1 Timoti 6 - ZE'ELEGO PAALEGA

¹ Bahɛ ti sɛba woo en de da'aba na'aha ba kpɛ'ɛnduma sɛla woo puan, ŋwana ti Yinɛ yu'urɛ, la pa'alegɔ la kan nyɛ tuurɛ.

² Sɛba kpɛ'ɛnduma en de sakereba la, ba da zɛɛna ba, se'ere zuo, ba dela lageŋɔ la puan nɛreba. Gee ba tugum tuna suŋa suŋa bɔ'ɔra ba, se'ere en sɔi la, sɛba en diti ba tuuma la nyuurɔ dela sakereba, en de ba suurɔ ti ba nɔŋɛ. Pa'ala gee ka'ana ba yele ana wa la ninmu'urɛ.

Pumpã'ahum pa'alegɔ, la yelemɛŋerɛ tarehum

³ Se'em han pa'ala sɛla en boi la tɔka gee ka sakɛ bo' Daana Yezu Kiresta yelehum, la pa'alegɔ seko en dole Yinɛ zoolum yɛla la,

⁴ a pã'ahɛ la a mɛŋa, ka bɔkera sɛla, gee bɔta la gaka la nɔkpe'en yaalehi doohe yu'ura puan. Bana puan nyuure, welehego, tuurɛ, dagebo',

⁵ ŋmɛ'ɛra nɔkpɛ'ɛma la sɛba en ka ti'ihɛ suŋa, ka tara yelemɛŋerɛ la, ti'iha ti Yinɛ zoolum dela bɔɔbɔ sore.

⁶ La de sira, tarehum kãtɛ boi Yinɛ zoolum puan mɛ, ti la seke.

⁷ Se'ere en sɔi la, tu ka tari sɛla wa'am tiŋa wa zuo na, bala ti tu kan dikɛ sɛla lebe,

⁸ gee tu han tara dia la lɔgerɔ, tu bahɛ ti la seke tu.

⁹ Gee sɛba en boti ba ba' tara la luti la magehegɔ puan, ti yeleyaalehi zo'e zo'e la kunkoma'ahum tooro ni nyɔgɛ ba, seto en ni za'ɛ nɛreba bahɛ wuŋerɛ la sageŋɔ puan.

¹⁰ Se'ere en sɔi la, ligeri nɔŋerɛ en de be'em woo nyɛgerɛ, ti ban mu'ɛ nini ti ba tara la zuo, basɛba zagehɛ sakerɛ la mɛ, lu' ba mɛhi la wuŋerɛ zo'e zo'e.

Sakerɛ zabesunɛ

¹¹ Gee han dɛna fum, Yinɛ tuntuna wa, zagehɛ yele ana wa woo, dɔla tuuntɔɔ vom, Yinɛ zoolum, sakerɛ, nɔŋerɛ, ŋmibega, la ma'ma' bɔŋa.

¹² Zabɛ sakerɛ zabesunɛ la, gurɛ vom kamba'ahɛ la, se'ere zuo ti ba yi' fum la, la se'ere ti fum purɛ yelemɛŋerɛ purega la nɛreba zo'e zo'e nɛŋan la.

¹³ Yinɛ nɛŋan, se'em en bo'ori sɛla woo vom la, la Kiresta Yezu, se'em en yuum tɔgɛ dinɛ n de se'em Pɔntiyɔsi Palete nɛŋan, gee purɛ yelemɛŋerɛ purega la nɛŋan, ti n bɔ'ɔra hɔ nuurɛ wa,

¹⁴ ti fum tara ze'elego la, ti dɛkɔ bii zɛregerɛ da bɔna bini ta paaɛ Yezu Kiresta lɛbega na,

¹⁵ se'em ti Yinɛ wan bahɛ ti a wa'am sansɛka en nari la puan na la. Eŋa se'em en de sum daana, la se'em ma'a en gani za'a la, Naduma Naba, la Daanduma Daana la.

¹⁶ La dela eŋa ma'a en ka kiiri, gee bɔna niihum sebo en ka kaleni puan. Se'em ti nɛra ka tabelɛ nyɛ en bii wan nyɛ en, eŋa se'em ti na'ahegɔ, la pansɛka en ka ba'aheri dɛna a dinɛ wuuha wuuha la. Taari.

¹⁷ Han dɛna zina beere buntateba wa, ka'am ba ti ba da pa'ala ba mɛhi, bii ba dikɛ ba puti'irɛ delum sɛla en kan bɔna wuuha, gee ba tugum dɛla Yinɛ, se'em en bo'ori tu sɛla woo zo'e zo'e ti tu dita la pupeelum.

¹⁸ Ba dela ba ita itesuŋɔ, ba dɛna buntateba itesuŋɔ puan, ba bɔ'ɔra, ba dɛna sɛba en maahum ti ba tɔta,

¹⁹ Ŋwana ti ba wan ka'aha lɔgeseto en wan bo' ba beere ɛ̃berɛ sunɛ la biŋera saazuo ha, la ba beere tara vom sebo en sirum de vom la.

Pɔɔl kã'aŋɔ la ka'a

²⁰ Timoti, gura sɛla en dikɛ iŋɛ fum puan la suŋa. Zagehɛ yetɔge yooro, la zaba nɔkpɛ'ɛma, la sɛla ti ba parum yi'ira mi'ilum la.

²¹ Ban ti'ihɛ ti bamam mi'ilum la zuo, basɛba buregɛ ba sakerɛ la puan mɛ. Zu'uhegɔ bɔna la hɔ.