1 Timoti 5 - ZE'ELEGO PAALEGA

Sakereba tuuma

¹ Da tahɛ bunkutɛ, gee tɔgera bɔ'ɔra en wuu sɔ la, tɔgera bɔ'ɔra budibeto la wuu fum suurɔ la,

² tɔgera bɔ'ɔra pɔgenya'ahi la me, ba wuu maduma la, pɔge sa'ara la me wuu, fum tapa la, la susunɛ.

³ Na'aha pokɔpa sɛba en sirum de pokɔpa.

⁴ Pokuurɛ han tara kɔma bii yaahi, yia dela ba zamehɛ tuna ba pu'uhegɔ tuuma la ba yiya puan, ba me lebehe bɔ'ɔra ba dɔgereba la. Se'ere en sɔi la, Yinɛ nini tigɛ mɛ la yele aŋa.

⁵ Gee se'em en sirum de Pokuurɛ ka tara bihera, dikɛ a mɛŋa delum la Yinɛ, bɔna suhega la pu'uhegɔ puan yu'uŋɔ la wuntɛɛŋa.

⁶ Gee pɔkɔ-se'ere en diti nyɛlum pun ki mɛ gee vɔna la.

⁷ Mu'ɛ nini bo' ba yele ana wa me pa'ahɛ, ti ba vom da tara zɛregerɛ.

⁸ Se'em woo en ka biheri a yire, yele yele wuu a yire duma, a zagehɛ sakerɛ la mɛ, a be'em gani se'em en ka sakɛ bo' Yezu.

⁹ Pokuurɛ se'ere yu'urɛ en wan bɔna pokɔpa yu'ura puan la dɛna yuuma pihiyoobe beene yɛ'a ha, gee me ele la buyina.

¹⁰ A dɛna se'em ti nɛreba wan tɔgera a sum yɛla, se'em en bihɛ a kɔma ti ba zo'e suŋa na, a tɔ'ɔha saama, tɔ'ɔha nɛresunduma, suŋera sɛba en boi namehegɔ puan, gee kaabɛ a mɛŋa bo' itesuŋɔ woo.

¹¹ Gee da digeha pɔkɔbibehi yu'ura pa'aha yu'ura la puan, se'ere en sɔi la, ba kunkoma'ahum la han ni ta ihege, ve'e ba Kiresta zi'an, ba ni bɔta la ba le ele,

¹² bala ni bahɛ ti ba tari la sageŋɔ wa'am ba mɛhi zuto na, la bamam en zagehɛ ba yia nɔbiŋere la.

¹³ Gee dagi bala ma'a, gee ba zamehɛ la zinyagerɛ, ɛɛra lɔ'ɔha yiya kaara, ba ka ze' la yoo ma'a, gee ba dela yelebibeheduma, la sɛba n kɛ̃'ɛ̃ra nɛreba yɛla puan, tɔgera sɛla en dagi ba tɔgɛ.

¹⁴ Bala, mam wan bɔta ti pɔkɔbibehi ele, dɔgɛ kɔma, bihera ba yiya suŋa, la ba da bo' dima la yɔ'ɔ ti a dɛgɛ tɔ.

¹⁵ Se'ere en sɛ la sɛba pun ŋmɛregɛ mɛ dɔla Sagena la.

¹⁶ Pɔge sɛka en nam Yezu han tara pokɔpa yelemɛŋerɛ a yire, a suŋɛ ba, bala ti zeero kan bɔna lageŋɔ la zuo, ŋwana ti lageŋɔ la wan ta'am suŋɛ sɛba me en sirum de pokɔpa la.

¹⁷ Kiinduma sɛba en tuni lageŋɔ tuuma suŋa la nari la na'ahegɔ en ka tari makerɛ, yele yele wuu sɛba en mu'ɛ nini muula gee pa'ala Yinɛ yelehum la.

¹⁸ Se'ere en sɔi la, la gulehɛ yeti, “Da lu' lɔlega nuurɛ gee tara ka tulegera ki.” “Tuntuna dela ba yɔ en.”

¹⁹ Da malum sakɛ zɛregerɛ ti ba zɛregɛ kiinsɛka, han dagena aze'nyɛduma n paaɛ bayi' batã.

²⁰ Han dɛna sɛba en kɔ'ɔm bɔna be'em puan la, tahɛ ba nɛreba nɛŋan, ti sɛba en gee la, dabeem wan kɛ̃ ba.

²¹ Yinɛ nɛŋan, la Kiresta Yezu nɛŋan, la suŋereba sɛba ti ba looe la nɛŋan, n ka'ani fum mɛ la ninmu'urɛ ti fum to'e yele ana wa za'a, da kɛ̃'ɛ̃ra se'em, ti lugehego da bɔna bini.

²² Da kabelɛ tara fum nu'uhi pagela nɛra zuo, da lagum naara la sɛba tuna be'em, tara fum vom la ti bu ka tara dɛgerɔ.

²³ Da le yuura ko'kahegɛ ma'a, gee nyuura daam fii wa, fum puurɛ la, la fum bã'a la en gbirehe la zuo.

²⁴ Nɛreba basɛba be'em ba' niiɛ mɛ gee wan tari gakerɛ wa'am ba zuo na, gee ti sɛba be'em me wan niiɛ la pooren.

²⁵ Bala mɛa ti tuunsuma ba' niiɛ na, gee la han pun dagena bala, ba kɔ'ɔm kan sugɛ gã'a.