1 Timoti 2 - ZE'ELEGO PAALEGA

Pu'uhegɔ sɔya

¹ Sɛla en de yia, mam yeti, ya tara suhega, pu'uhegɔ, nupu'ɔ la fara bu'a pu'uha bɔ'ɔra nɛra woo.

² Pu'uhi ya bɔ'ɔra naduma, la sɛba woo en boi kpe'em kãra puan. Bala ti tu wan bɔna bããlam la suma'ahum, la Yinɛ zoolum, la tibehum.

³ Dina en de tuuntɔɔ gee tigɛ Yinɛ en de tu Faara la nini,

⁴ se'em en boti nɛra woo nyɛ faarɛ gee wa'am na baŋɛ mi'ilum sebo en boi yelemɛŋerɛ la puan la.

⁵ Se'ere en sɔi la, Yinɛ dela deyina, nupu'ŋmɛ'ɛra me dela ayima, Yinɛ la saaleba tiŋasuka Ena daana la Kiresta Yezu, se'em en wa'am na dɛna asaala a mɛŋa la,

⁶ se'em en dikɛ a mɛŋa kaabɛ to'ore kaabegɔ bo' nɛra woo, ti la dɛna aze'nyɛ saŋa ti a pun maahum.

⁷ Dina zuo ti a looe mam ti n muula, gee dɛna tuntuna (mam tɔgeri la yelemɛŋerɛ, n ka pareni), mam dela sɛba en dagi Yuuduma la pa'ala, sakerɛ la yelemɛŋerɛ puan.

⁸ Mam yi boti ni ti, lageŋɔ woo puan, buraahi pu'uha, gee zɛgera tuulum nu'uhi saazuo, ti susuya bii nɔkpɛ'ɛma da bɔna ba puan.

⁹ Bala mɛa ti pɔgehi la me dɛna ba yɛɛra lɔgerɔ seto en nari, makɛ ba suŋa, dɛna futo en ani suŋa. Dagi zuto pã'aŋɔ nyalema nyalema, bii salema lɔgerɔ, bii peranini, bii futo da'a en ba' kpe'em, gee sɛla en tari tibehum gani bala dela,

¹⁰ ba nɔna la tuunsuma, wuu lan nari se'em bo' pɔge se'ehi en mi ban na'ahɛ Yinɛ se'em la.

¹¹ Bahɛ ti pɔgehi zameha bããlam la sigehe n mɛŋa paaɛ paaɛ.

¹² Mam ka bo' sore ti pɔka pa'ala bii a tara kpe'eŋo gana buraa, a dela a ana bããlam.

¹³ Se'ere en sɔi la, Adam ti ba naam yia gee nyaa naam Eva,

¹⁴ la me dagi Adam ti ba yuum pã'ahɛ la, gee pɔka la ti ba yuum pa'ahɛ ti a lebege be'em daana.

¹⁵ Gee la bala za'a, a wan nyɛ faarɛ doohe kɔma dɔgum puan, ba han kelum bɔna sakerɛ, nɔŋerɛ, tuuntɔɔ vom, la narehum.