1 Timoti 1 - ZE'ELEGO PAALEGA

Pu'uhegɔ

¹ Mam Pɔɔl en de Kiresta Yezu tuntuna, doohe la nuurɛ ti Yinɛ en de tu faara la, la Kiresta Yezu en de tu beere puti'irɛ la bo' mam la.

² N gulehɛ gɔŋɔ wa bɔ'ɔra la Timoti, en de mam mɛŋa dayua sakerɛ la puan. Zu'uhegɔ, nimbɔ'zɔrɛ, la suma'ahum en ze'ele Yinɛ en de Sɔ la, la Kiresta Yezu en de tu Daana la zi'an na la dɛna fum dinɛ.

Mini ya pumpã'ahum pa'aleba la yele

³ N yeti fum mɛ la ninmu'urɛ, wuu mam daa yele fum se'em mam daa wa yɛ'a Masedoniya la, ti fum yee Ɛfisu, la fum pa'alɛ nɛreba basɛba ti ba da pa'ala pa'alegɔ en boi kuyima,

⁴ ba da Sagena saŋa la yele yooro la yaabeduma tuuhum wogerɔ seto en yeen tara nɔkpɛ'ɛma kina na, ka bahera ti nɛra bɔkera Yinɛ suboolum la en dole sakerɛ puan la.

⁵ Gee pa'alegɔ kuna wa tuunɛ dela, la bahɛ ti ba tara nɔŋerɛ se'ere en ze'ele susunɛ puan na, putɛ'sunɛ, la yelemɛŋerɛ sakerɛ.

⁶ Nɛreba basɛba bɔregɛ mɛ yele ana puan, gee dikɛ ba mɛhi ta bo' yetɔge yooro en ka tari vuurɛ,

⁷ bɔta ti ba dɛna ze'elego la pa'aleba, gee me ka bɔkera ba mɛhi en yeti sɛla la, bii sɛla ti ba tɔgera la yele la.

⁸ Tu mi' ti ze'elego la ani suŋa mɛ, se'em han dɔla dɛ nima nima.

⁹ Ŋwana vuurɛ dela, fum bɔkɛ yeti, ze'elego la ka ze'ele bo' sɛba en ka tari tuure, gee sɛba en ka dole kihere, la sɛba en ka nane, la sɛba en ka zoti Yinɛ, la be'em duma, sɛba en dagi tuuntɔɔ, la dɛgerɔ duma, sɛba en ku ba ma bii ba sɔ, la nɛre kuureba,

¹⁰ yalum duma, buraahi en gã' taaba, sɛba en koohe nɛreba, pumparenduma, pumparum gakereba, la sɛla woo en ka dole yelemɛŋerɛ pa'alegɔ la,

¹¹ en dole faarɛ yelehum la suŋa en de sum Yinɛ wa dinɛ, ti a dikɛ bo' mam la.

Pɔɔl pupeelum la Yinɛ nimbɔ'zɔrɛ

¹² Mam puurɛ pee mɛ la Kiresta Yezu tu Daana, se'em en bo' mam paŋa, beni zuo, a bihɛ nyɛ ti n nari mɛ, ti a looe mam ti n tuna bɔ'ɔra en,

¹³ la mam daa pun tuura, dɔla sakereba la nama mɛleha ba, dɛna zabe-zaberega. Gee Yinɛ zɔ mam nimbu'ɔ mɛ, beni zuo, mam daa ka mi' mɛ gee tuna bala, mam ka nam la zuo,

¹⁴ Daana zu'uhegɔ la ɔkɛ mam mɛ, la sakerɛ la nɔŋerɛ se'ere en boi Kiresta Yezu puan la.

¹⁵ Yetɔge buna wa dela yelemɛŋerɛ, dɛna tu to'e bu nu'uhi siyi, ti Kiresta Yezu wa'am tiŋa wa zuo na ti a faaɛ la be'em duma, sɛba ti mam be'em gana ba za'a.

¹⁶ Gee dinɛ zuo ti a zɔ mam nimbu'ɔ, ti mam puan, be'em nɛŋa daana wa puan, ti Yezu Kiresta wan pa'alɛ a sugeri en ka tari makerɛ la, ti mam dɛna makerɛ bɔ'ɔra sɛba n wan wa'am na nam en ti ba nyɛ vom kamba'ahɛ.

¹⁷ Na'kãtɛ sɛka en boi wuuha, se'em en ka kiiri, Na'liliŋɔ se'em ma'a en de Yinɛ la, sɔna na'ahegɔ la pɛka wuuha wuuha. Taari.

¹⁸ Pa'alegɔ kuna ti n dikɛ ita fum nu'uhen n bia Timoti, doohe la puresɛka en pun purɛ bahɛ fum zuo la. Ti fum han dɔla a, fum wan zabɛ zabesunɛ,

¹⁹ fum tara sakerɛ la putɛ'sunɛ. Ban zagehɛ ba suya en pa'alɛ ba sɛla la, basɛba sakerɛ wɔ̃rɛ mɛ wuu yoore en lu wɔ̃rɛ la.

²⁰ Ba puan dela Hameneyɔsi la Alɛgezanda, sɛba ti mam dikɛ ba bo' Sagena la, ti ba nyɔgɛ yɛm da tuura Yinɛ.