2 Korẽntɩ 11 - ZE'ELEGO PAALEGA

Pɔɔl la pumparenduma

¹ Mam ti'ihɛ ti ya wan lagum ŋmibe la mam ti tu tum gɔɔntuuma fii wa. Ya gaafara, Yeen ŋmibe ya la mam.

² Mam tari la Yinɛ nyuure ya zuo paaɛ paaɛ se'ere n sɔi la, mam biŋe la nuurɛ ti n dikɛ ya elehe sira ayima. N dikɛ ya wuu pɔgesa'kaherɛ la bo' Kiresta.

³ Gee dabeem n tari mam. Wuu kampia la n yuum pa'ahɛ Eva la a wikerɛ la, bala mɛa ti yamam me puti'ira wan yehe, ti ya kan le tara ninmu'urɛ la susunɛ pu'uha Kiresta.

⁴ Se'ere en sɔi la, se'em han wa'am na muulɛ Kiresta kayima n dagi sɛka ti tumam muulɛ bo' ya la, bii ya to'e la sia kayima n dagi sɛka ti ya pun to'e la, bii faarɛ yelehum sebo en dagi sebo ti ya pun to'e la, ya me ni sirum to'e a mɛ la ninmu'urɛ.

⁵ Mam ti'ihɛ ti mam dagi bia tuntuneba sɛba n iŋɛ ba mɛhi ami' za'a duma wa nɛŋan.

⁶ Daanse'ere n ka mi' la tugum gee dagi mi'ilum. Yelemɛŋerɛ, sadɔɔ seko woo puan, la sɛla woo puan, tu tum pa'alɛ ti tu mi' mɛ.

⁷ Mam tum la be'em la mam sigehe en mɛa, ti yamam tee zom saazuo la, la mam n muulɛ faarɛ yelehum la bo' ya zaŋa la?

⁸ Bala, Mam fa' lageŋɔ tuseto, doohe la mam sakɛ to'e suŋɛ bamam zi'an ti n ta'am wa'am na tum bo' yamam la.

⁹ Mam n daa boi la ya ti nɔŋɔ tara mam la, mam daa ka dikɛ n mɛŋa ziile ya se'em, se'ere en sɔi la, mam n daa boti sɛla woo la, tu suurɔ seto n daa ze'ele Masedoniya tiŋa na la en daa bo' mam. Bala, mam yehe n mɛa gee wan kelum yehe n mɛa, kan le dikɛ n mɛa ziile ya sadɔseto woo puan.

¹⁰ Wuu Kiresta yelemɛŋerɛ la n boi mam puan se'em la, mam yele dina wa n de mam nyu'ɔ ŋmɛ'a wa kan yee suram Akaiya tiŋa nɛreba puan.

¹¹ Ti beni zuo? La dela mam ka nɔŋɛ ya mɛ bii? Yinɛ ma'a en mi'.

¹² Mam n iti se'em la, n wan kelum ita la bala mɛa, la n da bo' sore ti sɛba n boti ba nyɛ sore bahɛ ti ba baŋɛ ba ti mam la bamam zuni me la sore.

¹³ Bama sɛba n ŋmɛ'ɛri ba nyu'urɔ bala la dela pumparenduma. Ba dela pa'ahegɔ tuntuneba, ba yeen iŋɛ la ba mɛhi ti bamam dela Kiresta tuntuneba.

¹⁴ La dagi pakerɛ, Sagena la mɛŋa iŋɛ a mɛŋa la bala ti eŋa dela yelemɛŋerɛ suŋera.

¹⁵ Bala, la dagi pakerɛ, a tuntuneba la me han iŋɛ ba mɛhi ti bamam dela tuuntɔɔ vom la tuntuneba. Ba ba'ahegɔ wan doohe mɛ la ba tuuma la.

Pɔɔl nyɛti namehegɔ

¹⁶ Bahɛ ti n le takɛ pa'ahɛ. Da bahɛ ti ya se'em ti'ihɛ ti mam dela gɔɔŋɔ. Gee ya han sina gee iŋɛ bala, yi yeen to'e ya mam bala ti n dɛna gɔɔŋɔ, ti mam me ta'am ŋmɛ' nyu'ɔ fii wa.

¹⁷ Mam yeti nyu'ɔ ŋmɛ'a seko wa, seko ti mam sɛ zɛ'a ku puan wa dela, n yeti dina wa mɛ dagi la Daana la paŋa puan, gee gɔɔnɛ puan.

