1 Timoti 3 - ZE'ELEGO PAALEGA

Nɛheduma aŋa

¹ Yetɔge buna wa dela yelemɛŋerɛ, ti, se'em woo en boti a dɛna Yinɛ Lageŋɔ puan nɛŋa daana, a boti la tuunsunɛ.

² Bala, Yinɛ Lageŋɔ nɛŋa daana dela a zɔɛ tuurɛ, a dɛna pɔge yiŋa daana, a ana ma'ma', a tara puti'irɛ, a tara zuo, a tɔ'ɔha nɛreba, a tana pa'ala,

³ a da dɛna bugera, a da dɛna nɛre gbiri gbiri, gee a ana bããlam, a da dɛna zabe-zaberega, a da ba' nɔŋɛ ligeri.

⁴ A dela a tana tara a mɛŋa yire suŋa, bahɛ ti a kɔma sigehe ba mɛhi suŋa gee na'aha nɛreba sadɔɔ seko woo puan.

⁵ Se'ere en sɔi la, se'em han ka ta'am tara a mɛŋa yire suŋa, a wan iŋɛ la ŋwani ta'am tara Yinɛ lageŋɔ la?

⁶ A da dɛna bia sakerɛ la puan, gee a wan ta pirɛ la pa'ali mɛŋa, lu Sagena la sageŋɔ puan.

⁷ Se'ere en gani bala dela, a dɛna se'em ti yiŋa duma nam en, ti a da ta lu zufagehum puan, la Sagena la bɛregɔ puan.

Kiimbibehi aŋa

⁸ Yinɛ lageŋɔ Kiimbibehi me dela ba tara ninmu'urɛ, ba da dɛna lebe ke, lebe ke duma, ba da yuura daam zɔ'ɔra, ba da ba' dɛna bu n bɔteba,

⁹ ba gurɛ sakerɛ yelehum la en gaŋɛ asaala bɔkerɛ la kankaŋi, la putɛ'sunɛ.

¹⁰ Ba magehɛ ba yia bihɛ, ti ba han ze'ele ti tuure ka bɔna ba puan, bahɛ ya ti ba tuna kiimbibehi tuuma.

¹¹ Pɔgehi me dela ba tara ninmu'urɛ, ba da Sagena nɛreba yu'ura gee ba ana ma'ma', ba dɛna yelemɛŋerɛ nɛreba sɛla woo puan.

¹² Kiimbibehi wa woo dela ba dɛna pɔge yiŋa duma, tana ba kɔma, la ba yiya biha suŋa.

¹³ Sɛba en tum suŋa ban de kiimbibehi la zuo la, ba nyɛ la ze'ele suŋɔ bo' ba mɛhi, gee tara buraanɛ sakerɛ se'ere en boi Kiresta Yezu puan la.

Pu'uhegɔ wa sugelum yele

¹⁴ Mam ti'ihɛ ti n wa'am ya zi'an me na nananawa, gee n gulehɛ yele ana wa bɔ'ɔra ya ti,

¹⁵ n han yuura, ya wan baŋɛ lan nari ya ita se'em la taaba Yinɛ yire la en de Yinɛ vua wa pu'uhegɔ yire la, en de yelemɛŋerɛ la ziirɛ, la ɛ̃berɛ.

¹⁶ Bu'a ka boi, tumam pu'uhegɔ wa puan yele sɛ'a en gani asaala bɔkerɛ la, dela yele kãra, A daa niiɛ a mɛŋa la inganɛ puan, di buurɔ Sia la puan, suŋereba nyɛ en mɛ, ba muulɛ a yele mɛ sɛba en dagi Yuuduma la puan ti tiŋa wa zuo nam en, a zom la zuin zuin ha la na'ahegɔ.