1 Zã 3 - ZE'ELEGO PAALEGA

¹ Bihɛ ya nɔŋerɛ kãtɛ se'ere en boi de tɔka ti Sɔ la dikɛ bo' tu, ti ba yi'ira tumam Yinɛ kɔma. Ɛ̃ɛ tumam en sirum de sɛba n bala. Se'ere en sɔi ti tiŋa wa ka mina tu la dela, tiŋa wa yuum ka ka mi' en.

² N sunɔŋerɛ duma wa, tu dela Yinɛ kɔma nananawa. Tumam n wan ta ana se'em nan ka niiɛ. Tumam n mi' sɛla dela dina wa, Kiresta han ta niiɛ na, tu wan ana wuu en la, tu wan nyɛ en wuu en ani se'em la.

³ Se'em woo en tari putɛ'dina Yezu Kiresta puan, peere la a mɛŋa wuu eŋa Kiresta en de fa'a se'em la.

⁴ Se'em woo en tuue me galum mɛ, tuure dela galeŋɔ.

⁵ Ya mi' ti Kiresta niiɛ na ti a dikɛ la tuure, ti eŋa puan ti tuure ka bɔna.

⁶ Nɛra ka boi bɔna a puan gee tuura. Se'em en tuure ka nyɛ en, bii a mina en.

⁷ Kɔmbibehi wa, da bahɛ ya ti nɛra nɛra pa'ahɛ ya. Se'em woo en tuni sɛla en de tuuntɔɔ dela tuuntɔɔ daana, woo eŋa Kiresta en de tuuntɔɔ daana se'em la.

⁸ Se'em woo en tari tuure dela Sagena la bia, se'ere en sɔi la, Sagena la pun tuura mɛ la bala pi'ileŋen na. Yinɛ Dayua la niiɛ na la yele dina zuo, ti a lorege Sagena la tuuma za'a za'a.

⁹ Se'em woo ti Yinɛ dɔgɛ en kɔ'ɔm ka bɔna tuure puan, beni zuo, Yinɛ naanɛ en boi a puan, a kan ta'am bɔna tuure, beni zuo, Yinɛ en dɔgɛ en.

¹⁰ Yinɛ kɔma, la Sagena la kɔma en niiɛ ba mɛhi se'em en ŋwana. Se'em woo en ka tuni sɛla en de tuuntɔɔ ka ze'ele Yinɛ zi'an na, bii fum se'em woo en ka nɔŋɛ fum suurɔ.

Nɔŋɛ ya taaba

¹¹ Bala, yelehum la n ŋwana ti ya wum pi'ileŋo na la, ti tu nɔŋɛ taaba.

¹² Tu da ana wuu Keen se'em en ze'ele Sagena la zi'an na, ku a mɛa suuɔ la. Beni zuo ti a ku en? Se'ere zuo, a mɛŋa tuuma la dela be'em, gee ti a suuɔ la tuuma dɛna tuuntɔɔ.

¹³ Da ze' ya yɛli n suurɔ, la tiŋa wa zuo en yaaɛ ya la.

¹⁴ Tu mi' ti, tumam zɔɛ la kum paaɛ vom, beni zuo tu nɔŋɛ la taaba. Se'em woo en ka nɔŋɛ, ŋwɔni ti a ki mɛ n bala.

¹⁵ Bala se'em woo en yaaɛ ba suuɔ dela kuureba, ya mi ti kuureba ka tari Yinɛ vom sumɔ en kan ba'ahɛ la.

¹⁶ Tu mi' nɔŋerɛ la dina wa puan ti, a dikɛ la a vom biŋe bo' tumam, ti tumam me dɛna la tu dikɛ tu vom biŋe bo' tu taaba.

¹⁷ Yinɛ nɔŋerɛ boi se'em daana en tari tiŋa wa lɔgerɔ la ŋwani gee nyɛ a suuɔ en boti suŋɛ, gee kɔ'ɔm kãbɛ suure zagehɛ ti a suŋɛ en.

¹⁸ Kɔmbibehi wa, da bahɛ ya ti tu nɔŋɛ taaba la nuurɛ bii tugum ma'a, gee tu nɔŋɛ ya taaba la, yelemɛŋerɛ la tuuma.

¹⁹ Dina puan ti tu wan, mina ti tu ze'ele la yelemɛŋerɛ puan na, ti tu han wa'am a nɛŋan na, tu suya wa ma'ɛ lɔge lɔge.

²⁰ Ti suya han ni ta zɛregɛ tɔ, Yinɛ gani tu suya la mɛ, gee mina sɛla woo.

²¹ Sunɔŋerɛ duma, tu suya han ka zɛregɛ tɔ, tu wan ta'am ze'ele Yinɛ nɛŋan ti dabeem kana,

²² gee to'e a zi'an sɛla woo ti tu soke, beni zuo, tu nane a nɔze'elego la mɛ, gee ita sɛla n peere a puurɛ.

²³ A nɔze'elego la n ŋwana, ti tu nam a Dayua Yezu Kiresta yu'urɛ la, gee nɔŋɛ taaba, wuu eŋa en bo' tu nuurɛ se'em la.

²⁴ Se'em woo en nane a nɔze'elego la boi la a puan, ti eŋa me bɔna a puan. Dina puan ti tu mina ti a boi la tu mɛ, doohe la a Fa'a Sia la ti a bo' tu la.