1 Zã 4 - ZE'ELEGO PAALEGA

Mageha Sɛɛhi bihera

¹ Sunɔŋerɛ duma wa, da nam ya sia woo, gee magehɛ sɛɛhi la bihera nyaa, ba ze'ele Yinɛ zi'an na, se'ere en sɔi la, nɔtɔgehe pumparenduma zo'e zo'e en kɛ̃ tiŋa wa zuo.

² Dina puan ti ya wan mina Yinɛ Sia la. Sɛsɛka woo en purɛ ti Yezu Kiresta wa'am me na la ingɔŋɔ, ze'ele la Yinɛ zi'an na,

³ gee sɛsɛka woo en ka purɛ ti Yezu [Kiresta wa'am me na la ingɔŋɔ] ka ze'ele Yinɛ zi'an na, sɛkana en de Kiresta dima la sia la ti ya wum ti ka kini na la, ka pun diŋɛ bɔna tiŋa wa zuo mɛ.

⁴ Kɔmbibehi wa, yamam ze'ele la Yinɛ zi'an na, gee nyaŋɛ ba, se'ere en sɔi la, se'em n boi ya puan la gani se'em en boi tiŋa wa zuo la mɛ.

⁵ Ba ze'ele la tiŋa wa zuo na, bala la, ban yeti sɛla dela tiŋa wa zuo yɛla, ti tiŋa wa zuo me kɛleha ba.

⁶ Gee tumam ze'ele la Yinɛ zi'an na, se'em woo en mi' Yinɛ kelehe tumam mɛ, se'em woo n ka ze'ele Yinɛ zi'an na ka kelehe tu. Dina puan ti tu mina yelemɛŋerɛ sia, la pã'ahegɔ sia la.

Yinɛ dela nɔŋerɛ

⁷ N Sunɔŋerɛ duma wa, bahɛ ya ti tu nɔŋɛ ya taaba, se'ere en sɔi la, nɔŋerɛ ze'eti la Yinɛ zi'an na. Se'em woo en tari nɔŋerɛ, Yinɛ en dɔgɛ en, ti a mina Yinɛ.

⁸ Se'em woo en ka tari nɔŋerɛ ka mi' Yinɛ, se'ere en sɔi la, Yinɛ dela nɔŋerɛ.

⁹ Yinɛ niiɛ a nɔŋerɛ pa'alɛ tɔ la sadɔɔ kuna puan. Yinɛ tum la a mɛŋa dayua ba'arɛ bahɛ tiŋa wa zuo na, ti tu wan vɔna vom sumɔ en de Yinɛ vom, dɔla a puan.

¹⁰ Dina wa puan ti nɔŋerɛ bɔna, dagi ti tumam en nɔŋɛ Yinɛ, gee eŋa en nɔŋɛ tɔ, gee tum a Dayua ti a wa'am na dɛna akaabɛ to'e kaabegɔ bo' tumam tuure.

¹¹ N Sunɔŋerɛ duma wa, Yinɛ en ba' nɔŋɛ tumam ŋwana wa la, tumam me dela tu nɔŋɛ taaba.

¹² Se'em nan ka tabelɛ nyɛ Yinɛ. Gee tu han nɔŋɛ taaba, Yinɛ boi tu puan mɛ, ti a nɔŋerɛ la niiri mɛ suŋa tu puan.

¹³ Dina puan ti tu mina ti, tu boi la a puan, ti eŋa me bɔna tu puan, se'ere en sɔi la, a bo' tu a Fa'a Sia la.

¹⁴ Tu me nyɛ de mɛ, gee muula ti, Yinɛ en de Sɔ la tum la a Dayua ti a dɛna Faara bo' tiŋa wa zuo.

¹⁵ Yinɛ boi mɛ la se'em woo en purɛ ti Yezu dela Yinɛ Dayua, gee ti a daana me bɔna Yinɛ puan kankaŋi.

¹⁶ Bala tumam mi' gee me nam nɔŋerɛ se'ere ti Yinɛ tara bɔ'ɔra tu la mɛ. Yinɛ dela nɔŋerɛ, se'em woo en boi nɔŋerɛ puan, boi la Yinɛ puan, ti Yinɛ me bɔna a daana puan.

¹⁷ A nɔŋerɛ la niiɛ suŋa suŋa tu puan la ŋwana. Ti dabeem kan ta bɔna tu puan la fii me gakerɛ daarɛ la, beni zuo wuu eŋa en ani se'em la, tumam me ani la bala tiŋa wa zuo.

¹⁸ Dabeem ka boi nɔŋerɛ puan, gee nɔŋerɛ en pirɛ sa'ahɛ la dabeem. Dabeem dole mɛ la sɛla en de tuberɛ dɔlegerɛ, ti se'em woo en tari dabeem nan ka paaɛ nɔŋerɛ en pirɛ ba'ahɛ.

¹⁹ Tumam tari nɔŋerɛ, beni zuo, eŋa en nɔŋɛ tu yia.

²⁰ Se'em han yeti, “Mam nɔŋɛ Yinɛ” gee yaaɛ a suuɔ, dela pumparema. Se'ere en sɔi la, ŋwani ti eŋa ka nɔŋɛ a suuɔ ti a nyɛta la nini, gee wan ta'am nɔŋɛ Yinɛ se'em ti a ka nyɛta?

²¹ Nɔze'elego la ti tu to'e a zi'an la dela dina wa. Ti se'em en nɔŋɛ Yinɛ, dela a nɔŋɛ a suuɔ me.