2 Korẽntɩ 1 - ZE'ELEGO PAALEGA

Pu'uhegɔ

¹ Mam Pɔɔl, n de Yezu Kiresta tuntuna, doohe la Yinɛ sumboolum, la Timoti tu suuɔ la en gulehɛ bɔ'ɔra Yinɛ lageŋɔ la n boi Korinti puan la, la nɛresunduma la woo n boi Akaiya tiŋa puan za'a la.

² Zu'uhegɔ bɔna la ya, la suma'ahum n ze'ele Yinɛ n de Sɔ, la tu Daana Yezu Kiresta zi'an bɔna la ya.

Pɔɔl pɛka, a namehegɔ la pooren

³ Sum dɛna Yinɛ n de tu Daana Yezu Kiresta Sɔ la dinɛ, nimbu'ɔ zɔta za'a Sɔ la, Yinɛ se'ere n de sumbugela woo daana la.

⁴ Se'em n bugelɛ tu suya tu namehegɔ wuu puan, ti tumam me ta'am bugelɛ sɛba n boi namehegɔ puan, la sumbugelum sebo ti Yinɛ dikɛ bugelɛ tumam mɛhi la.

⁵ Wuu Kiresta namehegɔ la n yage tumam zuo zo'e zo'e se'em la, bala mɛa ti tumam sumbugehum la me wan yaga ya zuo zo'e zo'e Kiresta puan.

⁶ Tumam han nyɛta namehegɔ, la dela yamam sumbugehum la ya faarɛ zuo. Tu han nyɛta sumbugehum, la dela yamam sumbugehum, sebo ti ya nyɛ doohe yan ma'ɛ ya mɛhi, gee ŋmibera namehegɔ seko ti tumam namehera ku puan la.

⁷ Tumam n tari beere putɛ'se'ere la ya ka miini. Se'ere en sɔi la, tumam mi' ti, yamam n nameheri la tɔ wa, bala mɛa ti ya wan nyɛ tumam sumbugehum la tɔ.

⁸ Tumam ka boti ya bɔna aliko n suurɔ, la tumam n nyɛ namehɛ seko Esiya tiŋa la, se'ere en sɔi la, la daa ba' wuŋɛ tu mɛ gaŋɛ, ta wɔ̃regɛ tɔ, ti tu pun ka le ta bɔta ti tu vɔna.

⁹ Yelemɛŋerɛ, la daa ani tɔ woo ba gakɛ tu mɛ ti ba ku la, gee ŋwana wa en iŋɛ la, daa bahɛ ti tu ka dɛla tu mɛhi, gee Yinse'ere n vo'ore kum la.

¹⁰ Se'em en faaɛ tumam nɔyalegerɛ kum wa puan bahɛ la, kelum faara tu mɛ, eŋa puan tu puti'irɛ dela, ti a wan le faaɛ tɔ bahɛ,

¹¹ yamam en naaɛ la tɔ, suŋera tɔ la nupu'uŋmɛ'a la, bala zuo ti a bu tu sum doohe nɛreba zo'e zo'e nupu'ɔ ŋmɛ'a la puan. La bahɛ ti nɛreba zo'e zo'e bo' Yinɛ fara bo' tu.

Pɔɔl sore kinɛ gu'a

¹² Yelemɛŋerɛ, tumam ŋmɛ'ɛri tu nyu'urɔ mɛ, gee me tara yelemɛŋerɛ tu puti'ira puan ti Tumam tum timpaberɛ wa zuo mɛ la yelemɛŋerɛ, la Yinɛ zoolum, gee dagena tiŋa wa zuo yɛm, gee Yinɛ zu'uhegɔ la, ti ŋwana wa dɛna la yamam wa zuo.

¹³ Se'ere en sɔi la, tu ka guleheri sɛla bɔ'ɔra ya gana sɛla ti ya wan ta'am kãalɛ gee me bɔkɛ. Mam puti'irɛ dela ya wan bɔkɛ bala ta paaɛ ba'ahegɔ.

¹⁴ Wuu yan pun bɔkɛ tɔ zi'ihi sise'ehi la, ti Daana Yezu daarɛ la, tumam n wan dɛna ya nyu'ɔ ŋmɛ'a wuu yamam n wan dɛna tumam nyu'ɔ ŋmɛ'a se'em la.

¹⁵ Mam mi' dina wa la zuo, n boti ni ti n wa'am la yamam zi'an yia na, ti ya ta'am nyɛ zu'uhegɔ sugum nuuren buyi'.

¹⁶ Mam boti ni ti n kaaɛ ya bihɛ mɛ n han ta yɛ'a Masedoniya tiŋa, gee n han ta ze'ele Masedoniya lɛbera na, n le kaaɛ ya bihɛ, gee ti ya bahɛ mam ti n kiŋɛ Yudiya.

¹⁷ N daa yeen yɛta mɛ, mam daa yeti ya dina wa la mɛ bii? Mam maaheni n maaheŋɔ dɔla la asaala yoi? Ti n yeen yeti “Ɛ̃ɛ ɛ̃ɛ” ŋmɛregɛ bilam yeti “Aayi aayi?” Ze'yiŋa?

¹⁸ Wuu Yinɛ n kɔ'ɔm dɛna yelemɛŋerɛ daana wa la, tumam en yeti sɛla bɔ'ɔra ya ka tabelɛ dɛna “Ɛ̃ɛ la Aayi.”

¹⁹ Se'ere en sɔi la, Yinɛ Dayua la, Yezu Kiresta, se'em yelehum ti tumam muulɛ bo' ya la, Silevanuse la Timoti la mam daa ka tari “Ɛ̃ɛ la Aayi.” Gee a puan, saŋa woo la kɔ'ɔm dɛna la “Ɛ̃ɛ.”

²⁰ Se'ere en sɔi la, eŋa puan, Yinɛ nɔbiŋe a woo dela “Ɛ̃ɛ.” Dina wa zuo, la dole la eŋa puan ti tu ni yeti “Taari la,” Yinɛ sɔna na'ahegɔ.

²¹ Gee la dela Yinɛ n sɛ' tumam la yamam Kiresta puan, gee bi'ihɛ tu,

²² doohe la en dikɛ a daalehum la daalɛ tɔ, gee bo' tu a Fa'a Sia tu suya puan ti la dɛna a yia lɔkɔ en sɛ tɔ ze'ele.

²³ Gee mam yi' la Yinɛ ti a dɛna mam aze'nyɛ daana, ti ya da nyɛ susageŋɔ zuo, ti n daa ka le wa'am Korinti na la.

²⁴ Mam yeti se'em wa dagi la n boti n ba' dikɛ la zeero pa'ahɛ ya sakerɛ la puan, gee la tugum dɛna la tu dela tuntuneba la ya, ya tara nyɛɛma zuo, se'ere en sɔi la, ya ze' mɛ kankaŋi ya sakerɛ la puan.