1 Timoti 4 - ZE'ELEGO PAALEGA

Pumparum pa'aleba

¹ Nananawa, Fa'a Sia la yele ti la niiɛ mɛ, ti ba'ahegɔ saŋa la, sɛba wan zagehɛ ba Kiresta kɔma sakerɛ la, doohe la ban kelehe pã'ahegɔ sɛɛhi, la kulekpa'bɛ'ɛhi pa'alegɔ,

² doohe la birekɔgen-pumparenduma sɛba zuto en ka ŋmɛ'ɛri kibegera la.

³ Ba pa'alegɔ la yeti pɔgedire kihi mɛ, gee pɛregera nɛreba ti ba da dita diihe sise'ehi, ti Yinɛ naam ti sɛba en nam gee mina yelemɛŋerɛ la to'e la pɛka dita la.

⁴ Se'ere en sɔi la, sɛlawoo ti Yinɛ naam, ani la suŋa, sɛla ka de tu zagehɛ, tu han to'e de mɛ la pɛka.

⁵ Se'ere en sɔi la, Yinɛ sukɛ de mɛ la yelehum la, la pɛka.

Yezu tuntuna suŋa

⁶ Fum han dikɛ pa'ali kuna biŋe suurɔ la nɛŋan, fum wan dɛna Kiresta Yezu tuntuna suŋa, se'em n tigehɛ a mɛŋa la yelehum sebo en bo'ori sakerɛ la, la pa'ali suŋɔ seko ti fum dɔla wa la.

⁷ Da tara sɛla ita la yetɔge yooro la pɔgenya'ahi sɔlema, gee zamehɛ fum mɛŋa Yinɛ zoolum,

⁸ Beni zuo, wuu giila kpemehego en suŋeri se'em la, bala mɛa ti Yinɛ zoolum tari tuulum sadɔɔ seko woo puan, tara zina vom wa, la vom sebo en kini na nɔbiŋere la.

⁹ Yetɔgum buna wa dela yelemɛŋerɛ, dɛna tu to'e bu nu'uhi siyi.

¹⁰ Tara tara la zina, tu nameheri mɛ gee zigera, beni zuo, tu dikɛ tu beere puti'irɛ delum la Yinɛ vua wa en de asaala woo Faara wa, yele yele wuu sɛba en nam la.

¹¹ Yele ana ti fum wan mu'ɛ nini muula, gee pa'ala a.

¹² Da bahɛ ti nɛra nɛra zeem fum bumbile paalum la zuo, gee tugum dɛna makerɛ bo' sakereba la, fum tugum, fum aŋa, nɔŋerɛ, sakerɛ, la fum filam vom.

¹³ Gee ti n ta paaɛ na la, dikɛ fum mɛŋa bo' fum kãala yelehum la bɔ'ɔra nɛrekuuŋɔ, la kpemehego, la pa'alegɔ.

¹⁴ Da zagehɛ Yinɛ bo'olum sebo en boi fum puan la. Sebo ti ba dikɛ bo' fum doohe purega, ti kiinduma la daa dikɛ ba nu'uhi pagelɛ fum zuo pu'uhɛ la.

¹⁵ Tuna yele ana, kaabɛ fum mɛŋa bo' a, ti nɛra woo wan nyɛ fum tole nɛŋa se'em.

¹⁶ Bihɛ fum mɛŋa suŋa, la fum pa'alegɔ la. Kɔ'ɔm ita yele ana, se'ere en sɔi la, fum han ita yele ana, fum wan faaɛ fum mɛŋa, la fum kɛleheba la.