¹⁸ Nɛreba en diŋɛ ŋmɛ'ɛra ba nyu'ɔ nɛresaalenɛ puan la, mam me wan ŋmɛ' la bala mɛa.

¹⁹ Se'ere en sɔi la, ya pee la puurɛ ŋmibera la gɔɔnɔ, gee dɛna yɛmduma ya mɛhi.

²⁰ Ya ŋmiberi mɛ la se'em woo en dikɛ ya lɛbegera a da'aberɛ, bii se'em n yeti a obe ya, bii a bihɛ ya yoo, bii zɛkera a mɛŋa, bii lɔbera ya pɛgehi.

²¹ La tari mam la vi, la mam n yeti ya dina wa. Tu ka kpe'em gee bahɛ ti yele ana wa ita tu puan. Gee yelese'ere woo puan ti se'em wan ŋmɛ' a nyu'ɔ, n yeti la gɔɔnɛ yɛla la puan, mam me wan ŋmɛ' n nyu'ɔ a zuo.

²² Ba dela Hiburu duma? Mam me dela bala. Ba dela Iziraleduma? Mam me dela bala. Ba dela Aberaham tuuhum? Mam me dela bala.

²³ Ba dela Kiresta tuntuneba? N nyaa kɔ'ɔm tɔgera mɛ wuu zɔlegɔ la, han dɛna bala mam yi gani ba. Namehɛ gana ba, kɛ̃ paka deto puan gana ba, to'ohe ŋmɛ'ɛrɛ en ka tari kãlɛ gana ba, saŋa zo'e zo'e, pɔ̃hɛ n nyuurɔ gana ba.

²⁴ Sugum nuurɛ bunuu ti n to'ohe Kpa'aha deyina ka boi kpa'aha pihinaahi,Yuuduma la nu'uhen.

²⁵ Nuurɛ butã ti ba ŋmɛ' mam la kuto kpa'aha. Buyina ti ba lobe mam la kuga. Butã' ti uureŋɔ wɔ̃rɛ la mam ko'kãtɛ puan, ti n bɔna ko'om la zuo bala yu'uŋɔ la beyiine.

²⁶ Saŋa woo, mam boi kinɛ zuo, pɔ̃hera n nyuurɔ kulaahi puan, pɔ̃hera n nyuurɔ la nageyigehi, pɔ̃hera n nyuurɔ la n mɛŋa nɛreba, pɔ̃hera n nyuurɔ la sɛba n dagi Yuuduma, pɔ̃hera n nyuurɔ tinkãra puan, pɔ̃hera n nyuurɔ muɔ puan, pɔ̃hera n nyuurɔ ko'kãtɛ puan, pɔ̃hera n nyuurɔ la suurɔ seto n de pumparenduma.

²⁷ Namehegɔ la tuunkãra yu'uŋɔ, gɔgara dabeha zo'e zo'e, kom la ko'nyuuro, saŋa zo'e zo'e ka tara wan di, ɔɔrɔ la beele puan.

²⁸ Gee bala gã'arɛ kinkɛleŋa, mam en de se'em ti mugehego gã'a n zuo mam mu'ɛ nini la lageŋɔ duma la za'a la zuo.

²⁹ Ani n de tɔregɔ daana, ti mam dagena tɔregɔ daana? Ani ti ba pirɛ ti a lu, ti bugum ka dita mam?

³⁰ Mam han wan ŋmɛ'ɛra nyu'ɔ, mam ŋmɛ'ɛri mɛ la yele sɛ'a en bahɛ ti mam tɔregɔ niira la.

³¹ Se'em en de Yinɛ, la Daana Yezu Sɔ la, (ti sum dɛna a dinɛ wuuha wuuha) la, mi ti mam ka pareni.

³² Damasekuse tiŋa puan, Aretase en wa dɛna timbihega nɛŋa daana saŋa la, ba wa bahɛ ti gureba n gura Damasekuse tiŋa nayahi la za'a, ti ba ta'am nyɔkɛ mam.

³³ Gee ba yuum dikɛ mam iŋɛ la pi'ɔ puan, dikɛ mam doohe yoko pika puan labelɛ la nangoone la bala ti mam ta paaɛ tiŋa piiɛ a nu'uhen.