo.

²⁰ Dabeem en tari mam, ti n han wa'am na, n kan nyɛ ya ti ya ana wuu mam boti ni ya ana se'em la, ti yamam me kan nyɛ mam me ti n ana wuu yamam n boti se'em la. Dabeem n tari mam ti daanse'ere gaka, nyuure, sunsunyiim nyika, ukerɛ, la gbirege wan bɔna ya puan.

²¹ Dabeem n tari mam ti, n han le wa'am na, mam Yinɛ wa wan bahɛ ti nimbu'ɔ nyɔkɛ mam, ti n kele nintama'aha bo' sɛba zo'e zo'e en daa tum be'em gee ka tee ba dɛgerɔ, ba yaalegɔ la ba nyanɛ tuuma la ti ba ni pun tuna la puan la.