1 Zã 5 - ZE'ELEGO PAALEGA

Sakerɛ nyaŋɛ tiŋa wa zuo

¹ Se'em woo en nam ti Yezu en de Kiresta la, Yinɛ en dɔgɛ a daana, se'em woo en nɔŋɛ dɔgera la, me nɔŋɛ se'em ti a dɔgɛ la mɛ.

² Dina puan ti tu mina ti, tu nɔŋɛ Yinɛ kɔma, tu han nɔŋɛ Yinɛ gee nana a nɔze'elego la.

³ Yinɛ nɔŋerɛ en de se'em ŋwana, ti tu nana a nɔze'elego la. A nɔze'elego la me ka tibegɛ vilegera,

⁴ se'ere n sɔi la, se'em woo ti Yinɛ dɔgɛ nyaŋeri tiŋa wa mɛ. Nyaŋerɛ se'ere en nyaŋɛ tiŋa wa zuo n ŋwana, tu sakerɛ.

⁵ Bala, Ani en de en nyaŋɛ tiŋa wa zuo, han dagena fum se'em nam ti Yezu dela Yinɛ Dayua?

Yinɛ dayua la aze'nyɛ yɛla

⁶ Yezu Kiresta kana en bala doohe ko'om la ziim puan wa'am na na la. Dagi la a doohe la ko'om la ma'a puan wa'am na, gee ko'om la la ziim. Fa'a Sia la en de aze' nyɛ daana, se'ere en sɔi la, Sia la dela yelemɛŋerɛ.

⁷ Ba dela batã en de aze' nyɛ duma. Tinsuŋan, Sɔ la, Yelehum la, la Fa'a Sia la. Bana batã dela bunyinɛ.

⁸ Ti ba dela batã en de aze'nyɛduma tiŋa wa zuo. Fa'a Sia la, ko'om la, la ziim la, bana batã wa naaɛ la taaba.

⁹ Tu han tɔ'ɔha nɛreba en iŋɛ se'em yɛla, Yinɛ en iŋɛ sɛla la yɛla gani bala, Yinɛ en tɔgɛ a Dayua la yɛla se'em n ŋwana.

¹⁰ Se'em woo en nam Yinɛ Dayua la dela aze' nyɛ daana a mɛŋa suure puan. Se'em woo en ka nam bo' Yinɛ, iŋɛ Yinɛ ti a dɛna la pumparema, la ban ka nam yelesɛ'a ti Yinɛ tɔgɛ doohe a Dayua la.

¹¹ Yinɛ en iŋɛ sɛla la yele en ŋwana. Yinɛ bo' tu la vom sumɔ en kamba'ahɛ, ti vom buna wa boi la a Dayua la puan.

¹² Se'em woo en tari Dayua la, tari vom mɛ, se'em woo en ka tari Yinɛ Dayua la, ka tari vom.

Ba'ahegɔ

¹³ Mam gulehɛ yele ana wa bɔ'ɔra la yamam sɛba en nam Yinɛ Dayua la yu'urɛ la, ti ya mina ti ya tari Yinɛ vom sumɔ en kamba'ahɛ la.

¹⁴ Buraanɛ se'ere ti tu tara a puan dela, ti tu han soke en sɛla doohe a suboolum la, a kelehe tu mɛ.

¹⁵ Ti tu han mina ti a wum sɛla woo ti tu soke, tu mi' ti, tu to'e sɛla ti tu soke en la.

¹⁶ Fum han nyɛ ti fum suuɔ tuue tuue se'ere en dagi a ki, fum suhɛ Yinɛ bo' en, ti a bo' a daana vom, sɛba tuure en dagi ba ki la. Tuure boi mɛ dɛna fum ki. Mam ka yeti ya suhɛ tuure dinɛ.

¹⁷ Sɛla en dagi tuuntɔɔ woo dela tuure gee tuure boi mɛ ka kuura.

¹⁸ Tu mi' ti, se'em woo ti Yinɛ dɔgɛ la kɔ'ɔm ka bɔna tuure puan, se'ere en sɔi la, Kiresta se'em ti Yinɛ dɔgɛ la en gu'uri en, ti Sagena la ka kalena ba.

¹⁹ Tumam mi' ti tu dela Yinɛ kɔma, gee be'em en ba' zo'e tiŋa wa zuo za'a.

²⁰ Tu me mi' ti, Yinɛ Dayua la wa'am na bo' tu la bɔkerɛ, ti tu mina eŋa se'em en de yelemɛŋerɛ la, tu me boi la eŋa se'em en de yelemɛŋerɛ la puan, Yelemɛŋerɛ dina wa dela Yinɛ Dayua Yezu Kiresta. Eŋa en de Yinɛ de mɛŋa mɛŋa, la Yinɛ vomsumɔ kamba'ahɛ.

²¹ Lan de ŋwana la, N kɔmbibehi wa, gu' ya mɛhi suŋa suŋa baga puan.