1 Tesaloniki 5 - ZE'ELEGO PAALEGA

¹ Nananawa, han dɛna saŋa la bii dabeherɛ la, n suurɔ, ya dagi ba gulehɛ sɛsɛla bo' ya.

² Se'ere en sɔi la, ya mɛhi mi' suŋa ti Daana la dabeherɛ la, wan wa'am na wuu yu'uŋɔ nageyiga la.

³ Ba han ta yeti, “Suma'ahum bii fai nyaa boi.” Bilam bilam ti sageŋɔ wan sige ba zuo na, ti too la ana wuu pɔka n virege la, ti piirɛ kan bɔna!

⁴ Gee yamam n suurɔ, ya ka boi lika puan, ti de daarɛ la ta iŋɛ ya pakerɛ wuu nageyiga la.

⁵ Se'ere en sɔi la, ya za'a dela niihum kɔma, dɛna beyiine kɔma. Tumam dagi yu'uŋɔ, bii lika puan kɔma.

⁶ Bala, da bahɛ ya ti tu gihere ya wuu basɛba n iti se'em la, gee bahɛ ya ti tu piga, gee tara tu mɛhi suŋa.

⁷ Se'ere en sɔi la, sɛba n gihere, gihere la yu'uŋɔ, ti sɛba n bugeri, bugera yu'uŋɔ.

⁸ Gee tumam en de beyiine kɔma la, bahɛ ya ti tu tara tu mɛhi suŋa, gee yɛ sakerɛ la nɔŋerɛ ti la dɛna tu nyu'ɔ tɛ'ɛlega, Gee han dɛna tu zuo wanɛ, tu vuge faarɛ en de tu beere puti'irɛ la.

⁹ Se'ere en sɔi la, Yinɛ ka maahum tu ba'ahegɔ zi'an bahɛ la sunsunyiim puan, gee tu nyɛ faarɛ doohe tu Daana Yezu Kiresta puan,

¹⁰ se'em en ki bo' tu, ti tu pige woo, tu gihi woo, tu ta'am vɔna la en.

¹¹ Ŋwana zuo, kpemehe ya taaba gee mɛta taaba wuu yan pun ita se'em la.

Ba'ahegɔ kã'aŋɔ, pu'uhegɔ la ka'a

¹² Gee tu beleni ya mɛ tu suurɔ, na'aheri ya sɛba en tuni ya puan la, sɔna ya biha Daana la puan, gee ka'ana ya la.

¹³ To'ohe ya ba suŋa suŋa la nɔŋerɛ, ba tuuma la zuo. Boni ya la suma'ahum la taaba.

¹⁴ Tu yeti ya mɛ la ninmu'urɛ tu suurɔ, ti ya ka'ana sɛba en iti bura bura la, la ninmu'urɛ, gee kpɛmeha sɛba puti'ira en kɔ'ɛ la. Suŋeri ya tarenduma, tari ya sugeri bɔ'ɔra ba za'a.

¹⁵ Bihɛ ya suŋa ti ya se'em da dikɛ be'em yɔ be'em. Gee saŋa woo, eere ya ti ya ita sum bɔ'ɔra taaba, la nɛra woo.

¹⁶ Nyɛɛni ya saŋa woo,

¹⁷ pu'uheri ya da gɔ'ɔra,

¹⁸ bo'ori ya Yinɛ fara yelese'ere woo puan. Se'ere en sɔi la, Yinɛ sumboolum n bala bo' ya Yezu Kiresta puan.

¹⁹ Da kiiheri ya Fa'a Sia la.

²⁰ Da zɛregerɛ ya nɔtɔgeheba yelehum la,

²¹ gee magehere ya sɛla woo biha. Gurɛ ya sɛla en ani suŋa la mɔpi.

²² Yehe ya mɛhi be'em woo puan.

²³ Suma'ahum Yinɛ la mɛŋa wan sukɛ ya za'a za'a. Ya sia za'a, la ya puti'irɛ za'a, la ya iŋa za'a, la ya inma'ahum za'a, maahum ya biŋe gura tu Daana Yezu Kiresta kinɛ na.

²⁴ Se'em en yi' ya la dela sakerɛ daana, a wan iŋɛ ŋwana wa.

²⁵ N suurɔ, pu'uheri ya bo'ori tɔ.

²⁶ Pu'uheri ya suurɔ woo la tuulum kɔkerɛ.

²⁷ Mam ka'ani ya mɛ Daana la puan, ti ya kãalɛ gɔnkuna wa bo' suurɔ la za'a.

²⁸ Daana Yezu Kiresta zu'uhegɔ wan bɔna la ya. (Taari.)