2 Korẽntɩ 10 - ZE'ELEGO PAALEGA

Pɔɔl ka sakɛ a tuuma zuo

¹ Mam mɛŋa Pɔɔl, mam beleni ya mɛ doohe la Kiresta ma'ma' la a uhega la puan, mam se'em n ni sigehe n mɛŋa n han ni zɛ'a ya nɛŋan, gee kpe'em bo' ya n han ni zaaɛ la ya.

² Mam beleni ya mɛ ti mam han ni bɔna la ya, n dagi n kpe'em la ya, la n bɔta ti n da sakɛ bo' sɛba n ti'ihɛ ti tu iti sɛla woo la nɛresaalenɛ puan la.

³ Yelemɛŋerɛ, tu dela nɛresaaleba, gee tumam ka zaberɛ woo nɛresaaleba n zaberɛ se'em la,

⁴ se'ere n sɔi la, tumam zaberɛ lɔgerɔ la yeen dagena la nɛresaala zaberɛ lɔgerɔ, gee tu tari la Yinɛ paŋa en wan ta'am sagum pahi zi'ihi.

⁵ Tu sageni nɔkpɛ'ɛma mɛ la pirega lɔgeseko woo n zaberɛ la Yinɛ mi'ilum la, gee nyɔgera putɛ'sɛ'a woo n boi ti ba nana Kiresta.

⁶ Tu maahum mɛ ti tu namehɛ sɛba woo n ka nane la, yamam han nam ba'ahɛ.

⁷ Biheri ya la sɛla n ze' ya nɛŋa wa, yamam han nam ti ya dela la Kiresta dinɛ, yi tiiheri ya ya mɛhi yeledina wa, ti wuu yan n de Kiresta deni la, tumam me dela bala mɛa.

⁸ Nananawa, mam han pun ŋmɛ' n nyu'ɔ zo'e fii wa, la pan-sɛka ti tu tara, ti tu Daana la dikɛ bo' tu ti ka mɛta tɔ gee dagi ka aahum tɔ wa la, mam kan tara vi la ka.

⁹ Mam ka boti la ana wuu n zigeri ti n vuuhe ya mɛ dɔla n gulehegɔ wa puan.

¹⁰ Se'ere en sɔi la, ba yeti, “A gɔnɔ tibegɛ mɛ gee kpe'em, gee a han zɛ'a ya nɛŋan, a ka tari paŋa ti a yetɔgum la me ka tara tibehum.”

¹¹ Bahɛ ya ti nɛrebana wa baŋɛ ti, tum yeti ya sɛla gɔŋɔ puan, tu han ka bɔna la ya la, tu wan yele la bala mɛa tu han bɔna la ya.

¹² Tumam ka sakɛ dikɛ tu mɛhi pa'ahɛ bii makɛ la sɛba n pɛgeri ba mɛhi la. Gee bamam han mageha ba mɛhi, tara ba mɛhi giila la taaba, ba ka pa'alɛ ti ba tari yɛm.

¹³ Tumam en de se'em la, tu ka ŋmɛ'ɛri tu nyu'ɔ zɔ'ɔra tu tɛka beene, gee tumam wan bɔna la ze'sɛka beene ti Yinɛ dikɛ bo' tu la, tu dela tu paaɛ nɛreba zo'e zo'e ta ta' la yamam.

¹⁴ Tumam ka yakɛ tu beene la tumam n daa paaɛ yamam la Yinɛ yelehum la. Tumam n de yia duma ze'ele zi'an n zaaɛ wa'am ya zi'an na la Kiresta faarɛ yelehum wa.

¹⁵ Tumam ka ŋmɛ'ɛri tu nyu'ɔ zɔ'ɔra tu tɛka beene, de vuurɛ dela, tu ka ŋmɛ'ɛri tu nyu'ɔ la basɛba tuuma, gee tumam puti'irɛ dela, wuu ya sakerɛ la n zo'ore la, tumam n tuni zi'an la ya la, wan yalegɛ pa'ahɛ,

¹⁶ ti tu ta'am muulɛ faarɛ yelehum wa tinse'ehi en zɔɛ yamam, gee kan ŋmɛ'ɛra nyu'ɔ la tunsɛ'a n pun tum ayima tuuma zi'an.

¹⁷ “Bahɛ ya ti se'em en ŋmɛ'ɛrɛ nyu'ɔ a ŋmɛ'ɛra kɔ Daana la puan.”

¹⁸ Se'ere en sɔi la, dagi sɛba en pɛgeri ba mɛhi ti Yinɛ to'e ba, gee sɛba ti Yinɛ mɛŋa pɛgera la.