1 Zã 2 - ZE'ELEGO PAALEGA

Kiresta tu nupu'ŋmɛ'ɛra

¹ N kɔmbibehi wa, n gulehɛ yele ana wa bɔ'ɔra ya ti, la bahɛ ti ya da tara tuure. Gee se'em han tuue, tu tari nupu'ŋmɛ'ɛra mɛ en boi la Sɔ la, Yezu Kiresta, tuuntɔɔ daana la.

² Eŋa en de akaabɛ to'e kaabegɔ bo' tumam tuure la, dagi tumam ma'a tuure la, gee tiŋa wa zuo za'a tuure.

³ Nananawa, yele dina wa zuo ti tu wan baŋɛ ti tu mi' en paaɛ paaɛ, tu han nana a nɔze'elego la.

⁴ Se'em woo en yeti, “Mam mi' en”, gee ka nana a nɔze'elego la, dela pumparema, ti nɛre-ina daana, yelemɛŋerɛ ka boi a puan.

⁵ Gee se'em woo en nane a yelehum la, yelemɛŋerɛ, nɛre-ina daana puan, Yinɛ nɔŋerɛ la bi'ɛ paaɛ mɛ a puan. Dina ti tu wan baŋɛ ti tu boi a puan.

⁶ Se'em woo en yeti, “Mam boi a puan.” Dela a ita itegɔ wuu eŋa en iti se'em la.

Nɔze'elego paalega

⁷ N sunɔŋerɛ duma wa, n ka guleheri nɔze'elego paalega bɔ'ɔra ya, gee nɔze'elego kɛka la ti ya pun tara de pi'ileŋen na la. Nɔze'elego kɛka la dela, yelehum la ti ya pun wum la.

⁸ Gee n kelum guleha la nɔze'elepaalega bɔ'ɔra ya, en de yelemɛŋerɛ a puan, la yamam me puan, beni zuo, lika la ye' tɔla mɛ, gee ti yelemɛŋerɛ niihum la pun niira na.

⁹ Se'em woo en yeti, “Mam boi la niihum la puan,” gee yaaɛ a suuɔ, kelum bɔna la lika la puan.

¹⁰ Se'em woo en nɔŋɛ a suuɔ, boi la niihum la puan, ti nɛre-ina daana, sɛla ka boi wan bahɛ ti a gɛ̃ta.

¹¹ Gee se'em woo en yaaɛ a suuɔ boi la lika la puan, kina lika la puan, gee ka mina sose'ere ti a wan doohe, beni zuo, lika la tari la fɔɔnɛ na ki'iha a ninin.

¹² N gulehɛ bɔ'ɔra la yamam, n kɔmbibehi wa, beni zuo, Yinɛ bahɛ ya tuure bo' ya a yu'urɛ la zuo la.

¹³ N gulehɛ bɔ'ɔra yamam, sɔduma, beni zuo, ya mi' en, se'em en pun bɔna pi'ileŋen na la. N gulehɛ bɔ'ɔra yamam bumbile-pɔɔlegɔ, beni zuo, ya nyaŋɛ be'em daana la mɛ.

¹⁴ N gulehɛ bo' yamam kɔma, beni zuo, yamam mi' sɔ la. N gulehɛ bo' yamam sɔduma, beni zuo, yamam mi' se'em en pun bɔna pi'ileŋo puan ha la. N gulehɛ bo' yamam bumbile paalehi, beni zuo, yamam tari paŋa, ti Yinɛ yelehum la bɔna ya puan, ti ya me nyaŋɛ Sagena la.

¹⁵ Da nɔŋɛ ya tiŋa wa zuo, bii yelesɛ'a en boi ka puan wa. Se'em han nɔŋɛ tiŋa wa zuo, Sɔ la nɔŋerɛ ka boi eŋa daana puan.

¹⁶ Se'ere en sɔi la, sɛla woo en boi tiŋa wa zuo la, ingɔŋɔ wa kɔrehi, nini wa kɔrehi, vom wa puan ya'anɛ, ka ze'ele Sɔ la zi'an na, gee tiŋa wa zuo.

¹⁷ Tiŋa wa zuo la ka kɔrehi la ye' tɔla mɛ, gee sɛba en tuni Yinɛ suboolum wan bɔna wuuha.

Kiresta dima daana la saŋa

¹⁸ N kɔma wa, la dela ba'ahegɔ saŋa. Yan pun wum ti Kiresta dima daana la kini na la, bala mɛa ti nananawa, Kiresta dima duma zo'e zo'e wa'am na. Ŋwana puan ti tu baŋɛ ti la dela ba'ahegɔ saŋa la.

¹⁹ Ba ze'ele la tumam zi'an yehe, gee ba daa dagi tumam. Ba han deni la tumam puan, ba wan yee ni bɔna la tɔ. Gee ban yehe la, ba bahɛ ti la niiɛ ti ba se'em ka de tumam puan.

²⁰ Gee Fa'a Daana la en sɔi yamam, ti ya za'a mina dina wa.

²¹ Mam en gulehɛ bɔ'ɔra ya wa, dagi la ya ka mi' yelemɛŋerɛ la, gee ya mi' de mɛ, gee mina ti pumpɔreŋɔ ka ze'eti yelemɛŋerɛ puan na.

²² Ani en de pumparema la? Han dagena se'em en zagehɛ ti Yezu dagi Kiresta la. Ena daana en de Kiresta dima la, se'em en zagehɛ Yinɛ en de Sɔ, la Dayua la.

²³ Se'em woo en zagehɛ Dayua la, kan tara Sɔ la. Se'em woo en sakɛ bo' Dayua la tari Sɔ la me mɛ.

²⁴ Gee han dɛna yamam bahɛ ya ti sɛla ti fum wum pi'ileŋen ha la bɔna fum puan. Sɛla woo ti fum wum pi'ileŋen ha la han bɔna fum puan, fum wan bɔna la Dayua la, la Sɔ la.

²⁵ Sɛla ti Yinɛ mɛŋa biŋe nuurɛ la tɔ n ŋwana, Yinɛ vom sumɔ n kamba'ahɛ.

²⁶ N gulehɛ yele ana wa bɔ'ɔra ya la sɛba en wan pã'ahɛ ya la zuo.

²⁷ Han dɛna yamam, bi'ihegɔ seko ti ya to'e a zi'an la, boi ya puan mɛ, bala, ya ka eere nɛra ti a pa'alɛ ya. Gee a bi'ihegɔ la en pa'ali ya sɛla woo la, ti la me dɛna sira gee dagena pumpɔreŋɔ, wuu a bi'ihegɔ la en pun pa'alɛ ya se'em la, boni ya a puan.

²⁸ Gee Nananawa n kɔmbibehi wa, boni ya a puan, ti a han ta niiɛ na, tu wan tara inkpeŋere ti vi ka tara tɔ a nɛŋan, a han ta wa'am na.

Yinɛ kɔma

²⁹ Ya han mina ti Yinɛ dela tuuntɔɔ, ya wan mina ti se'em woo en iti sɛla en de tuuntɔɔ, eŋa en dɔgɛ en.